Bisalu bia Bantumwa
6 Mu bilumbu bîna, lutangu lwa milongoki bu lweri yikamaka, Bayuda beri zonzaka Greke babatika mu niunguta mu Bayuda beri zonzaka Ebre, mu bungu ti mifwiri miawu mia mikento beri lembo tomo kipaka bu beri kabaka bima bilumbu biabiansoni. 2 Buna bantumwa ba 12 batâ mbila milongoki miamingi mpe batâ: “Ka bwena bubote ko* ti tayambirika zu dia Nzambi mu kwe kaba bidia ha meza. 3 Buna, bampangi, sôleno babakala* 7 ha kati dieno bê na nkumbu ya mbote, ba fuluka mu mpeve na mu ndwenga, mpe mbo tubahana dema dio dia mfunu; 4 kâ beto mbo tutihana mu lusambulu na mu tisalu tia longesa zu dia Nzambi.” 5 Musamu wo watâ nsayi kwe babansoni, mpe basôla Etiene, bakala dia fuluka mu timinu na mu mpeve santu, mboko na Filipe, Prokore, Nikanore, Timone, Parmenase, na Nikola Musi-Antioshe watambula dibundu dia Bayuda. 6 Babanata kwe bantumwa, mpe bu bamana sambila, babatenseka moko.
7 Buna zu dia Nzambi diatatamana mu yangana mpe lutangu lwa milongoki lwayizi tomo kula ku Yerusaleme; nganga-nzambi zazingi zabatika mu tumamana timinu.
8 Kâ Etiene, wa fuluka mu bweso bwa Nzambi na mu ngolo, bimangu bia binene na bidimbu keri saka ha kati dia bantu. 9 Kâ babakala bakaka ba ku sinagoge ba beri tâka Bantu ba bakûla bayiza tintwari na Bisi-Sirene, Bisi-Alekisandri, na bantu bakaka ba ku Silisi, ba ku Azi ngatu badisikita na Etiene. 10 Kâ ka beri’â lenda ko mu telama ha matu ma ndwenga na mpeve yeri mu twarisaka bu keri zonzaka. 11 Buna, mu mansweki bawisa babakala mu tâ: “Yandi tawîri bu kabele fingaka Mose na Nzambi.” 12 Mpe basa ti bantu, bakuluntu na bitsoniki badasukila Etiene. Mbala mosi bayiza, bamubwila mu ngolo mpe bamunata ha matu ma Sanedre. 13 Banata mpe mbangi za bungungu, zatâ: “Bakala di ka dita bîka ko mu zonzela bubi bwa mbuka ya santu na bwa Musiku. 14 Mu tifwani, yandi tawîri bu kabele tâka ti Yezu dio, Musi-Nazarete, mbo kamwangasa mbuka yi mpe mbo kasobesa bikulu bia tu hana Mose.”
15 Mpe bantu babansoni bazakala mu Sanedre bu beri mu sungamanaka, bamona ti tidiri tiandi tiayizi bâ ntiana tidiri tia mbazi.