Kwe Bisi-Filipe

1 Paulo na Timote, ngamba za Kristo Yezu, kwe basantu babansoni bê mu bumosi na Kristo Yezu, bê ku Filipe, na kwe minkengi na bibakisi mu tisalu.

2 Bîka lwabaka bweso bwa nzitukulu na tidzunu bitûkaka kwe Nzambi Tata’eto, na kwe Mfumu Yezu Kristo.

3 Ntangu zazansoni, Nzambi’ani nitondaka bu nilubambukilaka beno bansoni 4 mu ndiawululu zani zazansoni. Muna ndiawululu nisaka na nsayi, 5 mu tisalu ti lwasariri mu bungu dia nsangu za mbote tûka tilumbu tia ntete tii bwawu bu. 6 Mu bungu ti lukwikulu lwe nani mu musamu ewu: Yandi wabatikiri tisalu tia mbote mu beno, mbo kamanisa tio tii mu tilumbu tia Kristo Yezu. 7 Wa delakana wena kwe meno mu banzila bo mu beno bansoni, mu bungu ti mu mutima’ani lwena. Beno lwakabane bweso bwa nzitukulu bwa Nzambi na meno, mu chaîne zani za ku boloko, mu nwanina nsangu za mbote, na mu zabikisa zo ku tribinale.

8 Diangana, Nzambi zebi ka bwe nita dingila mu lu mona beno bansoni. Beno nzololo ntiana bu lu zololo Kristo Yezu. 9 Mpe musamu wu nita tatamana mu sambirila ni ewu: luzolo lweno lwatatamana mu sampa mu luzabu lwa matieleka na mu lenda dia swasikisa dia lunga; 10 mu zaba bima biyôkele mfunu ngatu lwabâ ba verela mpe ka lutêsandi muntu kuba tii mu tilumbu tia Kristo; 11 mpe lwabâ ba fuluka mu mbutu ya buderede yitûkaka kwe Yezu Kristo, mu mukembo na nsangu za Nzambi.

12 Bampangi, nzololo lwazaba ti musamu’ani bwawu bu wusiri ti nsangu za mbote zenda ku matu. 13 Buna chaîne zani za ku boloko mu bungu dia Kristo zazabakane kwe babansoni ha kati dia minkengi mia Mutinu wa ku Rome na kwe bakaka. 14 Bwawu bu, mpangi zazîngi za Mfumu zayikiri na lukwikulu mu bungu dia chaîne zani za ku boloko, mpe butindi bata tomo songela mu zonzela nsangu za Nzambi na kondo kwa bunkuta.

15 Wa matieleka, bakaka diki kwa na timbanda bita ba tuma mu samuna Kristo, kâ bakaka na mabanza ma mbote basilaka bo. 16 Kristo basamunaka mu luzolo, bu bazebi ti ni meno basola mu nwanina nsangu za mbote. 17 Kâ ba ntete mbo basilaka bo mu bakana, ka na mabanza ma mbote’â ko mu bungu ti wê nawu bakumbutila misamu bu ndiena ku boloko. 18 Ngano ndandu ni ye? Ni bu wubâ mu mabanza ma mbi peleko mu matieleka, Kristo yandi bata samuna mpe nsayi wuta kuntâ. Diangana, mbo nitatamana mu yangalala, 19 mu bungu ti nzebi ti mbo wunata mvukulu’ani mu nzila ya ndiawululu zeno na ya lubakusu lwa mpeve ya Yezu Kristo. 20 Wudelakane na musamu wu nita tomo kekolo, mpe tivuvu tie nani ti ka nifwa nsoni ko, kâ na timpwanza tiatiansoni tia zonzela ntiana bu wutoko bêlaka, bwawu bu Kristo mbo kakemboso mu nzila ya nitu’ani mu luzingu peleko mu lufwa.

21 Mu bungu dia meno luzingu lwani ni Kristo, mpe lufwa lwani ndandu yena. 22 Tala ti mfweti tatamana mu zinga mu nitu yi, ndendi tatamana mu sala tisalu tiani tia mbote, kâ tima ti nisola ka nzebi’â tio ko. 23 Misamu miole mita kunzungasa mutu; wê nani nakûluka, mpe nabâ na Kristo. Diangana, misamu ni mio miyôkele bubote. 24 Kâ kwe meno nguria mfunu wena mu tatamana mu bâ wa moyo mu nitu yi mu bungu dia beno. 25 Buna, lukwikulu lwe nani mu musamu ewu: nzebi ti mbo nitatamana mu bâ na beno ngatu lwenda ku matu, mpe lwabâ na nsayi mu timinu. 26 Bu nivutu bâ na beno, lukwikulu lweno mu Kristo Yezu mbo luvutu kula mu nzila ya meno.

27 Wufwanakane lwadiatila mu mpila yidelakane na nsangu za mbote zitariri Kristo, ngatu ni bu sa ti ndizi lu tala, peleko ka ndiena na beno ko, nawâ ti ba kangama lwena mu mpeve yimosi na mu tilundi timosi* mu nwana tintwari mu bungu dia timinu mu nsangu za mbote, 28 na mu lembo bâ na bunkuta mu mbeni zeno. Kondo kwa bunkuta kweno tidimbu tiena tia mfukulu’awu, kâ tidimbu tia mvukulu’eno tiena; mpe tidimbu tio kwe Nzambi titûkaka. 29 Mu bungu ti lwabakiri bweso mu tûla timinu tieno mu Kristo, kâ mpe mu mona mpasi na yandi. 30 Mu bungu ti mpasi zi nanweni na zo, ni zo kwa mpe luta nwana na zo, mpe ntiana bu luta wa wâ bwawu bu, mpasi ni zo kwa mpe nita tatamana mu nwana na zo.