Like

19 Ha manima Yezu wakota ku Yeriko mpe mumvuka wo keri sabukaka. 2 Kûna kweri na bakala dimosi dieri na nkumbu Zase; titoti tia mpaku tiabâ mpe mwvama yeri. 3 Yezu keri dingaka mu mona, kâ keri‘â lendaka ko mu bungu dia pôka dia bantu, mu bungu ti wa nkufi weri. 4 Buna wadioka mpe wanaka ha zulu muti wa sikomore mu mu mona, mu bungu ti ni hâna kaketi yôkela. 5 Yezu bu katula ha mbuka yo, wananguna meso mpe wamutêla: “Zase, kôka mu ntinu mu bungu ti lumbu ti mfweti bâ ku nzo’aku.” 6 Wakôka mu ntinu mpe wamubwana na nsayi ku nzo’andi. 7 Bu bamona bo, babansoni banuinguta: “Ku nzo ya musumuki kele bêla.” 8 Kâ Zase watelama mpe watâ kwe mfumu: “Tala! Mfumu kati-kati dia bima biani nihana kwe bamputu, mpe bima biabiansoni bi nawuka* kwe muntu mbo nimukarisila bio mbala yà.” 9 Buna Yezu wamutêla: “Lumbu ti mvukulu yitûriri mu nzo yi, mu bungu ti yandi mpe mwana wa Abrahame wena. 10 Mu bungu ti Mwana muntu wayiza mu dinga na mu vûkisa bô bazimbakana.”

11 Bu beri wirikilaka misamu mio, wahana tifwani tiakaka, mu bungu ti pene-pene keri na Yerusaleme mpe ebu beri banzaka ti Timfumu tia Nzambi hô nkatika bendo tiaketi moneka. 12 Buna watâ: “Bakala dimosi diabutuka mu kanda dia bamfumu, wasa nzietolo ku hata diabâ mala ngatu bamusa mutinu, mpe ha manima mbo kaketi kâla. 13 Watâ mbila ngamba zandi 10, wabahana mine* 10 mpe wabatêla: ‘Têleno zo nkari tii bu nikâla.’ 14 Kâ bantu ba nsi’andi yandi beri yinaka mpe bamutambikila binati-nsangu mu mu têla, ‘Ka tuzololo’â ko ti muntu wû wabâ mutinu’eto.’

15 “Bu kakâla, ha manima bu kamana baka timfumu, watâ mbila ngamba zi kahana mbongo,* mu zaba kwa babaka mu nkari zi batâ. 16 Wa ntete wapusana mpe watâ: ‘Mfumu, mine’aku yibutiri mine 10.’ 17 Wamutêla, ‘Bubote siri, ngamba ya mbote! Mu bungu ti wa kwikama bêle mu musamu wa fioti, lutumu nikuheni mu mimvuka 10.’ 18 Wa nzole wayiza mpe watâ, ‘Mfumu, mine’aku yibutiri mine tanu.’ 19 Kwe yandi mpe watâ, ‘Nge mpe bâ mfumu mu mimvuka tanu.’ 20 Kâ wakaka wapusana, mpe watâ, ‘Mfumu, mine’aku eyi, ku nsi’a mulele naswekele yo. 21 Mweni, bunkuta bwa nge bwabêle nani mu bungu ti yiribita die naku; mbongo zi walembo lunda bongaka, mpe mbutu zi walembo kuna tiaka.’ 22 Wamutêla, ‘Ngamba ya mbi, ni mu nzonzolo’aku nikufundisila. Tomono zaba ti yiribita die nani, bima bi nalembo lunda nibongaka mpe mbutu zi nalembo kuna nitiaka. 23 Buna mu bungu dia nti walembolo tûrila mbongo zani* ku banke? Bwawu bu bu nkêri ngâ mbongele zo na ntenso.’

24 “Buna watâ kwe bô batelama hâna, ‘Mu bongeno mine yo mpe haneno yo kwe wô wê na mine 10.’ 25 Kâ bamutêla, ‘Mfumu mine 10 zê nandi!’— 26 ‘Wa nita lu têla, wô têkele na tima, mbo bamuyikila tima, kâ wô lembolo na tima, banza tio tie nandi mbo bamukatula tio. 27 Musamu wakaka, mbeni zalembolo zolo ti nabâ mutinu’awu, ba nateno hâ mpe ba hondeno ha matu mani.’”

28 Bu kamana tâ misamu mio, Yezu watatamana mu kwenda ku Yerusaleme, bu keri kwe yende ku matu. 29 Bu katula pene-pene na Betefaze mpe na Betani ku mongo wu batâka Mongo wa miti mia Olive, watambika milongoki miandi miole, 30 watâ: “Yendeno ku hata edio di luta mona, mpe bu lukota kô, mbo lumona mwana buluku* wu bakengi, wu beka lembo yuluka kwe muntu. Sutuleno wo mpe nateno wo kû. 31 Kâ tala ti muntu luyuriri, ‘Mu bungu dia nti luta wa suturila?’ lufweti mu têla, ‘Mfumu wê na wo nsatu,’” 32 Buna bô ba batambika, bayenda mpe bamona misamu buna bu babatêla mio. 33 Kâ bu beri sutulaka mwana buluku, bô bavwa wo babatêla: “Mu bungu dia nti luta suturila mwana buluku?” 34 Bâta: “Mfumu wê na wo nsatu.” 35 Banata wo kwe Yezu, batûla binkuti biawu ha zulu mwana buluku mpe bazakasa Yezu ha zulu mwana buluku wango.

36 Bu keri kwe pusi, bantu binkuti biawu bia zulu beri yalaka mu nzila. 37 Buna kwa bu katula pene-pene na nzila yikôkaka ku Mongo wa miti mia Olive, milongoki miandi miamiansoni miabatika mu yangalala na mu kembela Nzambi mu zu dia ngolo mu bungu dia bimangu biabiansoni bia nzitukulu bi bamona, 38 batâ: “Kabâ wa sakumunu Mutinu wuta kwiza mu nkumbu ya Yehova!* Tidzunu ku zulu, mpe mukembo kwe nge wê ku zulu!” 39 Kâ, Bafarize bakaka babâ mu pôka dia bantu bamutêla: “Mulongi, bamina milongoki miaku.” 40 Kâ wabavuturila: “Wa nita lu têla, tala ti nibatêlele bakuta matari mbo makawula,”

41 Mpe bu katula pene-pene na mumvuka wa Yerusaleme, watala wo mpe wadirila wo, 42 bu katâ: “Tala ti nge mpe mu tilumbu ti bakuriki misamu minataka tidzunu! Kâ bwawu bu baswekele mio ha meso maku. 43 Mu bungu ti bilumbu bikwiza, mbeni zaku zitunga pene-pene na nge tikaku tia ngolo mu bitungu bia nsongi, mbo bakuzungirila mpe mbo bakufilangasa mu mbuka zazansoni. 44 Mbo bakufukisa nge na bala baku, mpe ka basisa tari ha zulu tari ko kwe nge, mu bungu ti ka wabakuri’â ntangu yi bayizi ku tala ko.”

45 Buna wakota mu tempelo mpe wabatika mu tuba ku mbazi bô beri tekaka, 46 wabatêla: “Watsonama: ‘Nzo’ani mbo batâ yo nzo ya lusambulu,’ kâ beno lutituri yo nzo ya mivi.”

47 Bilumbu biabiansoni keri tatamanaka mu longesa ku tempelo, kâ mfumu za banganga-nzambi, bitsoniki na mfumu za nsi, weri nawu bamuhonda; 48 kâ ka beri’â bakaka mpila yi baketi bwa sila ko, mu bungu ti bantu babansoni yandi beri tomo wirikilaka.