Like
15 Bantu babansoni batotaka mpaku na bisumuki bazungirila Yezu mu mu wirikila. 2 Mpe Bafarize na bitsoniki ebu beri niungutaka: “Bakala di bisumuki kata bwana mpe na bawu kata dia.” 3 Buna wabahana tifwani eti, bu katâ: 4 “Tala ti mosi mu beno bimeme 100 bie nandi, mpe zimbakase timosi, ngano ka sa sisa bia 99 ko ku sese* mu kwe dinga tio tizimbakane tii bu kabaka tio? 5 Mpe bu kabaka tio, tûriri tio ha mahembo mandi mpe yangalale. 6 Ha manima, bu katuriri ku nzo, têle mbila ndiku zandi na bantu ba babandakane mpe ba têlele: ‘Yangalaleno na meno, mu bungu ti timeme tiani tiazimbakane tia mbakiri.’ 7 Wa nita lu têla, mpila mosi mpe mbo kubâ nsayi yayingi ku zulu mu bungu dia musumuki wumosi wusobele mabanza yôka bantu 99 bê ba sungama balembolo na nsatu ya soba mabanza.
8 “Peleko tala ti mukento wê kô wê na mipata 10 mia drakme,* zimbakase drakme* yimosi, ngano ka namisa mwinda ko mu komba nzo’andi na mu tomo dinga tii bu kabaka yo? 9 Mpe bu kabakiri yo, têle mbila ndiku zandi* na bantu ba babandakane mpe ba têlele: ‘Yangalaleno na meno, mu bungu ti mupata’ani wa drakme* wazimbakane wa mbakiri.’ 10 Ntiangu nita lu têla, mpila mosi mpe, mbazi za Nzambi nsayi yibâka nawu mu bungu dia musumuki wumosi wusobele mabanza.”
11 Ha manima watâ: “Bakala dimosi dieri na bala bole ba babakala. 12 Mpe wa muleke watâ kwe tata’andi: ‘Tata, kaba bimvwama biaku mpe hana tikunku tiani.’ Buna tata wakaba bimvwama biandi kwe bala ba bole. 13 Ha manima ma mwa bilumbu, mwana wa muleke wakukula bima biandi biabiansoni mpe wayenda ku hata diabâ mala; mpe kûna wabebesa bimvwama biandi biabiansoni bu kanata luzingu lwa buyala.* 14 Bu kamanisa bima biandi biabiansoni, nsatu ya ngolo yakota ku hata dio, mpe ka vutu’â sâla na tima ko. 15 Yandi beni wanatuka kwe musi-hata wumosi mu kwe dinga tisalu, mpe wamutambika ku musitu’andi mu kêla ngulu. 16 Wazolo mu dia bima bieri diaka ngulu, kâ muntu kâni weri mu hanaka tima.
17 “Mabanza mandi bu makâla, watâ: ‘Bisari biabiansoni bia tata’ani bima biabingi bie nawu bia dia, kâ meno kû nsatu nita fwa! 18 Mbo nitelama, kwe tata’ani nikwenda mpe mbo nimutêla: “Tata, nsumukini ha meso ma Nzambi* na ma nge. 19 Ka mfwanane’â ko bavutu kuntâ mwana’aku. Kumbongela ntiana wumosi wa bisari biaku.”’ 20 Buna watelama mpe wakâla kwe tata’andi. Bu keri ha titini tia mwa tia tila, tata’andi wamumona mpe tiari tiamubaka; wadioka, wamubumba,* mpe wamuhana bize ya lembama. 21 Ha manima mwana wamutêla: ‘Tata, nsumukini ha meso ma Nzambi na ma nge. Ka mfwanane’â ko bavutu kuntâ mwana’aku.’ 22 Kâ tata watâ kwe ngamba zandi: ‘Seno manzangu, nateno tinkuti tiyôkele butoma mpe mu lwikeno tio, mu tûleno mpe bage mu mulembo na mapapa mu malu. 23 Nateno mpe mwana wa ngombe wê na mafuta, hondeno wo, tadieno mpe taseno malaki, 24 mu bungu ti mwana’ani ewu wa fwa wabêle, kâ kêri wa moyo; wazimbakane, kâ monekene.’ Mpe babatika mu yangalala.
25 “Mwana’andi wa mukuluntu ku musitu keri. Bu keri kâlaka, mpe bu keri pene-pene na nzo wawâ lwaza lwa mikunga na lwa matinu. 26 Buna watâ mbila tisari timosi mpe wamuyula nti bieri yôkaka. 27 Tisari tiamutêla: ‘Mpangi’aku kêri, mpe tata’aku hondese mwana wa ngombe wê na mafuta mu bungu ti kêri na tikolela tia mbote.’ 28 Kâ wabaka nkesi mpe wakala mu kota. Buna tata’andi wayiza mpe wabatika mu mu lemberela. 29 Yandi wavutula kwe tata’andi: ‘Tala! Mvula zazingi nisalaka kwe nge ntiana ngamba mpe kani kabwe ka ndieka’eti kolamana ntumunu zaku ko. Kâ na kani mwana wa nkombo ka weka’eti wa kungana ko ngatu nayangalala na ndiku zani. 30 Kâ buna kwa mwana’aku bu kakêri, yandi wahombese* bimvwama biaku na biyala, hondese mwana wa ngombe wê na mafuta mu bungu dia yandi.’ 31 Buna tata’andi wamutêla: ‘Mwana’ani, ntangu zazansoni na meno wabêle mpe bima biabiansoni bi mvwiri bia nge biena. 32 Kâ wufwanane tasa malaki mpe tayangalala, mu bungu ti mpangi’aku wa fwa wabêle, kâ kêri wa moyo; wazimbakane, kâ monekene.’”