Wa ntete kwe Bisi-Korente

5 Diangana, nsangu zita wakana ha kati dieno ni za bunsuza,* bunsuza* bu beka lembo mona kwe bantu ba makanda—bakala dita kwe bê na mukento wa tata’andi. 2 Ngano lwona luta tilwona mu musamu wo? Ngano ka lufweti’â lwabâ mu tiari ko ngatu lwakatula bakala diyirikiri musamu wo ha kati dieno? 3 Ni bu sa ti mu tinsuni ka ndiena kô ko, mu timpeve kô ndiena, mpe nitifundisi bakala dio diyirikiri musamu wo, ntiana’eti bwawu bu na beno ndiena. 4 Bu luvukanaka mu nkumbu ya Mfumu’eto Yezu, mpe bu luzebi ti na beno ndiena mu timpeve na ngolo za Mfumu’eto Yezu, 5 lufweti hana bakala dio ha moko ma Satana mu bungu dia mfukulu ya tinsuni, ngatu mpeve yavûka mu tilumbu tia Mfumu.

6 Malwona meno ka mena ma mbote ko. Ngano ka luzebi’â ko ti ndambu levire pate yayansoni yinakisa? 7 Katuleno levire ya ntama ngatu lwabâ pate ya môna, mu bungu ti ka lwena na levire ko. Diangana, Kristo mwana-timeme’eto wa Pake bamuheni mu mukayulu. 8 Buna taseno malaki, ka mu levire ya ntama ko peleko mu levire ya misamu mia mbi na bifu bia mbi, kâ mu mampa malembo levire ma bunsungu na matieleka.

9 Mu mukanda’ani nalutsonekena mu bîka mu sa tindiku* na bantu basarilaka bunsuza,* 10 ka nita zonzela bantu babansoni ba nza yi ko basarilaka bunsuza,* peleko bantu bê na suka, peleko bantu bawukaka bima, peleko bantu basambilaka biteki. Tala ti ni bo, lufweti katuka mu nza. 11 Kâ bwawu bu nilutsonekene mu bîka mu sa tindiku* na muntu wu batêle mpangi, wusarilaka bunsuza,* peleko wê na suka, peleko wusambilaka biteki, peleko wufingaka,* peleko wunwaka malavu mamingi, peleko wuwukaka bima, na mu lembo dia mpe na muntu wa mpila yo. 12 Ngano ni meno mfweti fundisa bantu balembolo mu timvuka? Ngano ka bantu’â ko bê mu timvuka lufweti fundisa, 13 Nzambi bu kata fundisa bô bê ku mbazi? “Katuleno munkwa-mbi ha kati dieno.”