Kwe Bisi-Rome
9 Matieleka nita tâ tintwari na Kristo; ka nita huna ko. Ngindu’ani timbangi yita tâ tintwari na meno mu mpeve santu, 2 tiari tiatingi tie nani mu mutima’ani na mpasi zita lembo wa. 3 Mu bungu ti nzololo bakungabasa na Kristo ntiana muntu wa loko ngatu nabakisa mpangi zani, bantu ba kanda diani mu tinsuni, 4 bê bala ba Israele. Bawu babasôla ngatu babâ bala ba Nzambi. Yandi wabasongela mukembo’andi, wasa luwawanu na bawu, wabahana Musiku, kani na bweso bwa mu sarila. 5 Ni bawu bê bala ba bankaka, mu nzila ya bawu Kristo kabutukila mu tinsuni. Nzambi, yandi yôkele bima biabiansoni, kakemboso ntangu zazansoni. Amen.
6 Kâ ka wuta zolo tâ ko ti zu dia Nzambi ka dialungana ko. Mu bungu ti ka bô babansoni’â ko babutukila mu kanda dia Israele bê nkatika “bala ba Israele.” 7 Ka wena ko ti bu bê bala* ba Abrahame wuzololo tâ ti babansoni nkatika bala* bandi bena. Nzambi watâ kwe Abrahame: “Bô ba batâ bala* baku mu nzila ya Izake bakwizila.” 8 Wuzololo tâ ti bala* ba tinsuni ba Abrahame ka bena nkatika bala* ba Nzambi ko. Kâ bala* babutukila mu nzila ya kani, ni bawu babongela ntiana nkatika bala.* 9 Mu bungu ti kani dia Nzambi ebu dieri tâka: “Mu muvu wukwiza, mu ntangu ntiana ya bwawu bu mbo nikwiza, mpe Sara mbo kabuta mwana wa bakala.” 10 Misamu ni bo mpe miayôkela mu ntangu Rebeka yi kabutila nkaka’eto Izake mapasa. 11 Ntete babutuka mpe ntete basa tima ni tima tia mbote peleko tia mbi, Nzambi wasongela ti kani diandi ka diaketi’â sikamana mu nsalulu ko, kâ mu nzila ya nsololo’andi na ya mbila’andi. 12 Nzambi wamutêla: “Yaya mbo kabâ tisari tia mpangi.” 13 Ntiana bu watsonama: “Nazololo Yakobe, kâ nayinini Ezawu.”
14 Buna bwe tutâ? Ngano Nzambi kondo kwa buderede kwe nandi? Diangana kâni! 15 Mu bungu ti Nzambi watâ kwe Mose: “Mbo nisongela tiari kwe muntu ni muntu wu nisôla, mpe mbo nisongela tiari tia mutima kwe muntu ni muntu wu nzololo.” 16 Buna, ka wusikamane’â mu luzolo lwa muntu ko peleko mu ngolo zi kata sarila, kâ mu Nzambi, yandi wê na tiari. 17 Mu bungu ti matsonoko mbo matâka kwe Farao: “Nakulundiri wa moyo mu bungu dia musamu ewu: mu songela ngolo zani mu nzila’aku mpe ngatu bakembela nkumbu’ani mu mutoto wa mukaka.” 18 Buna, Nzambi mbo kasongelaka tiari kwe muntu ni muntu wu kazololo mu songela tiari, kâ mbo kabîkaka muntu wuzololo mu bâ na tungu kabâ na tungu.
19 Bantu bakaka balendi kundiyula: “Mu bungu dia nti Nzambi kakipilaka mbi yi tuyirikaka? Nani lendi telamana luzolo lwandi?” 20 Ô muntu, nge nani mu zonzela mu mpila ya mbi ha matu ma Nzambi? Ngano tima ti basala tilendi tâ kwe muntu wasala tio: “Mu bungu dia nti wakunsarila mu mpila yo?” 21 Ngano muntu wusarilaka argile* mu yirika bima, kena na nswa ko wasarila argile yo* mu yirika yuki di balendi sarila mu bungu dia misamu mia mfunu na yuki di balendi sarila mu bungu dia misamu milembolo mfunu? 22 Mpila mosi mpe na Nzambi. Yandi wabonga nzengolo ya songela nkesi na ngolo zandi mu korela na luvivululu lwalwingi bantu bamutâ nkesi mpe ba baketi fukisa. 23 Yandi wasila bo mu songela bunene bwa mukembo’andi kwe bô baketi tambula tiari tiandi, wabakubika mu baka mukembo. 24 Ni beto katâ mbila, ka wena ko ti ha kati dia Bayuda kwa, kâ mpe ha kati dia makanda makaka. 25 Ni bo mpe katâ mu buku dia Oze: “Bô balembo bâ kanda diani ni bawu nitâ ‘kanda diani’, mpe mukento wo wu nalembo zolo mbo nimutâ ‘mukento wu ntomono zolo’; 26 mpe mu mbuka yo yi babatêla: ‘Ka lwena kanda diani ko,’ mu mbuka yo mbo babatâ ‘bala ba Nzambi ya moyo.’”
27 Ntiangu Izayi kata tâ mu ngolo mu bungu dia Israele: “Ni bu sa ti lutangu lwa bala ba Israele lulendi bâ ntiana lwa mbutu za mutoto zê ha ndeko mubu, bantu fioti kwa bavûka. 28 Mu bungu ti Yehova* mbo kafundisa mutoto, mbo kahana nsembolo mu ntinu.” 29 Mpe ntiana bwa tâ Izayi: “Tala ti Yehova* wa binwani ka tu bîkila bala* ko, mbo taketi bâ ntiana Sodome, mpe mbo taketi fwanana na Gomore.”
30 Buna bwe tulendi tâ? Bantu ba makanda makaka basongela timinu mpe ba babongela ntiana bantu ba sungama, ni bu sa ti ka badinga mu sarila buderede ko. 31 Kâ, ni bu sa ti bala ba Israele badinga mu sarila musiku wa buderede, ka balenda mu zitisa musiku wo ko. 32 Mu bungu dia nti? Mu bungu ti badinga mu sarila wo mu nzila ya nsalulu, kâ ka mu nzila ya timinu’â ko. Bawu batâ kuba ha “tari dibwisaka”; 33 ntiana bu watsonama: “Taleno! Ntûriri tari disaka ti bantu batâ makuba ku Siyone na tari dibwisaka bantu, kâ wô tûla timinu mu tari dio ka fwa nsoni ko.”