Bisalu bia Bantumwa
23 Bu kasungamana Sanedre, Paulo watâ: “Babakala, bampangi, tii lumbu ti ha matu ma Nzambi nita kwe diatiri na ngindu ya nkatika ya tsema.” 2 Buna, mfumu-nganga-nzambi Ananiase watâ kwe bô batelama pene-pene na Paulo mu mu kamuna mbata mu munwa. 3 Ha manima Paulo wamutêla: “Nzambi mbo kakutwa, nge tibaka ti balenga mpemba. Bu zakale hô ni mu kumfundisa tintwari na Musiku, kâ mu ntangu yo kwa mpe, ngano Musiku ta vweza bu ta lomba bakuntwa?” 4 Bô batelama hâna batâ: “Nge mfumu-nganga-nzambi ya Nzambi ta finga?” 5 Mpe Paulo watâ: “Bampangi, ka mbele’â zabaka ko ti yandi ni mfumu-nganga-nzambi. Mu bungu ti watsonama ti, ‘Kufweti’â wazonzela bubi bwa mfumu ya kanda diaku ko.’”
6 Paulo bu kazaba ti bantu bakaka Basaduseye babâ, kâ bakaka Bafarize, wakawula mu Sanedre: “Babakala, bampangi, meno Farize yena, mwana wa Bafarize. Mu bungu dia tivuvu tia mvumbukulu ya ba fwa bata kumfundisila.” 7 Bu kamana tâ bo, Bafarize na Basaduseye ka beri’â vutu wisanaka ko, mpe timvuka tiamwangana. 8 Mu bungu ti Basaduseye ebu batâka ti ka kwena mvumbukulu ya ba fwa ko, ka kwena mbazi ko, mpe ka kwena mpeve ko, kâ Bafarize bima bio biabiansoni batambulaka.* 9 Buna vwandi dia dinene diatulumuka, mpe bitsoniki biakaka biabâ ku lweka lwa Bafarize biatelama mpe biabatika mu zonza na miangu mu mpila eyi: “Ka tubakiri’â musamu wa mbi ko kwe bakala di, kâ tala ti mpeve peleko mbazi yimuzonzele—.” 10 Kondo kwa tiwisa bu kwayizi bâ ngolo, komanda bunkuta bwamubaka ntia basebozola Paulo, mpe watuma binwani mu kôka ngatu babenda Paulo ha kati diawu, mpe bamunata ku lupangu lwa binwani.
11 Kâ mpimpa yalanda, Mfumu watelama pene-pene na yandi mpe watâ: “Bâ na butindi! Mu bungu ti mpila yi ta têla timbangi mu meno ku Yerusaleme, ni yo kwa mpe fweti têla timbangi ku Rome.”
12 Bwisi bu bwatia, Bayuda batâ mfundu, mpe badia ndefi ya lembo dia na ya lembo nwa tala ti ka bahondele’â Paulo ko. 13 Bantu yôka 40 batâ mfundu zo mpe badia ndefi yo. 14 Babakala bo baye monekena mfumu za banganga-nzambi na bakuluntu, mpe batâ: “Beto bansoni tuwisane mpe tudiri ndefi ya lembo dia na ya lembo nwa tala ti ka tuhondele’â Paulo ko. 15 Bwawu bu beno, tintwari na Sanedre, lufweti lomba kwe komanda kalukôkesela Paulo ntiana’eti beno luta dinga mu tomo taluzula musamu’andi. Kâ ntete katula pene-pene, mbo tubâ ba kubama mu mu honda.”
16 Kâ, mwana wa tibusi tia Paulo wawâ nsangu za mutambu wu beri dingaka mu mu tambila, wakota ku lupangu lwa binwani mpe watâ wo kwe Paulo. 17 Ha manima, Paulo watâ mbila mfumu ya binwani yimosi mpe wamutêla: “Nata ntwenia yi kwe komanda, mu bungu ti musamu wê nandi kamutêla.” 18 Buna wayenda na yandi, wamunata kwe komanda, mpe wamutêla: “Paulo wê mu boloko kuntêle mbila mpe kundombele mu nata ntwenia yi kwe nge, mu bungu ti musamu wê nandi kakutêla.” 19 Komanda wamubonga mu koko, wamunata ha bawu kaka mpe wamutêla: “Ntia musamu ta zolo kuntêla?” 20 Watâ: “Bayuda bawisane mu ku lomba wabakôkesela Paulo ku Sanedre mbazi, ntiana bawu bata dinga mu tomo taluzula musamu’andi. 21 Kâ, kubawîlandi, mu bungu ti bantu yôka 40 ha kati diawu bata kêla mu mu tambakasa, mpe ndefi badiri ya lembo dia na ya lembo nwa tala ti ka bamuhondele’â ko; bwawu bu ba kubama bena, mpe nge kwa bata kêla wabahana nzila.” 22 Buna komanda wabîka ntwenia yo yenda bu kamana mu têla: “Kutêlandi na kani muntu ti nsangu zo kungeni.”
23 Ha manima watâ mbila mfumu za binwani zole mpe wabatêla: “Kubikeno binwani 200, binwani 70 binataka shevale* na binwani 200 bisarilaka madionga mu kwenda ku Sezarea ku ba 9 heure ya nkokela. 24 Haneno mpe shevale* ku Paulo ngatu zamunata mpe katula bubote kwe guvernere Felikse.” 25 Mpe watsoneka misamu emi mu mukanda:
26 “Meno Klode Liziase nikutsonekene nge Mfumu, Guvernere Felikse: Mbote! 27 Bayuda bakengi bakala di mpe badingiri mu mu honda, kâ nayiziri mu ntinu na binwani biani mpe namuvûkisi, mu bungu ti nawîri ti Musi-Rome wena. 28 Mu dinga mu zaba musamu wu babele mu fundilaka, namuneti ku Sanedre’awu. 29 Nayizi bakula ti ni mu bungu dia misamu mitariri Musiku’awu babele mu fundilaka, kâ ka mu bungu dia musamu’â ko wulendi sa ti kafwa peleko bamutûla ku boloko. 30 Kâ mu bungu ti bayizi kunzabikisa mutambu wu bamutambiri, ntiangu nimutambikiri mu ntinu kwe nge mpe ndombele kwe bantu bata mu funda bizi bamufunda ha matu maku.”
31 Buna binwani bio babonga Paulo ntiana bu babalomba mpe bamunata mu mpimpa ku Antipatrise. 32 Tilumbu tialanda babîka binwani binataka shevale* mu kwenda na yandi, kâ bawu bakâla ku lupangu lwa binwani. 33 Binwani binataka shevale* bakota ku Sezarea, bahana mukanda kwe guvernere mpe bamunatina Paulo. 34 Buna watanga mukanda, wayula ntia tizunga katûka mpe wayizi zaba ti Musi-Silisi weri. 35 Watâ: “Mbo nitomo ku wirikila bu tula bantu bata ku funda.” Mpe walomba bamulunda mu nzo ya luyâlu ya Erode.