Bisalu bia Bantumwa
26 Agripa watêla Paulo: “Lendi zonza mu tinwanina.” Buna Paulo walambula koko, mpe wabatika mu zonza:
2 “Mu bungu dia misamu miamiansoni mi ta kunkwikisila Bayuda, mutinu Agripa, nsayi ye nani mu bungu ti lumbu ti ha matu maku nita tinwanina, 3 nsungula mu bungu ti tomono zaba nsalulu zazansoni na misamu mi lembo wisasanaka Bayuda. Buna mulemvo’aku, kungwirikila na luvivululu.
4 “Diangana, mbêlo’ani tûka buntwenia bwani ha kati dia kanda diani* na ku Yerusaleme ya zabakana yena kwe Bayuda babansoni 5 bakunzebi tûka ntama. Tala ti bazololo, balendi tâ timbangi ti meno mu dibundu dia Bafarize die na misiku mia nkatika mia ngolo nabâ. 6 Kâ mu bungu dia tivuvu mu kani dia sa Nzambi kwe nkaka zeto bata kumfundisila lumbu ti; 7 kani ni dio kwa mpe makanda meto ma 12 masilaka tivuvu mu mwina dio ndungananu, bu basarilaka Nzambi tisalu tia santu tia ngolo mpimpa na mwini. Ô mutinu, ni mu bungu dia tivuvu tio Bayuda bakumfundiri.
8 “Mu bungu dia nti lulembo kwikilaka ti Nzambi lendi vumbula bantu ba fwa? 9 Meno, lukwikulu lwabâ nani ti nafweti telamana nkumbu ya Yezu Musi-Nazarete mu mpila zazansoni. 10 Diangana ni bo nasa ku Yerusaleme, mpe natûla basantu babingi ku boloko, mu bungu ti lutumu nabaka kwe mfumu za banganga-nzambi; mpe bu beri dingaka babahonda, meno wa ndieri tambulaka. 11 Vula-vula, mpasi ndieri ba mwisaka mu sinagoge zazansoni mu ba tuma mu ngolo mu kala timinu tiawu; mpe mu bungu ti nkesi zazingi zabâ nani mu bawu, mala ndieri kwendaka mu ba kwamisa mu mimvuka miakaka.
12 “Bu ndieri kwendaka ku Damase mu bungu ti mfumu za banganga-nzambi zakungana lutumu na dema dio, 13 ô mutinu, mu nzila, namona mutsamina wayôka ntangu mu ngolo watûka ku zulu wakunzungirila, meno na bantu beri saka nzietolo na meno. 14 Beto bansoni bu tabwa ha mutoto, nawâ zu diakuntêla mu zu dia Ebre: ‘Saule, Saule mu bungu dia nti ta kunkwamisina? Mpasi ta timwisa bu ta tatamana mu winda matambi mu miti mie na lusonso.’* 15 Kâ natâ: ‘Nge nani, Mfumu?’ Mpe Mfumu watâ: ‘Meno ni Yezu wuta kwamisa. 16 Kâ vumbuka mpe telama. Mu bungu dia musamu ewu nikumonekene: mu ku sôla mu bâ tisari na mbangi mu misamu mi mweni na mu misamu mi nikumonekesa mu bungu dia meno. 17 Mpe mbo nikukûla mu bantu ba na mu makanda ma, ku nita ku tambika 18 mu ba zibula meso, mu ba katula mu mpimpa ya ngolo* na mu ba nata ku mutsamina, mu ba katula mu lutumu lwa Satana na mu ba nata kwe Nzambi, ngatu babaka mulemvo wa masumu na fwa ha kati dia bô ba basantukisi mu bungu dia timinu tiawu mu meno.’
19 “Buna, mutinu Agripa, ka nayizi’â kolamana timona-meso tio ko tiatûka ku zulu, 20 kâ ntete kwe bô bê ku Damase, mpe kwe bô bê ku Yerusaleme na ku Yude yayansoni, kâ mpe kwe bantu ba makanda, naneti nsangu ezi ti bafweti soba mabanza mpe bafweti baluka kwe Nzambi, bu basala bisalu bimonekesaka nsobolo ya mabanza. 21 Ntiangu Bayuda bakunkengi ku tempelo mpe badingiri mu kungonda. 22 Kâ mu bungu ti lubakusu lwa Nzambi nabakiri, timbangi nita tatamana mu tâ lumbu ti ha matu ma bantu ba kula na ba fioti, bu nita lembo tâ musamu wakaka, diambu’eti mio kwa mia bikula Bambikuri na Mose: 23 Kristo wafweti mona mpasi, mpe mu bungu ti ni yandi wa ntete wavumbuka kwe ba fwa, wafweti samuna mutsamina kwe Bayuda na kwe makanda.”
24 Paulo bu keri tâka misamu mio mu tinwanina, Festuse watâ mu zu dia ngolo: “Paulo lawuka ta lawuka! Longoka kwakwingi kukulawukisi!” 25 Kâ Paulo watâ: “Ka nita lawuka ko, Mfumu Festuse, kâ misamu mi nita tâ mia matieleka miena mpe mia delakana. 26 Musamu wa matieleka ni wena’eti, kwe mutinu wu nita zonzela na timpwanza, misamu mio miamiansoni mia katomono zaba. Lukwikulu lwe nani ti ka kwena musamu ko wu kalembolo zaba, mu bungu ti ka kwena musamu ko wasalamane mu mansweki. 27 Mutinu Agripa, ngano Bambikuri bawu kwikilaka? Nzebi ti kwikila kwikilaka.” 28 Kâ Agripa watâ kwe Paulo: “Ntangu fioti kwa yisiri, ntamana mbo kungwisa mu bâ Mukristo.” 29 Buna Paulo watâ: “Ni bu sa ti ntangu ya fioti peleko yayingi yifwanane, mbo nibâ na nsayi ha matu ma Nzambi, tala ti ka nge’â ko kwa, kâ beno bansoni luta kungwirikila lumbu ti lubêle ntiana meno, kâ ka lubândi ba kangama mu chaîne.”
30 Ha manima mutinu watelama, mpila mosi mpe na guvernere, Berenise na babakala bazakala na bawu. 31 Kâ, bu beri kwendaka, babatika mu tâ bawu na bawu: “Bakala dio ka yirikiri’â musamu ko wu kafweti fwila peleko wu kafweti bêla ku boloko.” 32 Ha manima Agripa watâ kwe Festuse: “Bakala dio mbo baketi mu yambula tala ti ka lombele’â ko bamufundisa kwe Sezare.”