Za
20 Mu tilumbu tia ntete tia lumingu, Maria Magdala wayiza ku mpiema mu nkatika pari, mpimpa kwa yabâ kô, mpe wamona ti tari dia batikaturila ha mpiema. 2 Buna wadioka ntinu kwe Simo Piere na kwe mulongoki wakaka, wô Yezu wu keri tomo zoloko, mpe wabatêla: “Bakaturi Mfumu mu mpiema, mpe ka tuzebi’â ko kwe bamutûriri.”
3 Buna Piere na mulongoki wakaka bayenda ku mpiema. 4 Ba bole babatika mu dioka, kâ mulongoki wakaka wayôka Piere mu ntinu mpe watula wa ntete ku mpiema. 5 Bu kakondama mu tala mu kati, wamona bitenda bia line biabâ mô, kâ ka kota ko. 6 Ha manima, Simo Piere mpe weri mu landaka watula, mpe wakota mu mpiema. Wamona bitenda bia line biabâ mô. 7 Titenda tiabâ ku mutu wa Yezu ka tiabâ ha mbuka yimosi ko na bitenda biakaka, kâ tia zingama tiabâ ha mbuka yakaka. 8 Buna mulongoki wakaka, wô watula wa ntete ku mpiema, yandi mpe wakota, wamona mpe wakwikila. 9 Mu bungu ti ka beri’â toko bakulaka matsonoko ko matâ ti wafweti vumbuka kwe ba fwa. 10 Buna milongoki miakâla ku nzo zawu.
11 Kâ Maria ku mbazi katelama pene-pene na mpiema, mpe dila keri dilaka. Bu keri dilaka, wakondama mu tala mu mpiema, 12 mpe wamona mbazi zole zalwata binkuti bia mpembe, zazakala ha mbuka yabâ mvumbi ya Yezu, wumosi ku mutu wakaka ku malu. 13 Mpe bamutêla: “Mukento, mu bungu dia nti ta dirila?” Wabatêla: “Bakaturi Mfumu’ani, mpe ka nzebi’â ko kwe bamutûriri.” 14 Bu kamana tâ bo, wabaluka mpe wamona Yezu watelama hâna, kâ ka bakula ko ti Yezu wabâ. 15 Yezu wamutêla: “Mukento, mu bungu dia nti ta dirila? Nani ta dinga?” Mu bungu ti ebu keri banzaka ti tisari tia nsaba tiabâ, wamutêla: “Mfumu, tala ti ni nge mu katuri, kuntêla kwe mu tûriri, mpe mbo nimubonga.” 16 Yezu wamutêla: “Maria!” Bu kabaluka, wamutêla mu Ebre: “Rabuni!” (wuzololo tâ “Mulongi!”) 17 Yezu wamutêla: “Bîka mu kunzatirila, mu bungu ti ka ndieka’eti naka ko kwe Tata. Kâ yenda kwe mpangi zani mpe ba têla ti, ‘Kwe Tata’ani nita naka die Tata’eno mpe, mpe kwe Nzambi’ani ye Nzambi’eno mpe.’” 18 Maria Magdala waye tâ nsangu kwe milongoki: “Mweni Mfumu!” Mpe wabatêla misamu mi kamutêla.
19 Ntangu bu yapusana mu tilumbu tio tia ntete tia lumingu, mpe mielo mia mbuka yabâ milongoki bu miabâ mia kangama mu bungu ti bunkuta bwa Bayuda bwabâ nawu, Yezu wayiza mpe watelama ha kati diawu, mpe wabatêla: “Bêno na tidzunu.” 20 Bu kamana tâ bo, wabasongela moko mandi na lubanzi lwandi. Buna milongoki nsayi yababaka bu bamona Mfumu. 21 Yezu wavutu ba têla: “Bêno na tidzunu. Ntiana kwa Tata bu kakuntambika, meno mpe tambika nita lu tambika.” 22 Bu kamana tâ bo, wabafula mwela mpe wabatêla: “Bakeno mpeve santu. 23 Tala ti lulemvokele masumu ma muntu, bamulemvokele mo, tala ti ka lulemvokele’â masumu ma muntu ko, ka bamulemvokele’â mo ko.”
24 Kâ Toma, wumosi mu ba 12, wu beri tâka Dipasa, ka bâ na bawu ko Yezu bu kayiza. 25 Buna milongoki miakaka miamutêla: “Mfumu yandi tumweni!” Kâ wabatêla: “Tala ti ka mweni’â bidimbu bia nsonso mu moko mandi ko, tala ti ka ntsokote’â mulembo’ani mu bidimbu bia nsonso ko, mpe tala ti ka ntûriri’â koko kwani mu lubanzi lwandi ko, kani kabwe ka nikwikila wo ko.”
26 Bilumbu 8 ha manima, milongoki miavutu bâ mu kati dia nzo, mpe Toma na bawu keri. Yezu wayiza, ni bu sa ti mielo mia kangama miabâ, watelama ha kati diawu mpe watâ: “Bêno na tidzunu.” 27 Ha manima watâ kwe Toma: “Tûla mulembo’aku eha, mpe tala moko mani, mpe bonga koko kwaku tûla ko mu lubanzi lwani, mpe bîka mu sa ntembe, kâ kwikila.” 28 Toma wamuvuturila: “Mfumu’ani mpe Nzambi’ani!” 29 Yezu wamutêla: “Mu bungu ti ku mweni, kwikiri? Nsayi kwe bô balembolo mona kâ bakwikiri.”
30 Diangana, Yezu wasa mpe bimangu biabingi biakaka ha matu ma milongoki, bilembolo bia tsonama mu rulo yi. 31 Kâ misamu mi batsonekene mio, ngatu lwakwikila ti Yezu ni Kristo, Mwana wa Nzambi, mpe lwabaka luzingu mu nzila ya nkumbu’andi mu bungu ti kwikila lukwikilaka.