Bisalu bia Bantumwa
25 Dieka bo Festuse, bu katula ku tizunga tio, mpe bu kabatika mu yâla, ha manima ma bilumbu bitatu wakatuka ku Sezarea mpe wayenda ku Yerusaleme. 2 Mfumu za banganga-nzambi na babakala ba mfunu ba Bayuda baye funda Paulo kwe yandi. Buna babatika mu lemberela Festuse 3 mu tambula mu tambika Paulo ku Yerusaleme. Kâ mabanza meri nawu ma mu tambila mutambu ngatu bamuhonda mu nzila. 4 Kâ, Festuse wavutula ti Paulo wafweti bâ ku Sezarea, mpe ntangu fioti kwa yandi beni mbo kaketi kâla kûna. 5 Wâta: “Diangana, tala ti bakala di musamu wa mbi kayirikiri, bîka ti bô bê na lutumu ha kati dieno bakôka na meno mpe bamufunda.”
6 Buna, wayôkesa bilumbu 8 peleko 10 na bawu, wakôka ku Sezarea, mpe tilumbu tialanda wazakala ha chaise ya mfundusu mpe walomba banata Paulo. 7 Bu kakota, Bayuda batûka ku Yerusaleme bamuzungirila, bu beri mu kwikisilaka misamu miamingi mia ngolo mi balembo bêla na lenda mu songela ti mia matieleka mieri.
8 Kâ mu tinwanina Paulo watâ: “Ka nsiri’â na kani masumu ko mavwezele Musiku wa Bayuda peleko tempelo peleko Sezare.” 9 Festuse, mu bungu ti weri nandi ti Bayuda bamutambula, wavutula kwe Paulo: “Ngano zololo wanaka ku Yerusaleme mpe bakufundisa kûna ha matu mani mu bungu dia misamu mi?” 10 Kâ Paulo watâ: “Ha matu ma chaise ya mfundusu ya Sezare ntelamane, ku bafweti kumfundisila. Ntiana nge mpe bu batikiri mu bakula wo, ka nsiri’â na kani musamu wa mbi ko kwe Bayuda. 11 Tala ti wa matieleka munsa-mbi ndiena, mpe musamu ndirikiri wu mfweti fwila, ka nkariri’â ko mu fwa; kâ tala ti misamu mi ta kunkwikisila bantu eba ka miena mia matieleka ko, ka kwena muntu ko wê na nswa wa kungana ha moko mawu mu ba tâ nsayi. Ndombele bakumfundisa kwe Sezare!” 12 Buna Festuse, bu kamana moka na bantu bamuhanaka malongi, wamuvuturila: “Mu bungu ti lombele ti bakufundisa kwe Sezare; kwe Sezare kwenda.”
13 Bilumbu fioti ha manima, mutinu Agripa na Berenise bayiza ku Sezarea mu kwizi tala Festuse. 14 Mu bungu ti bayôkesa bilumbu biabingi kûna, Festuse wazonzela musamu wa Paulo kwe mutinu bu katâ:
“Bakala dimosi die kû Felikse di kasisa ku boloko, 15 mpe bu nabêle ku Yerusaleme, mfumu za banganga-nzambi na bakuluntu ba Bayuda bamufundiri kwe meno bu balombele ti namuzengela mambu. 16 Kâ nabavuturiri ti Bisi-Rome ka bena na tifu ko tia hana muntu ha moko ma bantu mu ba tâ nsayi, tala ti muntu wu bata funda keka’eti bwabana na bantu bata mu funda ko ngatu ka tinwanina mu musamu wu bata mu fundila. 17 Buna bu naturiri kû, ka nalembekete’â ko, kâ tilumbu tialendi nazakale ha chaise ya mfundusu mpe nalombele banata bakala dio. 18 Bantu babele mu fundaka bu bayiziri, ka batêle’â na kani misamu mia mbi ko mu yandi mi nabele kekoloko. 19 Musamu kwa wutariri dibundu diawu babele bakananaka na musamu wutariri bakala dimosi di batâka Yezu wafwa, kâ Paulo wu katâka ti wa moyo wena. 20 Mu bungu ti ka nazebi’â ko bwe naketi sa mu sukisa ntembe zo, namuyuriri tala ti zololo mu kwenda ku Yerusaleme ngatu bamufundisa kûna mu bungu dia misamu mio. 21 Kâ Paulo bu kalombele ti katatamana mu bâ ku boloko mu kêla nzengolo ya Mfumu ya ku Rome, nalombele bamulunda kô tii ntangu yi mfweti mu tambika kwe Sezare.”
22 Buna Agripa watâ kwe Festuse: “Meno mpe nzololo nawâ bakala dio.” Wamuvuturila, “Mbazi mbo mu wâ.” 23 Buna tilumbu tialanda, Agripa na Berenise bayiza na lukuta lwalwansoni mpe bakota mu mbuka yi bafundisilaka, tintwari na komanda za binwani mpe na babakala ba mfunu ba mumvuka; mpe Festuse bu kahana ntumunu, banata Paulo. 24 Festuse watâ: “Mutinu Agripa na beno bansoni lwe hâ na beto, muntu wu, wu luta mona, Bayuda babansoni ba ku Yerusaleme na ba kwawu ku bayizi mu funda kwe meno, bu babele kawulaka mu ngolo ti ka fweti’â kavutu bâ wa moyo ko. 25 Kâ nabakuri ti ka yirikiri’â musamu ko wu kafweti fwila. Buna bakala di bu kalombele ti bamufundisa kwe Mfumu ya ku Rome, nabongele nzengolo ya mu tambika kwe yandi. 26 Kâ, ka ntomono’â zaba musamu wu nitsoneka ko kwe Mfumu’ani mu bungu dia yandi. Buna nimuneti ha matu ma beno bansoni, mpe nsungula ha matu maku, Mutinu Agripa, ngatu mfundusu bu yisalama nabaka musamu wu nitsoneka. 27 Mu bungu ti ka wena wa delakana ko kwe meno mu tambika muntu wu bakengi, beto ka tuzabikisi misamu mi bamufundiri.”