Like

20 Tilumbu timosi bu keri longesaka bantu mu tempelo, mpe bu keri samunaka nsangu za mbote, mfumu za banganga-nzambi, bitsoniki na bakuluntu bayiza, 2 mpe bamutêla: “Tu têla, ntia lutumu lwe naku mu yirika misamu mi? Peleko nani ku heni lutumu lwa yirika misamu mi?” 3 Wabavuturila: “Me mpe tiyuvu tie nani niluyula, mpe kuntêleno: 4 Bateme ya Za ngano ku zulu yatûka peleko kwe bantu? 5 Buna babatika mu tâ bawu na bawu: “Tala ti tutêle, ‘Ku zulu,’ mbo katâ ‘Buna mu bungu dia nti lwalembo mu kwikila?’ 6 Kâ tamana tâ, ‘Kwe bantu,’ bantu babansoni mbo batuwinda matari mu bungu ti lukwikulu lwe nawu ti Za mbikuri yeri.” 7 Buna bavutula ti ka bazaba ko kwe yatûka. 8 Yezu wabatêla: “Meno mpe ka nilutêla ko mu lutumu lwa nani nita yirikila misamu mi.”

9 Ha manima wabatika mu zonzela tifwani eti kwe bantu: “Bakala dimosi diakuna musitu wa vinu, wahana wo kwe bantu basalaka misitu ngatu bafutila wo, mpe waye yôkesa ntangu yayingi ku nsi ya bunzenza. 10 Ntangu bu yafwana, watambika ngamba’andi kwe bisari bia misitu ngatu bamuhana mbutu za musitu wa vinu. Kâ bisari bia misitu biamukarisa moko mpamba bu bamana mu twa. 11 Kâ wavutu tambika ngamba yakaka. Yandi mpe bamutwa, bamufwisa nsoni* mpe bamukarisa moko mpamba. 12 Wavutu tambika ngamba ya ntatu; yandi wo mpe bamulwekesa mpe bamulosa ku mbazi. 13 Buna mfumu ya musitu wa vinu watâ, ‘Nti mfweti sa? Mwana’ani wu ntomono zolo nitambika. Kampe mbo bamuzitisa.’ 14 Bisari bia misitu bu biamumona, biatâ bawu na bawu, ‘Muntu wubiarila fwa ewu ni yandi. Tamuhondeno ngatu fwa diabâ dia beto.’ 15 Buna bamulosa ku mbazi ya musitu wa vinu mpe bamuhonda. Ha manima, mfumu ya musitu wa vinu ngano nti kabasa? 16 Mbo kakwiza, mbo kahonda bisari bia misitu mpe mbo kahana musitu wa vinu kwe bantu bakaka.”

Bu bawâ bo batâ: “Kani kabwe musamu wa mpila yo ka wutulandi!” 17 Kâ Yezu wabatala ku bidiri mpe watâ: “Buna musamu ewu wu batsoneka bwe wuta zolo tâ: ‘Tari dia losa bitungi bia nzo diayikiri tari di sikamanaka nzo.’? 18 Muntu ni muntu wubwa ha zulu tari dio mbo katsalangana, mpe wô wu dibwila mbo katutuka.”

19 Bitsoniki na mfumu za banganga-nzambi badinga mu mu bwila hô nkatika bendo, kâ bantu beri tînaka, mu bungu ti babakula ti tifwani tio mu bungu dia bawu kahanina tio. 20 Bu bamana mu sungamana, bamutambikila babakala ba bakubika mu mansweki baketi moneka ntiana’eti ba sungama bena ngatu bamutambakasa mu nzonzolo’andi, mpe bamuhana ha moko ma bamfumu na kwe guvernere. 21 Mpe bamuyula tiyuvu eti: “Mulongi, tuzebi ti bubote zonzaka mpe longesaka, mpe kusongelaka tihambula ko, kâ nzila ya Nzambi longesaka na matieleka: 22 Ngano wa delakana wena kwe beto mu futa mpaku kwe Sezare peleko kâni?” 23 Kâ wabakula mutambu’awu mpe wabatêla: 24 “Kunsongeleno denie* yimosi. Tidiri ti na bitsono bi, bia nani biena?” Bavutula: “Bia Sezare.” 25 Wabatêla: “Dieka bo, kariseno bima bia Sezare kwe Sezare, kâ bima bia Nzambi kwe Nzambi.” 26 Buna ka balenda ko mu mu tambakasa mu nzonzolo’andi ha matu ma bantu, kâ bayituku mu mvutu’andi mpe bakuta.

27 Kâ, Basaduseye bakaka, bô batâka ti ka kwena mvumbukulu ya ba fwa ko, bayiza mpe bamuyula: 28 “Mulongi, Mose watutsonekena ti, ‘Tala ti bakala dia kwela difwiri kâ ka sisiri’â mwana ko, mpangi’andi fweti bonga mukento wo ngatu kabutila yaya’andi bala.’ 29 Kweri na mpangi 7 za bakala. Ya ntete wakwela mukento, kâ bu kafwa ka sa sisa bala ko. 30 Mpangi ya nzole 31 na ya ntatu bamukwela. Mpila mosi ba 7 babansoni; bafwa mpe ka basisa bala ko. 32 Ku nsuka mukento mpe wayizi fwa. 33 Buna ku mvumbukulu ya ba fwa, mukento wa nani wukwizi bâ? Mu bungu ti ba 7 bamukwela.”

34 Yezu wabatêla: “Bala ba nza yi* kwela bakwelaka mpe mu makwela babahanaka, 35 kâ bô ba bamona ti bafwanane mu bâ mu nza yikwiza na mu vumbuka kwe ba fwa, ka bakwela ko mpe ka babahana mu makwela ko. 36 Diangana ka bavutu’â fwa ko mpe, mu bungu ti ntiana mbazi babâ mpe mbo babâ bala ba Nzambi bu babâ bala ba mvumbukulu ya ba fwa. 37 Kâ bantu ba fwa mbo bavumbuka, Mose yandi beni wa kazabikisa mu tinsamu tia muti wa nsende bu katâ Yehova* ‘Nzambi ya Abrahame, Nzambi ya Izake na Nzambi ya Yakobe.’ 38 Kena Nzambi ya bantu ba fwa ko, kâ ya bantu ba moyo. Mu bungu ti kwe Yandi, babansoni ba moyo bena.” 39 Bitsoniki biakaka biamuvuturila: “Mulongi, bubote zonzele.” 40 Ka bavutu’â sâla na butindi ko bwa mu yula na kani tiyuvu timosi.

41 Buna wabayula: “Mu bungu dia nti batêlaka ti Kristo ni mwana Davide? 42 Mu bungu ti Davide yandi beni watâ mu buku dia Mikunga: ‘Yehova* têle kwe Mfumu’ani: “Zakala ku lubakala lwani 43 tii bu nitûla mbeni zaku ku nsi’a malu* maku.”’ 44 Dieka bo, Davide Mfumu kata mu tâ, buna bwe kalendi vutu bêla mwana’andi?”

45 Ha manima, bantu babansoni bu beri wirikilaka, watâ kwe milongoki miandi: 46 “Seno keba mu bitsoniki bazoloko mu kwe yakambe na robe zawu za zila, bazololo babahanaka mbote ha mazandu, mpe chaise za ntete bazoloko mu sinagoge na mbuka za nguria mfunu* bu badiaka ku malaki, 47 nzo* za mifwiri mia mikento bawukaka, mpe mu songela ti bawu ni bawu tusambulu twa tula basaka. Mbo babaka mfundusu ya ngolo.”*