Matie

11 Yezu bu kamanisa mu hana ntumunu kwe milongoki miandi mia 12, wakatuka kô mu kwe longesa na mu samuna ku mimvuka miawu.

2 Kâ Za, tûka ku boloko, bu kawâ misamu mieri yirikaka Kristo, watambika milongoki miandi 3 mu mu yula: “Ngano muntu waketi kwiza ni nge, peleko tufweti kêla muntu wakaka?” 4 Yezu wabatêla ti: “Yendeno, mpe haneno nsangu za misamu mi luta wâ na mi luta mona kwe Za: 5 Bwawu bu bafwa meso bamweni, bafwa malu beka kwe yende, bankwa-bwazi batsemene, bafwa makutu bawîri, bantu ba fwa bavumbukiri, mpe nsangu za mbote basamuni zo kwe bamputu. 6 Nsayi kwe muntu wulembolo baka musamu wu katêla kuba mu bungu dia meno.”

7 Milongoki mia Za bu miayenda, Yezu wabatika mu zonzela Za kwe pôka dia bantu: “Ngano nti lwe talaka ku sese?* Titîti tia rozo tita ninganaka mu titembo? 8 Ngano nti lwe talaka? Bakala dilweti binkuti bia toma? Diangana bantu balwataka binkuti bia toma mu nzo za mitinu babêlaka. 9 Buna nti lwe talaka? Ngano mbikuri? Wa matieleka nita lu têla, yandi tomono yôka mbikuri. 10 Ni mu bungu dia yandi batsoneka ti: ‘Tala! Ntambikiri tinati-nsangu tiani ku matu maku* mu kubika nzila’aku!’ 11 Wa matieleka nita lu têla, mu bantu babutuka mu bakento, ka kwena muntu ko wuyôkele Za Tibatisi mu bunene, kâ muntu wa fioti mu Timfumu tia mazulu mu yôkele. 12 Tûka bilumbu bia Za Tibatisi tii bwawu bu, Timfumu tia mazulu kani diena bantu di basilaka fuki, mpe bô basaka fuki tia mpila yo, tia babakaka. 13 Mu bungu ti mbikuri zazansoni na Musiku, babikula tii mu ntangu ya Za. 14 Mpe tala ti wa lutambula peleko kâni, yandi ni ‘Eliya wafweti kwiza.’ 15 Wô wê na makutu kawâ.

16 “Na nani ndendi fwanakasa mbandu yi? Mbandu yi, yena ntiana bala ba fioti bazakale ku zandu, bata tâ mbila bampwana’awu ba basakanaka, 17 batêle: ‘Talusikiriri flûte, kâ ka lwatinini’â ko; tatengi mikunga mia tiari, kâ ka lwadiriri’â ko.’ 18 Mpila mosi mpe Za wayiza, mu bungu ti ka diaka ko mpe ka nwaka ko, bantu batêle ti: ‘Demo ye nandi.’ 19 Mwana muntu wiziri, yandi dia kadiaka mpe nwa kanwaka, kâ bantu batêle ti: ‘Mpula dia ye nandi, mpe vinu yayingi kanwaka, ndiku yena ya bantu batotaka mpaku na ya bisumuki.’ Kâ, ndwenga* mu nsalulu* zandi zizabakanaka.”

20 Ha manima, wabatika mu semba bantu ba mimvuka mi kasila bimangu biabingi, mu bungu ti ka basoba mabanza ko: 21 “Tiari kwe nge Korazine! Tiari kwe nge Betisayida, mu bungu ti bimangu biasalamane kwe beno, tala ti ku Tire na ku Sido biasalamana, ngâ ntama bantu bawu basoba mabanza bu baketi lwata ngoto na bu baketi zakalala bombi. 22 Kâ nilutêlele, nsembolo yi baka Tire na Sido mu tilumbu tia mfundusu, yiyôkele bubote na ya beno. 23 Mpe nge Kafarnawome, benzi ti mbo bakuzangula tii ku zulu? Mbo kôka ku Ndiamu,* mu bungu ti bimangu biasalamane kwe nge, tala ti ku Sodome biasalamana, ngâ mumvuka wo kô kwa wê tii lumbu ti. 24 Kâ wa nita ku têla, nsembolo yi baka Sodome mu tilumbu tia mfundusu, yiyôkele bubote na ya nge.”

25 Mu ntangu yîna, Yezu watâ: “Nikukembele Tata ha lungiri bantu, nge Mfumu ya zulu na ya mutoto, mu bungu ti waswekele misamu mio kwe bantu bê na ndwenga na bê na mayela, mpe wazabikisi mio kwe bala ba fioti. 26 Yee, Tata, mu bungu ti wazololo ti misamu miabêla bo. 27 Tata’ani wakungeni bima biabiansoni, mpe ka kwena muntu ko tomono zaba Mwana tala ti ka Tata ko; mpila mosi mpe, ka kwena muntu ko tomono zaba Tata tala ti ka Mwana ko na muntu wô Mwana wu kazololo mu zabikisa Tata. 28 Yizeno kwe meno beno bansoni lwe ba fwatika mpe luta nata madema, mbo nilutindisa. 29 Nateno tihangu tiani mpe longokeno mu meno, mu bungu ti wa lembama ndiena mpe wa kuluka, ngatu lwabaka mbombolo.* 30 Mu bungu ti tihangu tiani ka tiena mpasi ko mu nata, mpe dema diani dia peta diena.”