Marke

15 Mu nkatika pari, mfumu za banganga-nzambi, bakuluntu na bitsoniki, wuzololo tâ Sanedre yayansoni, bavukana, bakanga Yezu misinga, bamunata mpe bamuhana ha moko ma Pilate. 2 Buna Pilate wamuyula tiyuvu: “Ngano nge ni Mutinu wa Bayuda?” Yandi wamuvuturila: “Nge beni ta wa tâ.” 3 Kâ mfumu za banganga-nzambi misamu miamingi beri mu kwikisilaka. 4 Buna Pilate wavutu batika mu mu yula, bu katâ: “Kuta tâ musamu ko? Tala misamu miamiansoni mi bata ku kwikisila.” 5 Kâ Yezu ka vutu’â hana mvutu ko, buna Pilate watomo yituku.

6 Mu malaki mamansoni, Pilate tifu tiabâ nandi tia yambula muntu wumosi weri ku boloko, wu beri sôlaka kwe bantu. 7 Mu ntangu yîna muntu wumosi wu beri tâka nkumbu Barabase wabâ ku boloko na bimpumbulu biakaka biahonda muntu bu beri saka vwandi. 8 Buna pôka dia bantu diapusana mpe diabatika mu lomba kwe Pilate mu sa buna bu keri toko saka mu bungu dia bawu. 9 Buna wabavuturila: “Ngano luzololo naluyamburila Mutinu wa Bayuda?” 10 Mu bungu ti Pilate wazaba ti timbanda kwa tiatuma mfumu za banganga-nzambi mu mu hana ha moko mandi. 11 Kâ mfumu za banganga-nzambi zasa tiya kwe pôka dia bantu mu lomba bayambula Barabase. 12 Pilate wavutu ba têla: “Buna nti nisa kwe wô wulutâka Mutinu wa Bayuda?” 13 Bavutu kawula: “Mu tûla ha poto!”* 14 Kâ Pilate wabatêla: “Mu bungu dia nti? Ntia musamu wa mbi kayirikiri?” Batomo vutu kawula mu ngolo: “Mu tûla ha poto!”* 15 Dieka bo, mu bungu ti Pilate wadinga mu tâ pôka dia bantu nsayi, wabayamburila Barabase, mpe bu kamana lomba bawinda Yezu bisikoti, wabîka bamukanga ha poto.

16 Ha manima, binwani biamunata ku lupangu, wuzololo tâ mu nzo ya guvernere, mpe bakutakasa mukangu wawansoni wa binwani. 17 Bamulwika tinkuti tia mbwaki ya ngolo, bayirika mpu ya nsende mpe bamulwika yo; 18 ha manima babatika mu tâ mu ngolo: “Mbote, nge Mutinu wa Bayuda!” 19 Dieka bo babatika mu mu twa ku mutu mu titîti tia rozo mpe bamuloborela mante. Ha manima bafukama mpe bakondama ha matu mandi. 20 Ku nsuka, bu bamana mu sehesela, bamukatula tinkuti tia mbwaki ya ngolo. Bamulwika binkuti biandi bia zulu, mpe bamunata ngatu bamukoma ha poto. 21 Mpe batuma mu ngolo muntu wumosi weri yôkaka, Simo Musi-Sirene, watûka ku misitu, tata dia Alekisandere na Rufuse, mu nata poto diandi dia matimuna.*

22 Buna bamunata ku mbuka yi beri tâka Golgota, tala ti babanguri yo yizololo tâ, “Mbuka ya tihisi tia mutu.” 23 Kûna badinga mu mu hana vinu di bavukasa na mire yibakaka, kâ wakala mu nwa dio. 24 Bamukoma ha poto mpe bakabana binkuti biandi bu babula madzeke mu zaba nani waketi bonga tinkuti eti peleko etio. 25 Kampe 9 heure ya pari yabâ bu bamukoma ha poto. 26 Mpe batsoneka musamu wu bamufundisila: “Mutinu wa Bayuda.” 27 Mpe batûla mivi miole ha poto ha lweka lwandi, wumosi ku lubakala wakaka ku lukento lwandi. 28* —— 29 Bantu beri yôkaka finga beri mu fingaka bu beri ningasaka mitu, mpe bu beri tâka: “Ha! Nge waketi mwangasa tempelo mpe waketi ya tunga mu bilumbu bitatu, 30 tivûkisa nge beni bu kôka ha poto dia matimuna.”* 31 Mpila mosi mpe, mfumu za banganga-nzambi na bitsoniki sehesela beri mu seheselaka bu beri tâka: “Wavûkisa bakaka, kâ ka lendi’â kativûkisa ko! 32 Bîka ti Kristo, Mutinu wa Israele, kakôka ha poto dia matimuna,* ngatu tamona mpe takwikila.” Mpila mosi mpe, bô ba bakoma ha mapoto ha lweka lwandi yandi beri fingaka.

33 Tûka ku ba 12 heure tii ku ba 15 heure, kwayizi bâ mpimpa ya ngolo mu nsi ya mukaka. 34 Ku ba 15 heure, Yezu wakawula mu ngolo: “Eli, Eli, lama sabaktani?” tala ti babanguri wo, wuzololo tâ, “Nzambi’ani, Nzambi’ani, mu bungu dia nti kundiambirikiri?” 35 Mpe bantu bakaka batelama pene-pene na yandi bu bawâ bo, babatika mu tâ: “Taleno! Eliya kata tâ mbila.” 36 Buna muntu wadioka, wavwika taba mu vinu dia nsa, wakwika dio ha zulu titîti tia rozo, wamuhana ngatu kanwa, mpe watâ: “Kêleno! Tatala tala ti Eliya mbo kakwizi mu kôkesa.” 37 Kâ Yezu wakawula mu ngolo, mpe wafwa.* 38 Mpe rido ya ku mbuka ya santu yatendoka ha kati-kati, tûka ku zulu tii ku banda. 39 Mfumu ya binwani yatelama ha matu mandi, bu yamona misamu miayôka bu kafwa, watâ: “Diangana, muntu wu Mwana wa Nzambi wubêle.”

40 Bakento mpe batelama hâna beri talaka ha titini tia mwa mala. Ha kati diawu mweri na Maria Magdala, Maria nguri ya Zaki wa nguria wa fioti* na Yoze, mpe na Salome, 41 beri vulu kwe mu landi na beri mu sarilaka bu keri ku Galile, na bakento bakaka babingi banaka na yandi ku Yerusaleme.

42 Mu bungu ti bwisi bwatiyirila mpe Tilumbu ti bakubamaka tiabâ, wuzololo tâ tilumbu ntete Sabala, 43 Yozefe dia ku Arimate wayiza, muntu wumosi wa nsangu weri ku tribinale ya yinene ya Bayuda, Timfumu tia Nzambi mpe keri kêlaka. Wabaka butindi mpe wayenda ha matu ma Pilate mu lomba mvumbi ya Yezu. 44 Kâ Pilate watiyula tala ti watifwila, buna watikisa mfumu ya binwani mu mu yula tala ti Yezu wafwa. 45 Buna, mu bungu ti mfumu ya binwani yamutêla ti wafwa, wahana nzila kwe Yozefe mu nata mvumbi ya Yezu. 46 Bu kamana sumba mulele wa line wa toma, mpe bu kamana kôkesa mvumbi ya Yezu, Yozefe wazinga yo mu mulele wa line wa toma mpe watûla yo mu mpiema yi batima mu tari. Ha manima wavindumuna tari ha mwelo wa mpiema. 47 Kâ Maria Magdala na Maria nguri ya Yoze batatamana mu tala mbuka yi batûla Yezu.