Marke

4 Wavutu batika mu longesa ha ndeko mubu, mpe yungi dia bantu diakutakana pene-pene na yandi. Buna wanaka mu bato mpe wazakala mwa mala na ndeko ya mubu, kâ pôka dia bantu diabâ pene-pene ha ndeko mubu. 2 Mpe wabatika mu ba longesa misamu miamingi mu nzila ya bifwani, mpe bu keri longesaka wabatêla: 3 “Wirikileno. Tala! Muntu wukunaka wudukiri mu kuna. 4 Bu kata kwe kuni, mbutu zakaka zibwiri ha ndeko nzila, nuni ziziri mpe zidiri zo. 5 Mbutu zakaka zibwiri ha matari, ha mbuka yilembolo mutoto wawingi, zikululu mena mu bungu ti mutoto ka wena wawingi ko. 6 Kâ, mwini bu wutêkele, miturila milengele mpe miyumini mu bungu ti ka miena na midza ko. 7 Mbutu zakaka zibwiri ha kati dia nsende, mpe nsende bu zikuriri zifietakase zo, mpe ka zibutiri’â mbutu ko. 8 Kâ mbutu zakaka zibwiri ha mutoto wa mbote, zimenene, zikuriri mpe zibatikiri mu buta mbutu, yimosi yibutiri mbutu 30, yakaka 60, mboko yakaka yôka 100.” 9 Mpe wavutu tâ: “Bîka ti wô wê na makutu mu wâ, kawâ.”

10 Bu babâ ha bawu kaka, milongoki miakaka na ba 12 babatika mu mu yula biyuvu mu bifwani bi kahana. 11 Wabatêla: “Beno mansweki ma santu ma Timfumu tia Nzambi baluzabikisi, kâ mu bungu dia bô bê ku mbazi misamu miamiansoni bifwani kwa biena, 12 mu bungu ti ni bu sa ti tala batalaka, ka bamonaka ko mpe wâ bawâka kâ ka babakulaka nsasa ko. Ntiangu, kani kabwe ka bakâla kwe Nzambi ko mpe ka babaka mulemvo wa masumu ko.” 13 Wavutu ba têla: “Ka luzebi’â tifwani ti ko, buna bwe lubakurila bifwani biabiansoni biakaka?

14 “Muntu wukunaka wukunini zu. 15 Bantu bê kô bê mu nzila yi bakunini zu; kâ buna kwa bu bawîri dio, Satana wiziri mpe katuri zu di bakunini mu bawu. 16 Mpila mosi mpe, mbutu zê kô zi bakunini ha mutoto wê na matari. Kâ buna kwa bu bawâ zu, batamburi dio na nsayi. 17 Kâ ka bena na midza ko mu bawu. Mwa ntangu basikamaka, kâ bu tulaka mpasi na nkwamusu mu bungu dia zu, batêle kuba. 18 Kwe na mbutu zakaka zi bakunini ha kati dia nsende. Ni bô bawîri zu, 19 kâ maniongo ma nza* yi, ngolo zê na bimvwama mu wubakasa, na nsatu za mpila na mpila bibayabamane, bifietakase zu mpe bisiri ti balembo buta mbutu. 20 Ku nsuka, zo zi bakunini ha mutoto wa mbote ni bô bawâka zu, batambulaka dio na nsayi mpe babutaka mbutu 30, 60 mpe yôka 100.”

21 Wavutu ba têla: “Ka banataka mwinda ko mu tûla wo ku nsi’a titunga peleko ku nsi’a mfulu, ka buna ko? Ngano ka banataka wo ko mu tûla wo ha zulu titûlulu tia mwinda? 22 Mu bungu ti ka kwena tima tia swekama ko tilembo kwizi moneka, mpe ka kwena tima ti batomo sweka ko tilembo kwizi zabakana. 23 Wô wê na makutu mu wâ, bîka kawâ.”

24 Wavutu ba têla: “Seno keba mu misamu mi luwâka. Tidezolo ti lusarilaka mu deza, ni tio kwa mpe basarila mu lu deza. Yee, mbo baluyikila mpe bia yôka. 25 Mu bungu ti wô têkele na tima, mbo bamuyikila tima; kâ wô lembolo na tima, banza tio tie nandi mbo bamukatula tio.”

26 Buna wavutu tâ: “Timfumu tia Nzambi tie ntiana bu mwangaka muntu mbutu ha mutoto. 27 Mu mpimpa sekele mpe mu pari vumbukiri. Mbutu zimenene mpe zikuriri, kâ yandi ka zebi’â ko bwe wuyilamane. 28 Mutoto wawu beni wumenesaka mbutu malembe-malembe. Ntete muturila wudukaka, ha manima muturila wubatikiri mu dukisa mbutu mpe ku nsuka mbutu yitomono yela. 29 Mbutu bu ziyelele, zengele zo na mbele, mu bungu ti ntangu ya tia mbutu yifweni.”

30 Wavutu yika: “Na nti tulendi fwanakasa Timfumu tia Nzambi, peleko ntia tifwani tulendi sarila mu bangula tio? 31 Tie ntiana mbutu ya mutarde. Mu ntangu yi bakunaka yo, mbutu yibâka ya nguria ya fioti mu mbutu zazansoni zê ha mutoto. 32 Kâ buna kwa bu bakunaka yo, yikuriri, yiyôkele ndunda zazansoni mu bunene mpe bintala bia binene yidukisaka, ntiangu nuni za mazulu zilendi kwizi swamina ku mpeho’andi.”

33 Yezu bifwani biabingi bia mpila yo keri sarilaka mu ba zonzela Zu dia Nzambi mu mpila yi balendi dia bakurila. 34 Diangana bu keri ba zonzelaka, ntangu zazansoni bifwani keri sarilaka, kâ bu beri ha bawu kaka, miamiansoni keri bangulaka kwe milongoki miandi.

35 Tilumbu tîna, nkokela bu yatula, wabatêla: “Tasabukeno ku simu diakaka.” 36 Bu bamana karisa pôka dia bantu, bamunata mu bato ntiana kwa bu kabâ, mpe bato zazingi zeri pene-pene na bato yo yi kabâ. 37 Buna titembo tia ngolo tiabatika mu pûpa, matuma* mu bato meri botanaka mpe bato yabatika mu fuluka mu mamba. 38 Kâ yandi ku manima kabâ, tolo keri bwaka ha zulu kuse. Buna baye mu vumbula mpe bamutêla: “Mulongi, ntamana mbo tufwa, ka wuta ku sa tima ko?” 39 Buna watelama, wabamina titembo mpe watêla mubu: “Bîka lwaza! Kuta!” Titembo tialembama mpe kwayizi bâ tidzunu tia ngolo. 40 Buna wabatêla: “Mu bungu dia nti lwe na bunkuta? Ka lweka’eti bâ na timinu ko?” 41 Kâ bunkuta bwa nzitukulu bwababaka mpe ni batâ bawu na bawu: “Muntu wu nani wena? Mu bungu ti titembo na mubu yandi mpe bita tumamana.”