Wa ntete kwe Bisi-Korente
11 Landeno tifwani tiani, ntiana meno bu nilandaka tifwani tia Kristo.
2 Beno nita sîka mu bungu ti mu misamu miamiansoni meno lubambukilaka moyo mpe bikulu bi nalulongesa lutomo zitisaka. 3 Kâ nzololo lwazaba ti mfumu ya babakala babansoni ni Kristo; mfumu ya mukento ni bakala; mpe mfumu ya Kristo ni Nzambi. 4 Bakala ni bakala disambilaka peleko dibikulaka na tima ku mutu mfumu’andi kafwisaka nsoni; 5 kâ mukento ni mukento wusambilaka peleko wubikulaka yandi ka kangi tima ku mutu, mfumu’andi kafwisaka nsoni, mu bungu ti weka ntiana yandi basiri kungulu. 6 Mu bungu ti tala ti mukento ka kengi’â tima ko ku mutu, fweti zengoso nsuki; kâ tala ti musamu wa nsoni wena kwe mukento mu bâ na nsuki za zengo peleko kungulu, fweti kanga tima ku mutu.
7 Bakala ka fweti’â kakanga tima ku mutu ko, mu bungu ti tifwani na mukembo wa Nzambi kena, kâ mukento ni mukembo wa bakala. 8 Mu bungu ti bakala ka tûka mu mukento ko; kâ mukento watûka mu bakala. 9 Musamu wakaka, ka basala bakala ko mu bungu dia mukento; kâ mukento basala mu bungu dia bakala. 10 Ntiangu mukento kafweti bâ na tidimbu tia lutumu ku mutu’andi mu bungu dia bambazi.
11 Musamu wakaka, ha kati dia milongoki mia Mfumu, mukento kena wa hambana ko na bakala mpe bakala kena wa hambana ko na mukento. 12 Mu bungu ti ntiana kwa mukento bu katûka mu bakala, mpila mosi mpe bakala mu mukento katûka; kâ bima biabiansoni kwe Nzambi biatûka. 13 Taleno beno beni: Ngano wa delakana wena ti mukento kasambila Nzambi yandi ka kangi tima ku mutu? 14 Ngano bima bia sala Nzambi ka bilulongesaka ko ti nsoni zena kwe bakala mu bâ na nsuki za zila, 15 kâ mukembo wena kwe mukento tala ti nsuki za zila zê nandi? Mu bungu ti bamuhana nsuki ngatu zabâ ntiana titambala. 16 Kâ tala ti muntu wuzololo mu sa ntembe mu tikulu tiakaka, beto ka twena na tikulu tiakaka ko, bimvuka bia Nzambi mpe kâni.
17 Kâ bu nita lu hana mitieno mi, ka nita lu sîka ko, mu bungu ti bu lukutakanaka, ka lukutakanaka mu bungu dia musamu wa mbote ko kâ mu bungu dia musamu wa mbi. 18 Musamu wa ntete, nawîri ti bu lukutakanaka mu timvuka, tihambula tibâka ha kati dieno; mpe mbenzi ti wa mwa wa matieleka wena. 19 Ntembe kâni mbo kubâ mpe mwa binzambi-nzambi ha kati dieno, ngatu bantu ba batamburi batomo zabakana.
20 Bu lukutakanaka beno bansoni mu mbuka yimosi, ka lukutakanaka ko mu dia Ndia ya Nkokela ya Mfumu buna bufwanane. 21 Mu bungu ti ntangu ya dia yo bu yitulaka, muna muntu mu beno bidia biandi bia nkokela katoko diaka, buna wumosi nsatu yibâka nandi kâ wakaka ku nsi’a malavu kabâka. 22 Ngano ka lwena na nzo ko za dîla na za nwina? Peleko timvuka tia Nzambi luta vweza mpe bantu balembolo na tima luta fwisa nsoni? Ngano nti mfweti lu têla? Ngano mfweti lu sîka? Mu musamu wo ka nita lu sîka ko.
23 Nalutêlele mpe misamu mi nabakiri kwe Mfumu: ti Mfumu Yezu mu mpimpa yi baketi mu teka wabonga dimpa, 24 mpe bu kamana vutula matondo, wabukuna dio mpe watâ: “Nitu’ani dita monekesa mu bungu dia beno. Tatamaneno mu sila bo mu kumbambukila moyo.” 25 Wasila mpe buna na mbungu* bu bamanisa mu dia, watâ: “Mbungu yi yimonekese luwawanu lwa môna mu nzila ya menga mani matsamuka mu bungu dia beno. Tatamaneno mu sila bo ntangu zazansoni zi lunwa yo mu kumbambukila moyo.” 26 Mu bungu ti ntangu zazansoni zi ludiaka dimpa dio na zi lunwaka mbungu* yo, lufwa lwa Mfumu lutatamanaka mu kembela tii bu kakwiza.
27 Dieka bo, muntu ni muntu wudia dimpa peleko wunwa mbungu* ya Mfumu mu mpila yilembolo ya mbote, mbo kasa masumu mu nitu na mu menga ma Mfumu. 28 Ntete, muntu katoko titambula yandi beni bu kamana tomo titaluzula, mpe ha manima kadia dimpa mpe kanwa mbungu.* 29 Mu bungu ti wô dia mpe nwa yandi ka bakuri nsasa ya nitu, diri mpe nwini mfundusu ya yandi beni. 30 Ntiangu babingi ha kati dieno balembolo na ngolo mpe bê na bimbevo, mpe babingi bata fwa.* 31 Kâ tala ti tutomono titaluzula, ka batufundisa ko. 32 Kâ bu batufundisaka, ni Yehova* tu sembaka, ngatu balembo tu zengela mambu ha timosi na nza. 33 Dieka bo mpangi zani, bu lukutakanaka mu dia yo, kêlasanakeno beno na beno. 34 Tala ti muntu nsatu ye nandi, kadia ku nzo’andi, ngatu bu lukutakana ka yibândi ntangu ya mfundusu. Kâ mu wo wutariri misamu miakaka, mbo niyirika mio bu nikwiza kô.