Kwe Bisi-Filipe
3 Mu manisa bampangi, tatamaneno mu yangalala mu Mfumu. Ka wena musamu wa mpasi ko kwe meno mu vutu lu tsonekena misamu mi natoko lu tsonekena, mpe mu bungu dia mbote ya beno beni nita sila bo.
2 Seno keba mu bambwa, seno keba kwe bô batulumunaka mbi, seno keba kwe bô bazengozolaka nitu. 3 Mu bungu ti ni beto twe mu nkatika nkesolo,* ni beto tusalaka tisalu tia santu mu nzila ya mpeve ya Nzambi, tutilwonaka mu Kristo Yezu, mpe ka tusikamasaka lukwikulu lweto ko mu tinsuni, 4 kâ yôka bantu babansoni, mpemba ye nani mu bâ na lukwikulu mu tinsuni.
Tala ti muntu wubenzi ti mpemba ye nandi mu bâ na lukwikulu mu tinsuni, meno nimuyôkele. 5 Bakunzenga sutu mu tilumbu tia 8, Mwana-Israele ndiena mu kanda dia Benyamine, Ebre yabutukila mu kanda dia Baebre, Farize ndiena mu musamu wutariri musiku; 6 nayizi kwamisa timvuka na luhemo lwalwansoni, mu musamu wutariri buderede busikamanaka mu musiku, nayizi bâ muntu wu balendi lembo semba. 7 Kâ bima biabiansoni bieri mfunu kwe meno, natamburi mu hombesa bio mu bungu dia Kristo. 8 Diangana, ndieka bongela bima biabiansoni ntiana bima bia mpamba-mpamba mu bungu dia luzabu luyôkele ntalu lwa Kristo Yezu Mfumu’ani, mu bungu dia yandi ngombese bima biabiansoni, mpe ndieka bia bongela ntiana mvindu* mu baka Kristo 9 na mu bâ tintwari na yandi, ka mu bungu dia buderede bwa me beni’â ko butûkaka mu lutumamanu lwani mu musiku, kâ mu buderede mu nzila ya timinu mu Kristo, buderede butûkaka kwe Nzambi busikamane mu timinu. 10 Nsatu’ani ni mu zaba Kristo na ngolo za mvumbukulu’andi, na mu mona mpasi zi kamona bu nitambula mu fwa ntiana yandi, 11 ngatu namona tala ti ndendi bwa bweso bwa baka mvumbukulu ya bafwa ya ntete.
12 Ka ndieka’eti baka musendo wango ko, mpe ka ndieka’eti bâ wa lunga ko; kâ ngolo nita sarila mu tomo lungisa misamu miasa ti Kristo Yezu kakunsola.* 13 Bampangi, ka nita banza ko ti musendo wa natibakiri, kâ musamu wu ndie na lukwikulu ni ewu: nzimbakane bima bie ku manima, mpe ntûriri mutima mu bio bie ku matu. 14 Ngolo nita sarila mu lungisa kani dia baka musendo wa kwe bâ ku zulu, wu hanaka Nzambi mu nzila ya Kristo Yezu. 15 Dieka bo, bô babansoni bê ba yela ha kati dieto bafweti bâ na mabanza mo; tala ti bakaka ha kati dieno mabanza ma swaswana me nawu, Nzambi mbo kaluzabikisa mabanza ma mbote. 16 Ntono ngolo zi tusiri mu kwenda ku matu, tatatamaneno mu diatila mu nzila yo.
17 Bampangi, beno bansoni landeno tifwani tiani, mpe tûleno meso meno kwe bô balandaka tifwani ti talusisiri. 18 Babingi bê kô badiatilaka ntiana mbeni za Kristo, na za poto diandi* dia matimuna,* bawu ndieri vulu zonzelaka, kâ bwawu bu na mansangaza nita ba zonzela. 19 Nsukunu’awu ni mfukulu, Nzambi’awu ni mioyo miawu, mukembo’awu ni nsoni zawu, mpe bima bie ha mutoto kwa babanzaka. 20 Kâ beto nsi’eto ni ku mazulu, mpe na timina tuta kêla muvukisi wutûka ku zulu, Mfumu Yezu Kristo. 21 Yandi titula nitu zeto zilembolo nsangu, ngatu zabâ ntiana* nitu’andi ya mukembo mu nzila ya ngolo zandi za nzitukulu, zimuhanaka lenda dia tûla bima biabiansoni mu lutumu lwandi.