Bisalu bia Bantumwa
27 Bu babonga nzengolo ti mu bato taketi kwendela ku Itali, bahana Paulo na bantu bakaka babâ ku boloko ha moko ma mfumu yimosi ya binwani yabâ na nkumbu Yuliuse, wa mukangu wa Auguste. 2 Takota mu bato yatûka ku Adramitiume, yaketi yôkela ku pore zazingi za tizunga tia Azi, mpe tayenda; Aristarke Musi-Masedwane wa ku Tesalonike na beto kabâ. 3 Tilumbu tialanda takangama ku Sido, mpe Yuliuse wabongela Paulo na nsayi yayansoni, wamuhana nzila mu kwenda kwe ndiku zandi ngatu bamukipa.
4 Bu takatuka kûna mu nzila ya mubu, tayôka pene-pene na Sipre mu bungu ti titembo tia ngolo tieri tûkaka mu mbuka yi tweri kwendaka. 5 Ha manima tayôka ha kati-kati dia mubu, pene-pene na Silisi mpe na Pamfili, mpe takangama ku pore ya Mira ku Lisi. 6 Kûna mfumu ya binwani wamona bato yatûka ku Alekisandri yeri kwendaka ku Itali, mpe watukotesa mu kati. 7 Ha manima, bu tamana kwenda malembe-malembe bilumbu biabingi, tatula ku Kinide mu mpasi. Mu bungu ti titembo beto tieri kabakasaka mu kwenda ku matu, tayenda pene-pene na Krete ku Salmone. 8 Bu tamana yôka mu mpasi pene-pene na mbuka yo, takangama ku mbuka yi batâka Pore za Toma yabâ pene-pene na mumvuka wa Lasea.
9 Ntangu yayingi yayôka mpe wayizi bâ musamu wa mpasi mu kwenda, mu bungu ti diêna dia Tilumbu ti Bazibikaka Masumu diatiyôkela, buna Paulo wahana ntumunu. 10 Wabatêla: “Babakala, mweni ti nzietolo yi mbo yinata mpasi mpe mbo tuhombesa bima biabingi, ka bato’â ko kwa na bima bie mu kati kâ mpe na luzingu lweto.”* 11 Kâ mfumu ya binwani wawirikila muntu weri nataka bato na wô wavwa bato, kani kawirikila misamu mieri tâka Paulo. 12 Mu bungu ti pore ka yabâ ya delakana ko mu yôkesa ntangu ya tiozi tia ngolo, bantu babîngi batâ ti takatuka ku mbuka yo, mu mona tala ti mbo taketi yôkesa ntangu ya tiozi tia ngolo ku Fenikise, pore yimosi ya ku Krete, yeri tarisaka ku nore-este na ku side-este.
13 Titembo tia ku side bu tiabatika mu pûpa malembe-malembe, babanza ti mbo baketi lungisa mio mi bawaya; mpe bu bananguna tisengo tisikamasaka bato, babatika mu kwe yende nkatika pene-pene na Krete. 14 Ntangu fioti ha manima, titembo tia ngolo ti beri tâka nkumbu Erakilo* tiabatika mu pûpa ku ile* yango. 15 Mu bungu ti titembo tia ngolo tieri tiwindaka mu bato mpe bato ka yeri’â lendaka ko mu kwenda ku matu, buna tabîka ti titembo tiatunata kûna ku tizololo. 16 Ha manima, tayôka pene-pene na ile* yimosi ya fioti yabâ nkumbu Koda mu swama, mpe ntono ngolo zi tasarila, mpasi tamona mu sikamasa bato ya fioti yi beri tûlaka ha manima ma bato. 17 Kâ bu bamana ya nakisa mu bato, basarila misinga mia minene mu tomo kanga bato. Mu bungu ti bunkuta bwabâ nawu mu kangama mu dielo dia Sileti,* balosa bima bibakisaka mu nata bato mpe babîka ti titembo tiabanata. 18 Mu bungu ti titembo tia ngolo beto tieri tomo ningasaka, tilumbu tialanda babatika mu losa bima biabâ mu bato ngatu yalembo vutu bâ dema. 19 Mpe tilumbu tia bitatu, bawu beni balosa bisalulu bia bato.
20 Mu bungu ti ntangu na mbwetete ka biaduka ko tûka bilumbu biabingi, mpe titembo tia ngolo kwe beto tieri pûpaka, tivuvu tiatiansoni tiabâ neto mu vûka tiawa. 21 Mu bungu ti ka badia ko tûka ntangu yayingi, Paulo watelama ha kati diawu mpe watâ: “Babakala, tala ti malongi mani ma lwawîri mpe ka lwabongele’â nzila ya mubu ko tûka ku Krete ngâ ka tumweni’â mpasi zi ko mpe ka tuhombese’â bima ko. 22 Kâ bwawu bu, nilulombele mu bâ na butindi, mu bungu ti na kani muntu* ha kati dieno wuhombesa luzingu lwandi, bato kwa yihombela. 23 Mpimpa yi, mbazi yimosi ya Nzambi yikumvwiri na yi nisarilaka tisalu tia santu yitelamaneke ha matu mani 24 mpe yikuntêleleke: ‘Kubândi na bunkuta Paulo. Fweti telama ha matu ma Sezare, mpe tala! Nzambi ku heni luzingu lwa bô babansoni bata sa nzietolo na nge.’ 25 Buna babakala, bêno na butindi, mu bungu ti lukwikulu lwe nani mu Nzambi ti miamiansoni mbo miyôkela buna bu bakuntêlele. 26 Kâ tufweti kwe kangama ku ile* yimosi.”
27 Mu mpimpa ya 14 bu tweri kwe yambuki mu mubu wa Adriya, mu kati-kati dia mpimpa, bantu basalaka mu bato babatika mu mona ti pene-pene na mutoto tweri pusanaka. 28 Badinga mu zaba ndilu mpe babaka kampe 36 m,* buna bapusa mwa titini, bavutu dinga mu zaba ndilu mpe babaka kampe 27 m.* 29 Mu bungu ti bunkuta bwabâ nawu ti bato yabotana mu matari, balosa bisengo biyà bisikamasaka bato ku manima ma bato mpe bazolo ti bwisi bwakulu tia. 30 Kâ bantu basalaka mu bato bu beri dingaka mu dioka bato, bakôkesa bato ya fioti mu mubu bu bahuna ti bisengo bisikamasaka bato beri dingaka mu losa ku matu, 31 Paulo watâ kwe mfumu ya binwani na kwe binwani: “Tala ti babakala ba ka batatamane’â ko mu bâ mu bato, ka lulendi’â lwavûka ko.” 32 Buna binwani biazenga misinga mia bato ya fioti mpe babîka ti yabwa mu mubu.
33 Ntete bwisi bwatia, Paulo wabatindisa babansoni mu dia mwa tima, bu katâ: “Lumbu ti ni tilumbu tia 14 tûka ti luta kêla na lwaka mpe ti lweka lembo dia na kani tima. 34 Buna nilutindisi mu dia mwa tima; mu bungu dia bubote bweno, mu bungu ti na kani wumosi mu beno wuhombesa lusuki lwa mutu’andi.” 35 Bu kamana tâ misamu mio, wabonga dimpa, watonda Nzambi ha matu ma babansoni, wabukuna dio, mpe wabatika mu dia. 36 Buna babansoni bayizi baka butindi mpe babatika mu dia bawu mpe. 37 Beto ba* 276 tabâ mu bato. 38 Bu bamana yukuta, balosa ble mu mubu ngatu bato yalembo vutu bâ dema.
39 Bwisi bu bwatia, bamona mutoto wu balembo zaba, kâ bamona mbuka yabâ na dielo mu ndeko mamba mpe babonga nzengolo ya kangamasa bato kûna tala ti mbo baketi lenda. 40 Buna bazenga misinga mia bisengo bisikamasaka bato mpe balosa mio mu mubu, mu ntangu yîna kwa, bazenga misinga mia nkafi* mpe bu bamana nanguna milele ngatu titembo tiabanata, bayenda ha mutoto. 41 Bu batula ha mbuka yimosi yabâ na dielo ha kati-kati dia mamba, mu mbuka yeri kwe ningane mamba kwakwansoni, bakangamasa bato hâna, matu ma bato maye tomo sikama mpe ka meri’â ninganaka ko, kâ ngolo za matuma* zabatika mu mwangasa manima ma bato. 42 Buna binwani biabonga nzengolo ya honda bantu babansoni babakanga mu boloko ngatu na kani wumosi mu bawu kabwa mu mamba mpe kadioka. 43 Kâ mfumu ya binwani wabonga nzengolo ya vûkisa Paulo mpe wabakabakasa mu lungisa kani diawu. Walomba kwe bô bazebi tsaba mu bwa mu mubu na mu kwenda ha mutoto ba ntete, 44 mpe bakaka balanda ha manima ha zulu mabaya peleko ha zulu bibuku bia bato yamwangana. Ni buna babansoni batula ha mutoto ba moyo.