Za

12 Bilumbu 6 ntete Pake, Yezu watula ku Betani, kwabâ Lazare, wu bavumbula kwe ba fwa kwe Yezu. 2 Kûna bamuhana bidia bia nkokela mpe Marte bawu keri kipaka; kâ Lazare wumosi mu bô beri diaka* na yandi wabâ. 3 Buna Maria wabonga kampe demi litre* ya mafuta ma nsunga ya mbote ma ntalu yayingi, nare ya nkatika yawu. Watsamuna mo ha malu ma Yezu mpe wakusuna malu mandi mu nsuki zandi. Nzo yafuluka mu nsunga ya mafuta ma nsunga ya mbote. 4 Kâ Yuda Iskariote, wumosi wa milongoki miandi, wô waketi mu teka, watâ: 5 “Mu bungu dia nti balembolo tekela mafuta mo mu ntalu ya denie* 300 mpe bahana mbongo zo kwe bamputu?” 6 Keri’â tâka bo ko mu bungu ti bamputu keri belokelaka lwaka, kâ mu bungu ti mwivi wabâ, kese ya mbongo kwe yandi yabâ mpe mbongo zi beri tûlaka mu kati keri vulu labaka. 7 Buna Yezu watâ: “Mu bîkeno, ngatu kalanda tikulu mu bungu dia tilumbu tia ndiamu’ani. 8 Mu bungu ti mbo lubâ na bamputu ntangu zazansoni, kâ meno ka lubâ nani ko ntangu zazansoni.”

9 Mu ntangu yo, pôka dia Bayuda diazaba ti ni kô kabâ, mpe bayiza ka mu bungu dia Yezu’â ko kwa, kâ mpe mu mona Lazare wu kavumbula kwe ba fwa. 10 Buna mfumu za banganga-nzambi zadinga mpe mu honda Lazare, 11 mu bungu ti ni mu bungu dia yandi Bayuda babingi beri kwendaka kûna mpe beri tûlaka timinu mu Yezu.

12 Tilumbu tialanda, pôka dia bantu diayiza ku malaki diawâ ti Yezu ku Yerusaleme keri kwizaka. 13 Buna babonga mandala, baduka mu kwizi mu bwana mpe babatika mu kawula: “Mulemvo’aku, vûkisa! Kabâ wa sakumunu yandi ta kwiza mu nkumbu ya Yehova,* Mutinu wa Israele!” 14 Yezu bu kamona mwana buluku,* wazakala ha zulu, ntiana kwa bu watsonama: 15 “Kubândi na bunkuta mwana mukento wa Siyone. Tala! Mutinu’aku kwe nge kata kwiza, wa zakala ha zulu mwana buluku.” 16 Mu ntangu yîna, milongoki miandi ka miatoko’â bakula misamu mio ko, kâ Yezu bu kabaka mukembo, babambuka ti misamu mio mu bungu dia yandi batsonekena mio, mpe bawu bayirika mio kwe yandi.

17 Pôka dia bantu diabâ na yandi bu katâ mbila Lazare ku mpiema na bu kamuvumbula kwe ba fwa diatatamana mu tâ timbangi. 18 Ntiangu pôka dia bantu diayizi mu bwana mu bungu ti diawâ timangu ti kasa. 19 Buna Bafarize batâ bawu na bawu: “Lumweni ti ka luta lenda na kani musamu ko. Tala! Nza yayansoni yandi yita landa.”

20 Bagreke bakaka babâ kô ha kati dia bô bayiza mu sambila mu ntangu ya malaki. 21 Buna bapusana kwe Filipe watûka ku Betisayida ya Galile, mpe babatika mu mu yula, bu batâ: “Mfumu, tuzololo tamona Yezu.” 22 Filipe waye wa tâ kwe Andre. Andre na Filipe baye wa tâ kwe Yezu.

23 Kâ Yezu wabavuturila: “Ntangu yifweni ngatu Mwana muntu kabaka mukembo. 24 Nkatika matieleka nita lu têla, tala ti mbutu ya ble ka yibwiri’â ha mutoto ko mpe ka yifwiri’â ko, mbutu yimosi kwa yisâla; kâ tala ti yifwiri, buna mbo yibuta mbutu zazingi. 25 Wô kangama mu luzingu* lwandi, luzingu lwandi kata fukisa, kâ wô yina luzingu* lwandi mu nza yi, mbo kakengerela lo mu bungu dia luzingu lwa mankululu. 26 Tala ti muntu zololo mu kunsarila, kakundanda, mpe kô ku nibâ, tisari tiani mpe ni kô tibâ. Tala ti muntu zololo mu kunsarila, Tata mbo kamuzangula. 27 Bwawu bu mpasi zê nani ku mutima, mpe bwe ndendi tâ? Tata, kumvûkisa mu ntangu yi. Kâ, ni mu bungu dia musamu wu nturiri tii ntangu yi. 28 Tata, kembesa nkumbu’aku.” Buna zu diatûka ku zulu diatâ: “Ya nkembese mpe mbo nivutu ya kembesa.”

29 Pôka dia bantu diatelama hâna diawâ zu mpe diabatika mu tâ ti nzazi yibamini. Bakaka batâ: “Mbazi yimuzonzele.” 30 Yezu wavutula: “Zu dio ka mu bungu dia meno’â ko diwâkane, kâ mu bungu dia beno. 31 Bwawu bu mfundusu ya nza yi yita salama; bwawu bu mfumu ya nza yi mbo bamutuba ku mbazi. 32 Kâ meno, tala ti bakunzanguri ha mutoto, mbo nibenda bantu ba mpila zazansoni kwe meno.” 33 Wa matieleka, ni bo keri zonzelaka mu songela mpila yi kaketi fwila. 34 Buna pôka dia bantu diamuvuturila: “Tayizi wâ mu Musiku ti Kristo mankululu kazinga. Bwe lendi têla ti Mwana muntu bafweti mu zangula? Ngano Mwana muntu wango ni nani?” 35 Buna Yezu wabatêla: “Mutsamina mbo wuvutu bâ ha kati dieno mwa ntangu. Yendeno diati bu lwatiri na mutsamina ngatu mpimpa ya ngolo* yalembo lu yabama; wô ta diatila mu mpimpa ya ngolo* ka ta zaba ko kwe kata kwenda. 36 Bu lwatiri na mutsamina, sarileno timinu mu mutsamina, ngatu lwabâ bala ba mutsamina.”

Yezu watâ misamu mio, ha manima wayenda mpe waswama mala na bawu. 37 Ni bu sa ti bimangu biabingi kasa ha meso mawu, ka batûla timinu mu yandi ko, 38 ngatu misamu mia tâ mbikuri Izayi mialungana, watâ: “Yehova,* nani watûriri timinu mu misamu mi kawîri kwe beto?* Mpe koko kwa Yehova,* kwe nani bazabikisi ko?” 39 Musamu wasa ti balembo lenda mu kwikila ni wena’eti, Izayi wavutu tâ: 40 “Wahondele meso mawu mpe wakubisi mitima miawu, ngatu balembo mona mu meso mawu mpe balembo bakula mu mitima miawu, ngatu balembo soba mabanza mpe nabawasisa.” 41 Izayi watâ misamu mio mu bungu ti wamona mukembo’andi, mpe wazonza mu bungu dia yandi. 42 Ni bu wubâ ha kati dia bamfumu, babingi batomo tûla timinu mu yandi, kâ mu bungu dia Bafarize, ka beri’â wa zabikisaka ko ngatu balembo ba kuma ku sinagoge; 43 mu bungu ti mukembo wa bantu beri zoloko yôka mukembo wa Nzambi.

44 Kâ Yezu wakawula mu ngolo mpe watâ: “Wô tûla timinu mu meno, ka tûla kwa timinu mu meno ko, kâ mpe mu wô wakuntambika; 45 mpe wô ku mweni, mweni mpe Wô wakuntambika. 46 Ntiana mutsamina ndiziri mu nza, ngatu muntu ni muntu wutûla timinu mu meno kalembo tatamana mu bâ mu mpimpa ya ngolo. 47 Kâ tala ti muntu wîri misamu miani mpe ka ta mia sarila ko, meno ka nita mu fundisa ko; mu bungu ti ka nayiza ko mu fundisa nza, kâ mu vûkisa nza. 48 Wô ta kunkala mpe ta lembo tambula misamu miani, muntu wê kô mu fundisa. Misamu mi nita tâ mbo mimufundisa mu tilumbu tia mansukina. 49 Mu bungu ti ka nita zonza mu lutumu lwa me beni ko, kâ Tata wakuntambika ni Yandi wakungeni ntumunu mu misamu mi nitâ na mu mpila yi mfweti zonzela. 50 Mpe nzebi ti ntumunu’andi yizololo tâ luzingu lwa mankululu. Buna mio miamiansoni mi nitâka, ntiana bwa kuntêla mio Tata nitêlaka mio.”