Za

7 Ha manima ma misamu mio, Yezu watatamana mu kwe yende mu Galile yayansoni, diangana ka zolo’â ko mu sila bo ku Yude mu bungu ti Bayuda yandi beri kwe dingi mu mu honda. 2 Kâ, malaki ma Bayuda ma Tabernakle* pene-pene mabâ. 3 Buna mpangi zandi zamutêla: “Katuka kû, mpe yenda ku Yude, ngatu milongoki miaku miamona mpe bisalu bi ta sala. 4 Mu bungu ti ka kwena muntu ko sarilaka mu mansweki tala ti zololo kazabakana. Tala ti misamu mio ta kwe yiriki tisongela mu nza.” 5 Diangana mpangi zandi ka zeri’â sarilaka timinu mu yandi ko. 6 Buna Yezu wabatêla: “Ntangu’ani ka yeka’eti tula ko, kâ mu bungu dia beno ntangu yayansoni ntangu ya mbote yena. 7 Nza ka yena na musamu ko wu yiluyinina, kâ meno yiyinaka, mu bungu ti timbangi nitâka mu bungu dia bisalu biandi bia mbi. 8 Beno nakeno ku malaki; meno ka nitoko’â naka ko mu bungu ti ntangu’ani ka yeka’eti tomo lunga ko.” 9 Bu kamana ba têla misamu mio, wasâla ku Galile.

10 Kâ mpangi zandi bu zanaka ku malaki, yandi mpe wanaka, ka ha lungiri bantu’â ko kâ mu mansweki. 11 Buna Bayuda babatika mu mu dinga ku malaki mpe batâ: “Bakala dio kwe kena?” 12 Ha kati dia pôka dia bantu, yandi beri zonzelaka mu zu dia malembe. Bakaka ebu beri tâka: “Muntu wa mbote wena.” Bakaka: “Kena wa mbote ko. Pôka dia bantu kahunaka.” 13 Kâ, muntu kani weri mu zonzelaka ha lungiri bantu mu bungu ti bunkuta bwa Bayuda bwabâ nawu.

14 Malaki bu matula ha kati-kati, Yezu wanaka ku tempelo mpe wabatika mu longesa. 15 Bayuda bayituku bu batâ: “Muntu wu kwe kabakiriri luzabu lwa Matsonoko lwa mpila yi, yandi ka se lukolo?”* 16 Buna Yezu wabavuturila: “Misamu mi nita longesa ka miena mia meno ko, kâ mia wô wakuntambika. 17 Tala ti muntu wuzololo mu sa luzolo lwandi, mbo kazaba tala ti ndongosolo kwe Nzambi yitûkiri peleko tala ti misamu mi nita tâ kwe me beni mitûkiri. 18 Wô ta zonzela misamu mitûkiri kwe yandi beni, mukembo’andi kata dinga; kâ wô dingaka mukembo wa wô wamutambika, yandi wo matieleka katâka mpe kena na kondo kwa buderede ko mu yandi. 19 Mose waluhana Musiku, ka buna ko? Kâ ka kwena muntu ko ha kati dieno tumamanaka Musiku. Mu bungu dia nti luta dingila mu kungonda?” 20 Pôka dia bantu diamuvuturila: “Demo ye naku. Nani ta dinga mu ku honda?” 21 Yezu wabavuturila: “Musamu wumosi kwa nayirikiri, mpe beno bansoni lweka yituku. 22 Ntiangu Mose kaluhana musiku wa zenga sutu—ka wena ko ti kwe Mose watûka, kâ kwe nkaka zeno—mpe beno muntu luzengaka sutu mu tilumbu tia sabala. 23 Tala ti muntu luzengaka sutu mu tilumbu tia sabala mu zitisa Musiku wa Mose, mu bungu dia nti luta kumbakila nkesi bu ntomono wasisa muntu mu tilumbu tia sabala? 24 Bîkeno mu fundisa mu misamu mimonekaka, kâ fundiseno mu mfundusu ya buderede.”

25 Buna bantu bakaka ba ku Yerusaleme babatika mu tâ: “Ngano muntu wu bata dinga mu honda ka yandi’â ko? 26 Kâ taleno! Ha meso ma bantu babîngi kata zonza, mpe ka bata mu sa tima ko. Ngano bamfumu bakwikiri kwa ti yandi ni Kristo? 27 Tuzebi bakala di kwe katûkiri; kâ Kristo bu kakwiza ka kwena muntu ko wuzaba mbuka yi katûka.” 28 Yezu bu keri longesaka mu tempelo, watâ mu zu dia ngolo: “Meno luzebi mpe mbuka yi natûka ya luzebi. Mpe ka nayiza mu lutumu lwa me beni ko, kâ Wô wakuntambika wa matieleka wena, mpe ka lumuzebi’â ko. 29 Meno yandi nzebi, mu bungu ti timonikisi tiandi ndiena, mpe ni Yandi wakuntambika.” 30 Buna babatika mu dinga mu mu bwila, kâ na kani muntu walambula koko mu mu simba mu bungu ti ntangu’andi ka yatiturila ko. 31 Kâ bantu babingi mu pôka dia bantu bayizi bâ na timinu mu yandi, mpe ebu beri tâka: “Kristo bu kakwiza, ngano mbo kayirika bimangu biyôka bio bi ta yirika muntu wu?”

32 Bafarize bawâ pôka dia bantu beri tâka misamu mio mu malembe mu yandi, mpe mfumu za banganga-nzambi na Bafarize batambika binwani mu mu bwila.* 33 Buna Yezu watâ: “Ntangu fioti nibâ na beno ntete ndienda kwe Wô wakuntambika. 34 Mbo lukundinga, kâ ka lukumbaka ko, mpe mbuka yi nibâ, beno ka lulendi’â kwa kwiza ko.” 35 Bayuda batâ bawu na bawu: “Muntu wu kwe kata zolo kwenda ku tulembo mu bakila? Ngano kwe Bayuda bayalangane kwe Bagreke kata zolo kwenda, mpe Bagreke kata zolo kwe longesa? 36 Bwe kata zolo tâ bu kata tâ, ‘Mbo lukundinga, kâ ka lukumbaka ko, mpe mbuka yi nibâ beno ka lulendi’â kwa kwiza ko’?”

37 Tilumbu tia mansukina, tilumbu tia tinene tia malaki, Yezu watelama mpe watâ mu zu dia ngolo: “Tala ti muntu nsatu mamba ye nandi, kiza kwe meno mpe kanwa. 38 Muntu wutûla timinu mu meno, ntiana bu tâka matsonoko: ‘Nzari za mamba ma luzingu mbo ziduka mu yandi.’” 39 Kâ watâ bo mu bungu dia mpeve ya keti baka bô beri na timinu mu yandi; diangana ka kwatoko’â bâ mpeve ko mu bungu ti Yezu ka toko’â tibakila mukembo ko. 40 Bantu bakaka ha kati dia pôka dia bantu bawâ misamu mio, babatika mu tâ: “Wa matieleka muntu wu ni Mbikuri.” 41 Bakaka ebu beri tâka: “Yandi ni Kristo.” Kâ bakaka: “Ngano Kristo ku Galile kaketi tûka? 42 Ngano matsonoko ka matâka ko ti Kristo mu bala ba Davide kaketi dukila na ku Beteleyeme hata dia Davide?” 43 Buna bantu ka beri’â vutu wisanaka ko mu bungu dia yandi. 44 Bakaka mu bawu badinga mu mu bwila* kâ na kani muntu walambula koko mu mu simba.

45 Buna binwani bu biakâla, mfumu za banganga-nzambi na Bafarize babayula: “Mu bungu dia nti lulembolo mu natina?” 46 Binwani biabavuturila: “Kani kabwe ka kwena muntu ko weka zonzela mu mpila yo.” 47 Bafarize babavuturila: “Beno mpe, beno kahunini? 48 Mu bamfumu na mu Bafarize ka kwena muntu ko wê na timinu mu yandi, ka buna ko? 49 Kâ pôka dia bantu dio dilembolo zaba Musiku dia loko diena.” 50 Nikodeme, waye toko tala Yezu, mpe wabâ mosi mu bawu wabatêla: 51 “Musiku’eto ka wutoko’â zengelaka muntu mambu ko ntete kamuwâ mpe kazaba misamu mi kayirikiri, ka buna ko?” 52 Bawu bamuvuturila: “Ngano nge mpe Musi-Galile wena? Dinga mu zaba, kambo kumona ko ti ku Galile ka kulendi’â kwa duka mbikuri ko.”*