Bisalu bia Bantumwa

9 Kâ Saule, mu bungu ti nsatu kwa ya tâ bunkuta na ya honda milongoki mia Mfumu yabâ nandi, wayenda kwe mfumu-nganga-nzambi, 2 mpe wamulomba mikanda, mu bungu dia sinagoge za Damase, ngatu kakanga misinga bantu babansoni ba Nzila, bakento na babakala, ba kaketi mona, mpe kabanata ku Yerusaleme.

3 Bu kabâ mu nzila mpe bu kabâ pene-pene na Damase, mbala mosi mutsamina watûka ku zulu mpe wakenga ha keri, 4 wabwa ha mutoto, mpe wawâ zu diamutêla: “Saule, Saule, mu bungu dia nti ta kunkwamisina?” 5 Wayula: “Nge nani, Mfumu?” Watâ: “Meno ni Yezu wuta kwamisa. 6 Kâ telama mpe yenda ku mumvuka, mpe kûna mbo bakutêla nti fweti sa.” 7 Babakala beri saka nzietolo na yandi batelama, mpe ka babâ na lenda ko dia tâ musamu. Diangana zu dia beri wâka, kâ ka beri’â monaka muntu ko. 8 Saule watelama, mpe ni bu sa ti meso ma zibuka mabâ nandi keri’â monaka tima ko. Buna bamusimba mu koko mpe bamunata ku Damase. 9 Mpe wasa bilumbu bitatu keri’â monaka tima ko, keri’â diaka ko mpe keri’â nwaka ko.

10 Ku Damase, mulongoki weri kô wu beri tâka nkumbu Ananiase mpe Mfumu wamutêla mu timona-meso: “Ananiase!” Yandi wavutula: “Ewu ni meno Mfumu.” 11 Mfumu wamutêla: “Telama, yenda mu nzila yi batâka Sungama, mu nzo ya Yuda mpe yula bakala dimosi di batâka Saule wa ku Tarse. Mu bungu ti sambila kata sambila, 12 mpe bakala kamweni mu timona-meso wê na nkumbu Ananiase ta kota mpe ta mu tenseka moko ngatu kavutu mona.” 13 Kâ Ananiase wavutula: “Mfumu, misamu miamingi nawîri mu bakala dio na mbi yayansoni yi kayirikiri kwe basantu ba ku Yerusaleme. 14 Mpe lutumu kabakiri kwe mfumu za banganga-nzambi mu kanga* bô babansoni babingulaka nkumbu’aku.” 15 Kâ Mfumu wamutêla: “Yenda! mu bungu ti bakala dio ni tisalulu ti nsôlele mu nata nkumbu’ani kwe makanda, kwe mitinu na kwe bala ba Israele. 16 Mu bungu ti mbo nitomo mu songela mpasi zazansoni zi kafweti mona mu bungu dia nkumbu’ani.”

17 Buna Ananiase wayenda, wakota mu nzo, mpe wamutenseka moko mpe watâ: “Saule, mpangi’ani, Mfumu Yezu wakumonekene bu wabêle mu nzila yi wabele kwizilaka, kuntambikiri kwe nge ngatu wavutu mona mpe wafuluka mu mpeve santu.” 18 Mpe hô nkatika bendo, bima bieri ntiana madiala bieri bwaka mu meso mandi, mpe wavutu mona. Ha manima watelama mpe wabatusu, 19 wadia mpe wavutu baka ngolo.

Wabâ mwa bilumbu na milongoki miabâ ku Damase, 20 mpe hô nkatika bendo wabatika mu samuna mu sinagoge nsangu zitariri Yezu, ti yandi ni Mwana wa Nzambi. 21 Kâ bô babansoni beri mu wâka bayituku mpe batâ: “Ngano ka bakala di di’â ko diabele kwamisa bô babingulaka nkumbu yo ku Yerusaleme? Ngano kiziri’â kû ko na kani dia ba kanga* na dia ba teka kwe mfumu za banganga-nzambi?” 22 Kâ Saule watatamana mu tomo baka ngolo mpe Bayuda ba ku Damase keri kangisaka minwa bu keri tomo ba songelaka ti Yezu ni Kristo.

23 Ha manima ma bilumbu biabingi, Bayuda batâ mfundu mu dinga mpila yi bamuhondela. 24 Kâ Saule wayizi zaba mabanza mawu mu yandi. Bayuda batomo kengerela mpe mielo mpimpa na mwini ngatu bamuhonda. 25 Buna milongoki miandi miamubonga mpe miamukôkesa mu mpimpa mu titunga ha wundu dieri mu tibaka.

26 Bu katula ku Yerusaleme, wasarila ngolo mu kutakana na milongoki, kâ babansoni yandi beri tînaka, mu bungu ti ka beri’â kwikilaka ko ti mulongoki weri. 27 Buna Barnabase wamubakisa mpe wamunata kwe bantumwa. Watomo ba têla bwe Saule kamwina Mfumu mu nzila mpe bwe kazonzela nkumbu ya Yezu ku Damase na butindi bwabwansoni. 28 Buna wabâ na bawu, bu keri kwe yende mu timpwanza* ku Yerusaleme na bu keri zonzelaka nkumbu ya Mfumu na butindi bwabwansoni. 29 Na Bayuda beri zonzaka Greke keri zonzaka mpe keri disikitaka, kâ bawu, yandi beri dingaka mu honda. 30 Bampangi bu bamona bo, bamunata ku Sezarea mpe bamutambika ku Tarse.

31 Diangana, ku Yude yayansoni, ku Galile na ku Samaria, timvuka tiakota mu ntangu ya tidzunu mpe ni tieri sikamaka; mpe mu bungu ti mu bunkuta bwa Yehova tieri kwe diatiri na mu mbombolo ya mpeve santu, lutangu lwa milongoki lwatatamana mu yikama.

32 Piere bu keri kwe yende mu tizunga tiatiansoni, wakôka mpe kwe basantu beri bêlaka ku Lida. 33 Kûna, wabwana bakala dimosi di beri tâka Ene, waseka ku mfulu tûka mvula 8 mu bungu ti binama bia fwa biabâ nandi. 34 Piere wamutêla: “Ene, Yezu Kristo ku wasisi. Telama mpe yirika mfulu’aku.” Mpe hô nkatika bendo watelama. 35 Bô babansoni beri bêlaka ku Lida na ku Sharone bu bamumona, batambula Mfumu.

36 Ku Zope mulongoki weri kô weri na nkumbu Tabita, tala ti babanguri yo yizololo tâ “Dorkase.”* Misamu mia mbote miamingi keri saka mpe makabu mamingi keri hanaka kwe bamputu. 37 Kâ mu bilumbu bîna, wabêla mpe wafwa. Buna bamuyebesa mpe bamutûla mu shambre ya ku zulu. 38 Mu bungu ti Lida pene-pene yabâ na Zope, milongoki bu miawâ ti Piere mu mumvuka wo keri, batambika babakala bole mu mu lemberela: “Mulemvo’aku, yiza kwe beto mu ntinu.” 39 Buna Piere watelama mpe wayenda na bawu. Mpe bu katula, bamunata mu shambre ya ku zulu; mpe mifwiri miamiansoni mia mikento miapusana kwe yandi bu mieri kwe diri na bu mieri kwe songele biyunga biabingi na binkuti biakaka bia sala Dorkase bu kabâ wa moyo. 40 Ha manima Piere wadukisa bantu babansoni, wafukama mpe wasambila. Ha manima, watarisa kwe mvumbi, watâ: “Tabita, vumbuka!” Wazibula meso mandi, mpe bu kamona Piere, wazakala. 41 Wamuhana koko kwandi mpe wamutelamasa. Ha manima watâ mbila basantu na mifwiri mia mikento mpe wabasongela Tabita wa moyo. 42 Nsangu zo zazabakana ku Zope yayansoni, mpe bantu babingi babatika mu kwikila mu Mfumu. 43 Piere wayôkesa mwa bilumbu ku Zope kwe bakala dimosi di beri tâka nkumbu Simo weri tisari tia mikanda mia bibulu.