Wa ntete kwe Bisi-Korente
1 Paulo, wu batâ mbila mu bâ ntumwa ya Kristo Yezu mu luzolo lwa Nzambi na Sostene mpangi’eto. 2 Kwe timvuka tia Nzambi tie ku Korente, kwe beno ba basantukisi mu bumosi na Kristo Yezu, ba batêle mbila mu bâ basantu, tintwari na bô babansoni, kuma ni kuma ku bena, babingulaka nkumbu ya Mfumu’eto Yezu Kristo, wê Mfumu’awu na Mfumu’eto:
3 Bîka lwabaka bweso bwa nzitukulu na tidzunu bitûkaka kwe Nzambi Tata’eto na kwe Mfumu Yezu Kristo.
4 Ntangu zazansoni Nzambi’ani nitondaka mu bungu dia beno mu bweso bwa nzitukulu bu kaluhana mu Kristo Yezu; 5 mu bungu ti mu miamiansoni, lwayizi vwama mu yandi, lwayizi fuluka mu lenda dia zonza na mu luzabu, 6 ntiana kwa timbangi titariri Kristo tiayizi tomo sikama ha kati dieno. 7 Ngatu lwalembo kondo na kani kabu, bu luta kêla na timina ntangu yi moneka ngolo za Mfumu’eto Yezu Kristo. 8 Mbo kaluyika ngolo tii ku nsuka, ngatu ka kubândi na kani musamu wu balufundila mu tilumbu tia Mfumu’eto Yezu Kristo. 9 Nzambi wa kwikama wena, Yandi walutâ mbila mu bâ tintwari na Mwana’andi Yezu Kristo, Mfumu’eto.
10 Bwawu bu bampangi, nilutindisi mu nkumbu ya Mfumu’eto Yezu Kristo ti beno bansoni lufweti bâ na nzonzolo yimosi mpe ka lufweti’â lwabâ na tihambula ko ha kati dieno, kâ lufweti tomo bâ mu bumosi na mabanza mamosi, mpe na mpila yimosi ya mwina misamu. 11 Mu bungu ti bantu bakaka ba mu nzo ya Klowe bakungeni nsangu zilutariri ti bakana luta kwe bakane, beno mpangi zani. 12 Musamu wu nita zolo tâ ni ewu, muna muntu mu beno ebu kata tâ: “Meno Paulo kumvwiri,” “Kâ meno Apolose,” “Kâ meno Sefase,”* “Kâ meno Kristo.” 13 Ngano Kristo wa kabana wena? Paulo ka bamutûla ha poto ko mu bungu dia beno, ka buna ko? Peleko ngano mu nkumbu ya Paulo lwabatusu? 14 Nzambi nita tonda bu nalembo batisa na kani wumosi mu beno, diambu’eti Krispuse na Gayuse, 15 buna ka kwena muntu ko wulendi tâ ti mu nkumbu ya meno kabatusu. 16 Wa matieleka, nabatisa mpe bantu ba mu nzo ya Stefanase. Mu bô basiri, ka nzebi’â ko tala ti muntu wakaka nabatisa. 17 Mu bungu ti Kristo wakuntambika, ka mu batisa ko, kâ mu samuna nsangu za mbote; mpe ka mu ndwenga za zonzela ko, ngatu poto dia matimuna* dia Kristo ka diabândi tima tilembolo salu.
18 Mu bungu ti nzonzolo ya poto dia matimuna* buzoba bwena kwe bô bata kwenda ku mfukulu, kâ kwe beto ba bata vûkisa, ngolo za Nzambi zena. 19 Mu bungu ti watsonama: “Mbo nifukisa ndwenga za bantu ba ndwenga, mpe mbo nilosa* mayela ma bantu bê na mayela.” 20 Ngano muntu wa ndwenga kwe wena? Ngano titsoniki* kwe tiena? Ngano muntu wa ntembe mu nza yi* kwe wena? Ngano ka Nzambi’â ko saka ti ndwenga za nza zabâ buzoba? 21 Diangana, mu ndwenga zandi, nza ka yayizi’â zaba Nzambi ko. Nzambi, mu ndwenga zandi, wayizi yangalala mu buzoba bwa tima ti tuta samuna mu vûkisa bô bakwikilaka.
22 Mu bungu ti Bayuda bidimbu balombaka, mpe Bagreke ndwenga badingaka; 23 kâ Kristo wu bakanga ha poto tusamunaka, kwe Bayuda tima titêsaka kuba tiena, kâ kwe makanda buzoba bwena. 24 Kâ, kwe bô ba batâ mbila, ni bu babâ Bayuda peleko Bagreke, Kristo ni ngolo za Nzambi na ndwenga za Nzambi. 25 Mu bungu ti tima tia buzoba tia Nzambi tiyôkele bantu mu ndwenga, mpe tima tilembolo na ngolo tia Nzambi tiyôkele bantu mu ngolo.
26 Mu bungu ti bampangi, beno beni wa luta mona ti Nzambi bu kalutâ mbila ka kwabâ bantu babingi ko babâ na ndwenga mu tinsuni,* ka kwabâ bantu babingi ko ba ngolo, ka kwabâ bantu babingi ko batûka mu makanda ma mfunu, 27 kâ Nzambi wasôla bima bia buzoba bia nza mu fwisa bima bia ndwenga nsoni; mpe Nzambi wasôla bima bilembolo ngolo bia nza mu fwisa bima bia ngolo nsoni; 28 mpe Nzambi wasôla bima bia mpamba-mpamba bia mu nza na bima bi bavwezaka, bima bilembolo mfunu, mu sa ti bima bia mfunu biabâ bima bia mpamba-mpamba, 29 ngatu ka kubândi muntu wutilwona ha meso ma Nzambi. 30 Kâ ni mu Yandi lwayizi bâ mu bumosi na Kristo Yezu, yandi wayizi bâ kwe beto ndwenga za Nzambi, buderede, nzila yi batusantukisila na timpwanza mu nzila ya nkûlulu, 31 ngatu wabâ ntiana bu watsonama: “Wô ta tilwona, katilwona mu Yehova.”*