Matie

14 Mu ntangu yîna, Erode, mfumu ya Galile wawâ nsangu za Yezu 2 mpe watâ kwe bisari biandi: “Za Tibatisi wena. Wavumbukiri kwe ba fwa ntiangu kê na ngolo za sa bimangu.” 3 Erode* wakangisa Za mu bungu dia Erodiade mukento wa Filipe yaya’andi. 4 Mu bungu ti Za ebu keri mu têlaka: “Ka wena na nswa ko mu sa ti kabâ mukento’aku.” 5 Kâ, ni bu sa ti weri nandi kamuhonda, pôka dia bantu keri tînaka mu bungu ti ntiana mbikuri beri mu bongelaka. 6 Kâ, bu beri kembelaka tilumbu tia mbutukulu ya Erode, mwana wa mukento wa Erodiade weri tinaka, mpe watomo tâ Erode nsayi. 7 Buna, wadia ndefi mu mu hana bima biabiansoni bi kaketi mu lomba. 8 Dieka bo, mu lutumu lwa nguri’andi, watâ: “Kungana mutu wa Za Tibatisi mu ndonga ya pesakana, hâ ha ndiena.” 9 Mutinu tiari tiamubaka, kâ, mu bungu ti ndefi kadia ha matu ma bantu beri diaka* na yandi, buna watuma ti bamuhana mutu wa Za. 10 Mutinu watambika muntu mu zenga mutu wa Za ku boloko. 11 Mutu banata wo mu ndonga ya pesakana, mpe bahana wo kwe mwana mukento, mpe yandi wanata wo kwe nguri’andi. 12 Ha manima, milongoki miandi miayenda mu katula mvumbi’andi mpe bazika yo. Ha manima baye hana nsangu kwe Yezu. 13 Bu kawâ nsangu zo, Yezu wakatuka ku mbuka yo mu bato, mpe wayenda ku mbuka ya hengama mu bâ ha yandi kaka. Kâ pôka dia bantu ba mimvuka mia swaswana bawâ nsangu zo, mpe bamulanda mu malu.

14 Bu kakôka mu bato, wamona yungi dia bantu, wabafwila tiari mpe wawasisa bambevo. 15 Kâ bwisi bu bwayila, milongoki miandi miayizi mu têla: “Ku mbuka ya hengama twena mpe bwisi buyiriri, karisa pôka dia bantu di ngatu benda ku mahata mpe basumba bima bia dia.” 16 Kâ Yezu wabatêla: “Ka bakwenda ko, beno beni bahaneno bima bia dia.” 17 Bawu bamutêla: “Ka twena na tima ko, mampa matanu kwa me neto na mbizi zole.” 18 Yandi watâ: “Kunatineno mo.” 19 Mpe walomba kwe pôka dia bantu mu zakala ha matîti, ha manima wabonga mampa matanu na mbizi zole, watala ku zulu mpe wasa lusambulu mu sakumuna bio, bu kamana bukuna mampa, wahana mo kwe milongoki, mpe milongoki miahana mo kwe pôka dia bantu. 20 Babansoni badia mpe bayukuta, batota bibuku biasâla mpe bafulusa bitunga 12. 21 Mu lutangu lwa bantu badia, kampe mweri na babakala 5 000, katula bakento na bala ba fioti. 22  Ntangu fioti kwa ha manima, watâ kwe milongoki miandi mu naka mu bato ngatu benda ku simu diakaka, mu ntangu yi keri karisaka pôka dia bantu.

23 Bu kamana karisa pôka dia bantu, wayenda ha zulu mongo yandi kaka mu sambila. Tii bwa yila bwisi, hô kwa keri yandi kaka. 24 Bato yatiturila ha titini* tia nguria mala na mutoto, mpe na matuma* tieri nwanaka mu bungu ti titembo tia ngolo tieri tûkaka mu mbuka yi beri kwendaka. 25 Kâ ntete bwisi bwatia,* wayenda kwe bawu bu keri kwe yende ha mukanda mubu. 26 Bu bamona ti ha mukanda mubu keri kwe yendele, milongoki miayituku, batâ: “Timona-meso tiena!” Mpe bakawula mu ngolo, mu bungu ti bunkuta bwa ngolo bweri nawu. 27 Kâ, hô nkatika bendo Yezu wabatêla: “Bêno na butindi! Meno wena; ka lubândi na bunkuta.” 28 Piere wamuvuturila: “Mfumu, tala ti nge wena, kundomba ndiza kwe nge ha mukanda mamba.” 29 Yezu watâ: “Yiza!” Buna Piere wakôka mu bato, mpe wabatika mu diata ha mukanda mamba mu kwenda kwe Yezu. 30 Kâ, bu kamona ti titembo ngolo tieri pûpaka, bunkuta bwamubaka, mpe bu kabatika mu diama, wakawula: “Mfumu, kumvûkisa!” 31 Hô nkatika bendo, Yezu walambula koko mu mu baka, mpe wamutêla: “Nge we na timinu tia fioti, mu bungu dia nti siriri ntembe?” 32 Bu bamana naka mu bato, titembo tialembama. 33 Bô beri na yandi mu bato, bakondama ha matu mandi mpe batâ: “Wa matieleka, nge Mwana wa Nzambi wena.” 34 Bu bamana sabuka, batula ku hata dia Genezarete.

35 Bantu ba mbuka yîna bu bamana mu bambukila, batambika nsangu kwe bantu ba tizunga tiatiansoni, mpe bamunatina bô babansoni beri na bimbevo. 36 Mpe bamulemberela mu simba kwa nsongi ya tinkuti tiandi tia zulu, mpe bô babansoni basimba tio batomo wasa.