Za

9 Bu keri yôkaka, Yezu wamona bakala dimosi diafwa meso tûka mbutukulu’andi. 2 Mpe milongoki miandi miamuyula: “Rabi, nani wasumuka, bakala di peleko bibuti biandi, ngatu kabutuka na meso ma fwa?” 3 Yezu wavutula: “Bakala di ka sumuka ko, bibuti biandi mpe kâni, kâ tala ti ni buna wena, ngatu bisalu bia Nzambi biatomo zabakana mu yandi. 4 Tufweti lungisa bisalu bia Wô wakuntambika bwisi bu bwatiri bwa tia; mpimpa ni yawu yo, buna ka kwena muntu ko lendi vutu sala. 5 Bwawu bu bu natiri mu nza, meno ni mutsamina wa nza.” 6 Bu kamana tâ misamu mio, walobola mante ha mutoto, wayirika mwa ntebe na mante mo mpe wavinza yo mu meso ma bakala dio 7 mpe wamutêla: “Yenda wayebela ku pisine ya Silowe” (tala ti babanguri yo yizololo tâ “Wô wu batambika”). Wayenda, wayebela mpe wakâla na meso meri monaka.

8 Buna bantu babâka pene-pene na yandi na bô bamumona bu keri kwe yingi, babatika mu tâ: “Ka yandi’â ko bakala dio dieri zakalaka hâ mpe dieri yingaka?” 9 Bakaka ebu beri tâka: “Ni yandi.” Mboko bakaka: “Kâni, fwanakana kwa bafwanakane.” Kâ bakala dio watatamana mu tâ: “Ni meno.” 10 Buna bamuyula: “Bwe meso maku mazibukiri?” 11 Wavutula: “Bakala di batâka Yezu yirikiriki mwa ntebe, vinziriki yo mu meso mani mpe kuntêleleke, ‘Yenda ku Silowe mpe yebela.’ Buna ndieleke, ndiebeleke mpe mbatikiriki mu mona.” 12 Buna bamutêla: “Bakala dio kwe kena?” Yandi watâ: “Ka nzebi’â ko.”

13 Ni bu banata muntu wo watoko bâ na meso ma fwa kwe Bafarize. 14 Kâ tilumbu tia Sabala tiabâ, Yezu bu kayirika ntebe mpe bu kamuzibula meso. 15 Mu ntangu yîna, Bafarize babatika mu yula kwe bakala dio bwe kayizi zibukila meso. Wabavuturila: “Mwa ntebe kavinziriki mu meso. Ndiebeleke mpe ndieka mona.” 16 Bafarize bakaka babatika mu tâ: “Muntu wo ka wutûkiri’â kwe Nzambi ko, mu bungu ti ka zitisaka Sabala ko.” Bakaka batâ: “Bwe muntu wê musumuki wulendi sila bimangu bia mpila yi?” Buna ka beri’â wisanaka ko bawu na bawu. 17 Mpe bavutu tâ kwe bakala dio diafwa meso: “Nge bwe ta tâ mu yandi, mu bungu ti ni meso ma nge kaziburi?” Bakala dio diatâ: “Mbikuri yena.”

18 Kâ Bayuda ka bakwikila ko ti bakala dio meso ma fwa matoko bâ nandi mpe wabatika mu mona; ha manima batâ mbila bibuti bia bakala dio diabatika mu mona. 19 Mpe babayula: “Ngano wu ni mwana’eno wu lutâka ti meso ma fwa mabutuka nandi? Buna, bwe kata mwina bwawu bu?” 20 Bibuti biavutula: “Tuzebi ti mwana’eto wena mpe meso ma fwa mabutuka nandi. 21 Kâ bwe kata mwina bwawu bu, ka tuzebi’â ko; peleko nani mu ziburi meso, ka tuzebi’â ko. Mu yuleno. Wa kula wena. Lendi zonza yandi beni.” 22 Bibuti biatâ misamu mio mu bungu ti bunkuta bwa Bayuda bwabâ nawu, mu bungu ti Bayuda bawisana ti tala ti muntu wutamburi ti Yezu ni Kristo, bafweti mu kuma ku sinagoge. 23 Ntiangu bibuti biandi biatâ: “Wa kula wena. Mu yuleno.”

24 Buna bavutu tâ mbila bakala dio diafwa meso mpe bamutêla: “Hana mukembo kwe Nzambi; tuzebi ti bakala dio musumuki wena.” 25 Wavutula: “Tala ti musumuki wena, ka nzebi’â ko. Musamu wu nzebi ni wena’eti meso ma fwa mabêle nani, kâ bwawu bu ndendi mona.” 26 Buna bamutêla: “Ngano nti kakusiri? Bwe kakuziburiri meso?” 27 Wabavuturila: “Wa nilutêlele, kâ ka luta wâ ko. Mu bungu dia nti luta dinga mu vutu wa wâ? Ngano beno mpe luzololo lwabâ milongoki miandi?” 28 Buna bamuvuturila na leho: “Nge mulongoki wa bakala dio wena, kâ beto milongoki mia Mose twena. 29 Tuzebi ti Nzambi wazonza kwe Mose, kâ mu wo wutariri bakala dio, ka tuzebi’â ko kwe katûkiri.” 30 Bakala dio wabavuturila: “Musamu wa nzitukulu wena bu lulembolo zaba kwe katûkiri, kâ ni yandi kunziburi meso. 31 Tuzebi ti Nzambi ka wirikilaka bisumuki ko, kâ tala ti muntu Nzambi wutînaka mpe luzolo lwandi kasarilaka, ni yandi kawirikilaka. 32 Tûka ntama, ka tweka’eti wâ ko ti muntu wuziburi meso ma muntu wabutuka na meso ma fwa. 33 Tala ti bakala dio ka tûka kwe Nzambi ko, ka keti’â lenda mu sa na kani tima ko.” 34 Bamuvuturila: “Nge wansoni mu masumu wabutukila, kâ beto ta longesa?” Mpe bamutuba ku mbazi!

35 Yezu wawâ ti bamutuba ku mbazi, mpe bu kavutu mu mona watâ: “Ngano lukwikulu lwe naku mu Mwana muntu?” 36 Bakala dio diavutula: “Nani wena, mfumu, ngatu natûla timinu mu yandi?” 37 Yezu wamutêla: “Yandi mweni, mpe diangana ni yandi ta zonza naku.” 38 Watâ: “Timinu tie nani mu yandi, Mfumu.” Mpe wakondama ha matu mandi. 39 Yezu watâ: “Mu bungu dia mfundusu eyi nayizila mu nza, ngatu bô bata lembo mona bamona, mpe bô bata mona babâ bimfwa-meso.” 40 Bafarize babâ na yandi bawâ misamu mio mpe bamutêla: “Ka twena bimfwa-meso ko beto mpe, ka buna ko?” 41 Yezu wabatêla: “Tala ti bimfwa-meso lwena, ka luketi’â bâ na masumu ko. Kâ bwawu bu lutêle, ‘Mona tuta mona.’ Masumu meno matatamane.”