Matie
2 Ha manima ma mbutukulu ya Yezu, ku Beteleyeme ya Yude, mu ntangu ya mutinu Erode,* bantu batangaka mbwetete* batûka ku este bayiza ku Yerusaleme, 2 batâ: “Ngano mutinu wa Bayuda wabutukiri kwe kena? Mu bungu ti lubwetete lwandi tamweni bu tabêle ku este, mpe ni yandi twizi kembela.” 3 Bu bawâ bo, mutinu Erode na Yerusaleme ya mukaka ni batsatsa. 4 Buna, wakutakasa mfumu zazansoni za banganga-nzambi na bitsoniki biabiansoni, mpe wabayula mbuka Kristo* yi kafweti butukila. 5 Bamutêla: “Ku Beteleyeme ya Yude mu bungu ti mbikuri ni bo katsoneka: 6 ‘Mboko nge, ô Beteleyeme ya ku nsi ya Yuda, diangana ka wena mumvuka wa nguria wa fioti ko ha meso ma guvernere za Yuda, mu bungu ti ni mu nge mu dukila muntu wutwarisa kanda diani, Israele.’”
7 Ha manima Erode watâ mbila bantu batangaka mbwetete* mu mansweki, mpe watomo ba yula ntia ntangu yaduka lubwetete. 8 Bu kabatambika ku Beteleyeme, watâ: “Yendeno lwatomo dinga mwana wo, bu lumumona, yizeno lwakuntêla ngatu meno mpe ndienda namukembela.” 9 Bu bamana wirikila mutinu, bayenda, mpe lubwetete lu bamona bu beri ku este lwabatwarisa tii bu lwaye kangama ku zulu, ha mbuka yeri mwana. 10 Bu bamona lubwetete, batomo yangalala. 11 Bu bakota mu nzo, bamona mwana na nguri’andi Maria, bafukama mpe bakondama mu mu kembela, bazibula bimvwama biawu, mpe bamuhana makabu: ore, encens na mire.* 12 Kâ, mu bungu ti Nzambi wabalwengesa mu ndozi mu lembo kâla kwe Erode, bakâla ku nsi’awu mu nzila yakaka.
13 Bu bamana kwenda, mbazi ya Yehova yamonekena Yozefe mu ndozi, yatâ: “Telama, bonga mwana na nguri’andi, mpe diokeno ku Ezipte, bêno kô tii bu nikuzonzela, mu bungu ti Erode mwana kata kwe dingi mu mu honda.” 14 Buna Yozefe watelama mu mpimpa, wabonga mwana na nguri’andi, mpe bayenda ku Ezipte. 15 Wabâ kô tii bwa fwa Erode, buna musamu wa tâ Yehova mu nzila ya mbikuri’andi walungana, bu katâ: “Ntêle mwana’ani mbila mu duka ku Ezipte.”
16 Erode watomo baka nkesi bu kamona ti bantu batangaka mbwetete* bamuhuna. Dieka bo, wahana ntumunu ya honda bala ba babakala babansoni beri na mvula zole tii ku banda, ku Beteleyeme na ku mahata meri pene-pene, wasila bo mu bungu ti wadelakana na ntangu ya duka lubwetete, ntiana bwa mu têla wo bantu batangaka mbwetete.* 17 Buna musamu watâ mbikuri Yeremi walungana bu katâ: 18 “Zu diwakane ku Rama, bidilu na maniongo ma ngolo, Rashele ta dila bala bandi, ka ta zolo ko bamubomba, mu bungu ti ka basiri’â ko.”
19 Erode bu kafwa, mbazi ya Yehova yamonekena Yozefe mu ndozi ku Ezipte 20 mpe yatâ: “Telama, bonga mwana na nguri’andi, mpe yendeno ku nsi ya Israele, mu bungu ti bô beri dingaka lufwa* lwa mwana bafwiri.” 21 Buna watelama, wabonga mwana na nguri’andi, mpe bakâla ku Israele. 22 Kâ, bu kawâ ti ni Arikelawuse weri tumaka ku Yude ha tibuka tia tata’andi Erode, bunkuta bwamubaka mu kwenda kô, mpe mu bungu ti Nzambi wamulwengesa mu ndozi, wayenda ku Galile. 23 Waye bâ ku mumvuka wu batâka Nazarete, ngatu misamu mia tâ bambikuri mialungana: “Mbo bamutâ Musi-Nazarete.”*