Matie
1 Buku dia tinsamu* tia Yezu Kristo,* mwana Davide, mwana Abrahame:
2 Abrahame wayizi bâ tata dia Izake;
Izake wayizi bâ tata dia Yakobe;
Yakobe wayizi bâ tata dia Yuda na mpangi zandi;*
3 Yuda wayizi bâ tata dia Pereze na Zera ba kabuta na Tamare;
Pereze wayizi bâ tata dia Ezrone;
Ezrone wayizi bâ tata dia Rame;
4 Rame wayizi bâ tata dia Aminadabe;
Aminadabe wayizi bâ tata dia Nasone;
Nasone wayizi bâ tata dia Salmone;
5 Salmone wayizi bâ tata dia Boaze wu kabuta na Rabe;
Boaze wayizi bâ tata dia Obede wu kabuta na Rute;
Obede wayizi bâ tata dia Yese;
6 Yese wayizi bâ tata dia mutinu Davide;
Davide wayizi bâ tata dia Salomo wu kabuta na mukento wa Uriya;
7 Salomo wayizi bâ tata dia Roboame;
Roboame wayizi bâ tata dia Abiya;
Abiya wayizi bâ tata dia Aza;
8 Aza wayizi bâ tata dia Yehozafate;
Yehozafate wayizi bâ tata dia Yorame;
Yorame wayizi bâ tata dia Uziya;
9 Uziya wayizi bâ tata dia Yotame;
Yotame wayizi bâ tata dia Akaze;
Akaze wayizi bâ tata dia Ezekiase;
10 Ezekiase wayizi bâ tata dia Manase;
Manase wayizi bâ tata dia Amone;
Amone wayizi bâ tata dia Yoziase;
11 Yoziase wayizi bâ tata dia Yekoniase na mpangi zandi, ntete ntangu yi banata Bayuda ku Babilone.
12 Bu bamana ba nata ku Babilone, Yekoniase wayizi bâ tata dia Selatiele;
Selatiele wayizi bâ tata dia Zorobabele;
13 Zorobabele wayizi bâ tata dia Abiyude;
Abiyude wayizi bâ tata dia Eliakime;
Eliakime wayizi bâ tata dia Azore;
14 Azore wayizi bâ tata dia Zadoke;
Zadoke wayizi bâ tata dia Akime;
Akime wayizi bâ tata dia Eliude;
15 Eliude wayizi bâ tata dia Eleazare;
Eleazare wayizi bâ tata dia Matane;
Matane wayizi bâ tata dia Yakobe;
16 Yakobe wayizi bâ tata dia Yozefe bakala dia Maria, nguri ya Yezu wu batâka Kristo.
17 Buna, tûka Abrahame tii Davide kwayizi bâ mbandu 14; tûka Davide tii bu banata Bayuda ku Babilone, mbandu 14; mpe tûka bu banata Bayuda ku Babilone tii Kristo, mbandu 14.
18 Mbutukulu ya Yezu Kristo ebu yabâ: Mu ntangu nguri’andi Maria yi bamukanisina makwela kwe Yozefe, wayizi baka zimi mu ngolo za mpeve santu, ntete bakwelana. 19 Kâ, mu bungu ti Yozefe bakala diandi wa sungama weri, mpe ka zolo’â ko mu mu fwisa nsoni ha meso ma bantu, wadinga mu hambana* nandi mu mansweki. 20 Bu kamana dimbitila mu misamu mio, tala! Mbazi ya Yehova* yayizi mu monekena mu ndozi mpe yatâ: “Yozefe, mwana Davide, kubândi na bunkuta mu tûla mukento’aku Maria mu nzo’aku, mu bungu ti zimi die nandi* mu nzila ya mpeve santu kabakiriri dio. 21 Mbo kabuta mwana wa bakala, mpe nge fweti mu hana nkumbu Yezu,* mu bungu ti mbo kavukisa kanda diandi mu masumu mawu.” 22 Mio miamiansoni miatula mu lungisa misamu mia tâ Yehova mu nzila ya mbikuri’andi, bu katâ: 23 “Tala! Ndumba mbo kabaka zimi, mbo kabuta mwana wa bakala mpe mbo bamutâ nkumbu Emanuele,” tala ti babanguri yo, yizololo tâ, “Nzambi ni kê neto.”
24 Buna Yozefe wavumbuka ku tolo, walanda lutwalusu lwa mu hana mbazi ya Yehova, mpe watûla mukento’andi mu nzo’andi. 25 Kâ, Yozefe ka vukasa nitu na yandi ko tii bu kayizi buta mwana wa bakala, mpe bamuhana nkumbu Yezu.