Like

22 Malaki ma Mampa Malembo Levire ma batâka Pake, mayizi bâ pene-pene. 2 Mpe mfumu za banganga-nzambi na bitsoniki mpila yiyôkele bubote beri dingaka mu honda Yezu, mu bungu ti bantu beri tînaka. 3 Buna Satana wakotela Yuda, wu beri tâka Iskariote; weri mosi ha kati dia ba 12, 4 mpe waye moka na mfumu za banganga-nzambi na kapitene za tempelo mu musamu wutariri mpila yi kaketi ba tekela Yezu. 5 Nsayi yababaka mu musamu wo mpe bawisana mu mu hana mipata mia arza. 6 Buna watambula mpe wabatika mu dinga ntangu ya mbote mu mu teka kwe bawu bu lembo mu zungirilaka bantu.

7 Tilumbu tia ntete tia mampa malembo levire tiatula, ti bafweti hana mukayulu wa Pake; 8 buna Yezu watambika Piere na Za, bu kabatêla: “Yendeno mpe tu kubikileno bidia bia Pake.” 9 Bamutêla: “Kwe zololo takubika yo?” 10 Wabatêla: “Tala! bu lukota mu mumvuka, bakala dimosi die na yuki dia mamba dikwizi lu bwana. Mu landeno tii mu nzo yi kakota. 11 Mpe têno kwe mfumu ya nzo, ‘Mulongi ku yuriri: “Mbuka yi nidîla Pake na milongoki miani kwe yena?”’ 12 Mpe bakala dio mbo kalusongela shambre ya ku zulu, ya sârila mpe ya yiluku. Kubikeno Pake mûna.” 13 Buna bayenda, bamona misamu buna bu kabatêla, mpe bakubika Pake.

14 Buna ntangu bu yafwana, Yezu walambalala ha meza na bantumwa. 15 Mpe wabatêla: “Nsatu yayingi yabêle nani mu dia Pake yi na beno ntete namona mpasi; 16 mu bungu ti wa nita lu têla, ka nivutu’â ya dia ko na tii bu yilungana mu Timfumu tia Nzambi.” 17 Bu kamana bonga mbungu,* wasa lusambulu lwa matondo mpe watâ: “Bongeno yo mpe yôkeseno yo ha kati dieno, 18 mu bungu ti wa nita lu têla ka nivutu’â nwa vinu ko tii bu kwiza Timfumu tia Nzambi.”

19 Wabonga mpe dimpa, wasa lusambulu lwa matondo, wabukuna dio mpe wabahana dio bu katâ: “Nitu’ani dita monekesa yi nihana mu bungu dia beno. Tatamaneno mu sila bo mu kumbambukila moyo.” 20 Wasila mpe buna na mbungu bu bamanisa mu dia, watâ: “Mbungu yi yimonekese luwawanu lwa môna mu nzila ya menga mani matsamuka mu bungu dia beno.

21 “Kâ taleno! Muntu wukunteka na meno kena ha meza. 22 Diangana Mwana muntu ni mwendo’andi ntiana bu bazenga wo; kâ tiari kwe muntu wumuteka!” 23 Buna babatika mu yulasana bawu na bawu, nani mu matieleka ha kati diawu waketi yirika musamu wo.

24 Kâ, babatika mpe mu disikita mu ngolo mu zaba nani yôkele bunene mu bawu. 25 Kâ, wabatêla: “Mitinu makanda bayâlaka mu ngolo, mpe bô babatumaka, bantu ba mbote babatâka. 26 Beno, ka lufweti’â lwabâ ntiana bawu ko. Kâ, bîka ti wô yôkele bunene ha kati dieno kabâ ntiana wô wê wa nkatika wa fioti, mpe wô twarisaka ntiana wô sarilaka. 27 Ngano nani yôkele bunene, wô ta dia* peleko wô ta sarila? Ngano ka yandi’â ko ta dia?* Kâ meno ha kati dieno ndiena ntiana wô ta sarila.

28 “Kâ beno, ni beno lwatatamane mu bâ na meno mu mpasi zani; 29 mpe meno luwawanu lwa timfumu nita sa na beno ntiana Tata’ani bu kasa luwawanu na meno, 30 ngatu lwadia mpe lwanwa ha meza mani mu Timfumu tiani, mpe lwazakala ha miyâlu mu fundisa makanda 12 ma Israele.

31 “Simo, Simo, tala! Satana lu lombele beno bansoni mu lu pupula ntiana ble. 32 Kâ meno nsambiri mu bungu dia nge ngatu timinu tiaku tialembo bwa; mpe nge bu kâla, tindisa mpangi zaku.” 33 Buna wamutêla: “Mfumu, wa kubama ndiena mu kwenda na nge ku boloko na ku lufwa.” 34 Kâ Yezu wamutêla: “Wa nita ku têla Piere, nsusu ka yitikubila ko, mbo kala mbala tatu ti kunzebi’â ko.”

35 Wavutu ba têla: “Bu nalutambika balembo bimpokoti bia mbongo, nkutu ya bidia na mapapa, ngano tima tia lukondo?” Bawu batâ: “Kâni!” 36 Wabatêla: “Kâ bwawu bu bîka ti wô wê na timpokoti tia mbongo kabonga tio, mpila mosi mpe wô wê na nkutu ya bidia, mpe bîka ti wô lembolo na mbele kateka tinkuti tiandi tia zulu mpe kasumba yo. 37 Mu bungu ti wa nita lu têla, musamu ewu wu batsoneka mu meno wufweti lungana, ‘Bamutûriri mu mulonga wa bantu bavwezaka Musiku.’ Diangana misamu mi batsoneka mu meno mia mita lungana.” 38 Buna batâ: “Mfumu, tala! mbele zole zê hâ.” Wabatêla: “Zifweni.”

39 Bu kaduka, wayenda ku Mongo wa miti mia Olive ntiana bu keri toko saka, milongoki miandi mpe miamulanda. 40 Bu katula kûna, wabatêla: “Tatamaneno mu sambila ngatu lwalembo kota mu ntontolo.” 41 Buna wayenda mwa mala* na bawu, wafukama mpe wabatika mu sambila, 42 watâ: “Tata, tala ti zololo, katula mbungu yi he meno. Kâ ka wubândi buna bu nzololo meno, kâ buna bu zololo nge.” 43 Buna mbazi yimosi yatûka ku zulu yayizi mu monekena mpe yayizi mu tindisa. 44 Kâ, mu bungu ti lwaka lwalwingi lwabâ nandi, yandi watatamana mu tomo vutu sambila; mpe tiafuta tiandi tiayizi bâ ntiana matêla ma menga meri bwaka ha mutoto. 45 Bu kamanisa mu sambila, watelama mpe wakâla kwe milongoki. Wababwana ku tolo, ba fwatika mu tiari. 46 Wabatêla: “Mu bungu dia nti luta bwila tolo? Telameno mpe tatamaneno mu sambila ngatu lwalembo kota mu ntontolo.”

47 Ka timanisina mu zonza ko, tala! pôka dia bantu na muntu wu beri tâka Yuda, wumosi mu ba 12 weri ba twarisaka, mpe wapusana he Yezu mu mu hana bize. 48 Kâ Yezu wamutêla: “Yuda, ngano Mwana muntu ta teka mu bize?” 49 Bô bamuzungirila bu bamona misamu mieri tulaka, batâ: “Mfumu, ngano tufweti sarila mbele?” 50 Wumosi mu bawu wawinda mbele kwe ngamba ya mfumu-nganga-nzambi, mpe wamuzenga kutu dia lubakala. 51 Kâ Yezu watâ: “Bîkeno, seno kwa bo.” Wasimba kutu dia ngamba yo mpe wamuwasisa. 52 Buna Yezu watâ kwe mfumu za banganga-nzambi, kwe kapitene za tempelo na kwe bakuluntu bayizi mu kanga: “Ngano meno lwizi kanga na mbele na mibota ntiana mwivi? 53 Bu ndieri na beno bilumbu biabiansoni mu tempelo ka lwakunkanga ko. Kâ yi ni ntangu’eno na ya lutumu lwa mpimpa.”

54 Buna bamukanga, bamunata, mpe bamukotesa mu nzo ya mfumu-nganga-nzambi; kâ Piere ha manima keri kwe landi ha titini tia mwa tia tila. 55 Bu banamisa tiya ha kati-kati dia lupangu, bazakala tintwari, Piere wazakala na bawu. 56 Kâ tisari timosi tia tikento bu kamumona wa zakala ha ndeko tiya, watomo mu sungamana mpe watâ: “Bakala di na yandi mpe keri.” 57 Kâ wakala bu katâ: “Mukento, ka nimuzebi’â ko.” 58 Ntangu fioti ha manima, muntu wakaka wamumona mpe watâ: “Nge mpe wumosi mu bawu wena.” Kâ Piere watâ: “Bakala, ka meno’â ko.” 59 Ha manima ma heure yimosi, muntu wumosi wavutu tomo singasa: “Diangana bakala di na yandi mpe keri, mu bungu ti Musi-Galile wena!” 60 Kâ Piere watâ: “Bakala, misamu mi ta tâ ka nzebi’â mio ko.” Mpe hô nkatika bendo, ka timanisina ko mu zonza, nsusu yakuba. 61 Buna Mfumu wabaluka mpe watala Piere, mpe Piere wabambukila misamu mia mu têla Mfumu: “Ntete nsusu yakuba lumbu ti, mbo kunkala mbala tatu.” 62 Waduka ku mbazi mpe waye tomo dila.

63 Bantu beri kêlaka Yezu babatika mu mu sehesela na mu mu twa; 64 bu bamana mu kanga tidiri, ni beri mu yulaka: “Bikula! Nani ku twiri?” 65 Mpe batâ misamu miakaka miamingi mu mu finga.

66 Bwisi bu bwatia, timvuka tia bakuluntu ba nsi, mfumu za banganga-nzambi, na bitsoniki bavukana mpe bamunata mu nzo yikutakanaka Sanedre, mpe batâ: 67 “Tu têla tala ti nge ni Kristo.” Kâ wabavuturila: “Ni bu sa ti nilutêlele, kani kabwe ka lukwikila ko. 68 Mpe tala ti niluyuriri biyuvu, ka luhana mvutu ko. 69 Kâ, tûka bwawu bu Mwana muntu mbo kazakala ha koko kwa lubakala kwa Nzambi ye na ngolo.” 70 Babansoni ni batâ: “Buna nge ni Mwana wa Nzambi?” Wabatêla: “Beno beni lutêle ti meno ni Mwana wa Nzambi.” 71 Batâ: “Mu bungu dia nti tuvutu dingila timbangi tiakaka? Mu bungu ti beto beni mia tuwîri mu munwa’andi.”