Wa ntete kwe Bisi-Korente

16 Mu musamu wutariri kutakasa kwa makabu mu bungu dia basantu, landeno lutwalusu lu naheni kwe bimvuka bia Galate. 2 Tilumbu tia ntete tia tumingu twatwansoni, muna muntu mu beno fweti tûla tima ha ndeko tintwari na lubaku lwandi, ngatu bu nitula, ka babatikandi mu kutakasa makabu. 3 Kâ bu nitula kô, mbo nitambika babakala ba lusôla mu mikanda mieno, ngatu banata makabu meno ku Yerusaleme, makabu ma lusa mu mutima wa mbote. 4 Kâ, tala ti wumonekene ti meno mpe mfweti kwenda kô, mbo bakwenda na meno.

5 Kâ mbo nikwiza kwe beno bu nimana yôkela ku Masedwane, mu bungu ti mbo niyôkela ku Masedwane; 6 kampe mbo nitatamana mu bâ na beno, peleko mbo niyôkesa ntangu ya tiozi tia ngolo na beno, ngatu lwakunturisa mwa titini mu mbuka ni mbuka yi nikwenda. 7 Diangana, ka nita zolo ko ndizi nalutala kwa bu niyôkela kô, mu bungu ti nzololo nayôkesa mwa ntangu na beno, tala ti Yehova* heni nzila. 8 Kâ ku Efeze nitatamana mu bâ tii mu Malaki ma Pentekote, 9 mu bungu ti mwelo wa wunene bakunziburiri mu bungu dia tisalu, kâ mbeni zazingi zê kô.

10 Tala ti Timote turiri, seno ti ka kubândi tima ti katîna ha kati dieno, mu bungu ti tisalu tia Yehova* kata sala, ntiana meno. 11 Dieka bo, muntu ka mu vwezandi. Mu tambikeno mu tidzunu tiatiansoni, ngatu kiza kwe meno, mu bungu ti na bampangi nita mu kêla.

12 Mu musamu wutariri mpangi’eto Apolose, natomono mu sa tiya ngatu kiza kwe beno na bampangi, ka mabêle’â mabanza mandi ko mu kwiza bwawu bu, kâ mbo kakwiza buna kwa bu kabaka bweso.

13 Tatamaneno mu bâ na meso ma tia, bêno ba kangama mu timinu, bêno na butindi, bêno na ngolo. 14 Yirikeno misamu miamiansoni mu luzolo.

15 Bampangi, luzebi ti bantu ba mu nzo ya Stefanase ni milongoki mia ntete mia ku Akayi, mpe bayizi tihana mu sarila basantu. 16 Buna nilutindisi beno mpe, mu tatamana mu tumamana bantu ba mpila yo, na bô ba basalaka tintwari mpe basalaka tisalu tia ngolo. 17 Kâ ndiangalale bu ndiena na Stefanase, Fortune na Akayuse, mu bungu ti bayingane ha mbuka’eno bu lulembolo hâ. 18 Diangana bakundikiri ngolo, meno na beno mpe. Dieka bo, songelakeno ti babakala ba mpila yo lutondaka.

19 Bimvuka bia ku Azi bilutambikiri mbote. Akila na Priska tintwari na timvuka tikutakanaka ku nzo’awu, mu mutima wawansoni, balutambikiri mbote mu Mfumu. 20 Mpangi zazansoni mbote ziluheni. Hanasanakeno mbote mu bize ya santu.

21 Meno Paulo, niluheni mbote yi ntsonekene mu koko kwa me beni.

22 Tala ti muntu wê kô wulembo zoloko Mfumu, kabâ wa loko. Ô Mfumu’eto yiza! 23 Bîka ti bweso bwa nzitukulu bwa Mfumu Yezu bwabâ neno. 24 Bîka ti luzolo lwani lwabâ na beno bansoni mu bumosi na Kristo Yezu.