Matie

21 Bu babâ pene-pene na Yerusaleme, mpe bu batula ku Betefaze, ku Mongo wa miti mia Olive, Yezu watambika milongoki miandi miole, 2 wabatêla: “Yendeno ku hata edio di luta mona, mpe buna kwa bu lukota mbo lumona buluku* dia dikento di bakengi na mwana buluku.* Ba sutuleno, mpe ba nateno kwe meno. 3 Tala ti muntu lu yuriri, lufweti mu têla: ‘Mfumu wê na mo nsatu.’ Buna mbo katambika mo na manzangu mamansoni.”

4 Misamu ni bo miayôkela, ngatu mio mia tâ mbikuri mialungana, watâ: 5 “Têleno mwana mukento wa Siyone: ‘Tala! Mutinu’aku kwe nge kata kwiza, wa lembama wena mpe ha zulu buluku* kaneki, yee, mwana buluku,* mwana wa tibulu tinataka dema.’”

6 Buna milongoki miayenda mpe basa ntiana bwa ba tumina Yezu. 7 Banata buluku* dio na mwana’andi, batûla binkuti biawu ha zulu mabuluku,* mpe Yezu wazakala ha zulu mwana buluku.* 8 Bantu babîngi bayala binkuti biawu bia zulu mu nzila. Bakaka beri zengaka bintala bia miti mu yala bio mu nzila. 9 Musamu wakaka, pôka dia bantu dieri ku matu mandi na dio dieri mu landaka ku manima diatatamana mu kawula: “Mulemvo’aku, vûkisa Mwana Davide! Kabâ wa sakumunu yandi ta kwiza mu nkumbu ya Yehova! Mulemvo’aku, mu vûkisa, nge wê ku zulu!”

10 Bu kakota ku Yerusaleme, mumvuka wa mukaka waningana, bayulasana: “Wo nani?” 11 Pôka dia bantu diatatamana mu tâ: “Mbikuri Yezu wena, Musi-Nazarete wa ku Galile!”

12 Yezu wakota mu tempelo, mpe watuba ku mbazi bô babansoni beri tekaka na beri sumbaka mu tempelo. Wabwisa meza ma bantu beri sobesaka mbongo na chaise za bantu beri tekaka mabembe. 13 Mpe wabatêla: “Watsonama: ‘Nzo’ani mbo batâ yo nzo ya lusambulu,’ kâ beno nzo ya mivi luta ya titula.” 14 Mpe bantu bafwa meso na bafwa malu bayiza kwe yandi mu tempelo, mpe wabawasisa.

15 Mfumu za banganga-nzambi na bitsoniki bu bamona misamu mia nzitukulu mi kayirika na bala ba babakala beri kawulaka mu tempelo, “Mulemvo’aku, vûkisa Mwana Davide!” nkesi zababaka, 16 mpe bamutêla: “Misamu mi bata tâ mia ta wâ?” Yezu wabavuturila: “Yee. Ngano ka lwatanga ko ti ‘Mu munwa wa bala ba fioti na wa bala bayemaka siri ti mikembo miaduka’?” 17 Buna wabasisa, wayenda ku mumvuka wa Betani, mpe wayôkesa mpimpa kûna.

18 Bu kakâla ku mumvuka mu nkatika pari, nsatu yamubaka. 19 Wamona mufige ha ndekoso nzila, wapusana ha muti wo, kâ kabaka tima ko, ni makaya ma mpamba kwa; mpe watâ kwe muti: “Kani kabwe kuvutu’â buta na kani mbutu yimosi ko.” Hô nkatika bendo mufige wayuma. 20 Milongoki bu miamona bo, miayituku mpe miatâ: “Bwe mufige wuyuminini mbala mosi?” 21 Yezu wabahana mvutu eyi: “Wa matieleka nita lu têla, tala ti timinu tie neno mpe ka lwena na ntembe ko, ka luyirika kwa misamu mi ndirikiri kwe mufige ko, kâ tala ti lutêle kwe mongo ewu, ‘Nanguka mpe tilosa mu mubu,’ musamu wo mbo wuyilama. 22 Mpe bima biabiansoni bi lulomba mu lusambulu, tala ti timinu tie neno, mbo lubaka bio.”

23 Ha manima bu kakota mu tempelo, mfumu za banganga-nzambi na bakuluntu ba makanda bapusana kwe yandi bu keri longesaka, mpe batâ: “Ntia lutumu lwe naku mu yirika misamu mio? Mpe nani ku heni lutumu lwango?” 24 Yezu wabavuturila: “Me mpe musamu niluyula. Tala ti lukungeni mvutu, buna meno mpe mbo nilutêla mu ntia lutumu nita yirikila misamu mi: 25 Bateme ya Za ngano kwe nani yatûka? Ku zulu peleko kwe bantu?” Kâ bawu babatika mu tâ ti: “Tala ti tutêle, ‘Ku zulu,’ mbo katutêla ‘Buna mu bungu dia nti lwalembo mu kwikila?’ 26 Kâ tamana tâ ‘Kwe bantu,’ tufweti tîna pôka dia bantu, mu bungu ti kwe babansoni Za mbikuri yena.” 27 Dieka bo bavuturila Yezu: “Ka tuzebi’â ko.” Buna yandi mpe wabatêla: “Meno mpe ka nilutêla ko mu lutumu lwa nani nita yirikila misamu mi.

28 “Bwe luta banza? Bakala dimosi dieri na bala bole. Wapusana kwe mwana wa ntete mpe wamutêla: ‘Mwana’ani, lumbu ti yenda wasala ku musitu wa vinu.’ 29 Mwana wo wavutula: ‘Ka nikwenda ko,’ kâ ha manima wanionga, mpe wayenda. 30 Bu kapusana kwe mwana wa nzole, musamu ni wo kwa mpe katâ. Yandi wavutula: ‘Tata mbo nikwenda,’ kâ ka yenda ko. 31 Nani mu ba bole tumamane tata’andi?” Batâ: “Wo wa ntete.” Yezu wabatêla: “Wa matieleka nita lu têla, bantu batotaka mpaku na biyala mbo balusisa manima mu Timfumu tia Nzambi. 32 Mu bungu ti Za wayiza kwe beno mu lu songela nzila ya sungama,* kâ ka lwamukwikila ko. Bantu batotaka mpaku na biyala bawu bamukwikila. Kâ ni bu sa ti lwamona bo, ka lwanionga ko ngatu lwamukwikila.

33 “Wirikileno tifwani tiakaka: Kweri na bakala dimosi dieri mfumu-m’toto wakuna musitu wa vinu, wazunga wo mu tikaku, watima tikamununu tia vinu kûna, mpe watungisa nzo ya zangama. Ha manima wahana wo kwe bantu basalaka misitu ngatu bafutila wo, mpe wayenda ku nsi ya bunzenza. 34  Ntangu ya tia mbutu bu yatula, watambika ngamba zandi kwe bisari bia misitu mu kutakasa mbutu zandi. 35 Kâ bisari bia misitu biabonga ngamba zandi, batwa wumosi, wakaka bamuhonda, mpe wakaka bamuwinda matari. 36 Wavutu tambika ngamba zakaka zayôka lutangu lwa ngamba zi katoko tambika, kâ basa ntiana kwa bu batoko sa. 37 Ku nsuka, watambika mwana’andi mu bungu ti wabanza ti, ‘Mbo bazitisa mwana’ani.’ 38 Bu bamona mwana’andi, bisari bia misitu biatâ bawu na bawu, ‘Muntu wubiarila fwa ewu ni yandi. Yizeno tamuhonda ngatu tabonga fwa diandi!’ 39 Buna bamubwila, bamudukisa ku musitu wa vinu mpe bamuhonda. 40 Buna, mu ntangu yi kwiza mfumu ya musitu wa vinu, ngano nti kasa kwe bisari bio bia misitu?” 41 Bawu bamutêla: “Mu bungu ti ba mbi bena, mbo kabafukisa mu mpila ya mbi, mpe mbo kalomba kwe bisari biakaka bia misitu mu futila musitu’andi wa vinu. Bawu mbo bamuhana mbutu mu ntangu ya tia mbutu.”

42 Yezu wabatêla: “Ngano ka lwatanga mu Matsonoko ko ti, ‘Tari dia losa bitungi bia nzo diayikiri tari di sikamanaka nzo. Musamu wo kwe Yehova wutûkiri, mpe wa nzitukulu wena ha meso meto’? 43 Ntiangu nita lu têla, Timfumu tia Nzambi mbo balukatula tio, mpe mbo bahana tio kwe kanda dibuta mbutu zandi. 44 Muntu wubwa ha zulu tari dio mbo katsalangana, mpe wô wu dibwila mbo katutuka.”

45 Mfumu za banganga-nzambi na Bafarize bu bawâ bifwani bio, babakula ti bawu keri zonzelaka. 46 Ni bu sa ti weri nawu bamubwila,* pôka dia bantu beri tînaka, mu bungu ti ntiana mbikuri beri mu bongelaka.