Kwe Bisi-Rome
10 Bampangi, misamu mi nzololo mu mutima’ani na mi nilombaka mu lusambulu kwe Nzambi ni miena’eti kanda diani diabaka mvukulu. 2 Mu bungu ti timbangi nitâka mu bawu ti luhemo lwe nawu mu Nzambi, kâ ka bena na luzabu lwa matieleka ko. 3 Mu bungu ti ka bazebi’â buderede bwa Nzambi ko, buderede bwa bawu beni basarilaka, ka batumamanaka buderede bwa Nzambi ko. 4 Kristo watûla nsuka mu musiku, buna muntu ni muntu wusarilaka timinu mu yandi mbo bamutâ wa sungama.
5 Mu musamu wutariri buderede butûkaka mu Musiku, Mose watsoneka: “Muntu wusarilaka misamu mio mbo wuzinga mu nzila ya misamu mio.” 6 Kâ buderede butûkaka mu timinu butêle: “Kutândi mu mutima’aku: ‘Nani kwenda ku zulu?’ wuzololo tâ, mu kwe kokesa Kristo, 7 peleko, ‘Nani kôka mu bulu dia dila?’* wuzololo tâ, mu kwe dukisa Kristo kwe ba fwa.” 8 Kâ ngano matsonoko bwe matâka? “Zu pene-pene diena na nge, mu munwa’aku na mu mutima’aku;” wuzololo tâ “zu” dia timinu di tuta kwe samuni. 9 Tala ti mu munwa’aku têle ha meso ma bantu ti Yezu ni Mfumu, mpe sariri timinu mu mutima’aku ti Nzambi wamuvumbula kwe ba fwa, mbo vûka. 10 Mu bungu ti ni mu mutima muntu wusarilaka timinu ngatu kabâ wa sungama, kâ ni mu munwa kasingasaka timinu tiandi ha meso ma bantu ngatu kavûka.
11 Matsonoko mbo matâka: “Muntu ni muntu wutûla timinu mu yandi ka wufwa nsoni ko.” 12 Ka kwena luswaswanu ko ha kati dia Muyuda na Greke, babansoni Mfumu yimosi kwa ye nawu. Lubakusu katomo hanaka kwe bantu babansoni bamutâka mbila. 13 Mu bungu ti “bô babansoni babingula nkumbu ya Yehova* mbo bavûka.” 14 Kâ, bwe bamubingurila tala ti ka bena na timinu mu Yandi ko? Bwe babêla na timinu mu Yandi tala ti ka beka’eti mu wîla nsangu ko? Mpe bwe bawîla nsangu tala ti muntu kâni wuta samuna? 15 Bwe basamunina tala ti ka babatambikiri’â ko? Ntiana bu watsonama: “Malu ma bô basamunaka nsangu za mbote ma toma mena.”
16 Kâ babansoni ka batumamana nsangu za mbote ko. Mu bungu ti Izayi watâ: “Yehova,* nani wakwikiri misamu mi kawîri kwe beto?” 17 Diangana, timinu mu misamu mi wâka muntu titûkaka, mpe mio mi wâka muntu mu nsangu zitariri Kristo mitûkaka. 18 Kâ yula nita yula: Ngano ka batomono’â mia wâ ko? Diangana mia bawîri. Wa matieleka, “lwaza lwawu lwayangane ha mutoto wa mukaka, mpe nsangu zawu zaturiri tii kwa sukina mutoto nsi ku bâka bantu.” 19 Kâ yula nita yula: Ngano Israele ka bakula wo ko? Ntete Mose têle: “Mbo nitulumuna timbanda tieno mu nzila ya kanda diakaka, mbo nitulumuna nkesi zeno za ngolo mu nzila ya kanda dilembolo na ndwenga.” 20 Kâ Izayi na butindi bwabwansoni têle: “Bô balembo kundingaka bakumweni; monekene kwe bô balembo kundiyulaka.” 21 Kâ yandi têle mu bungu dia Israele: “Tilumbu tia mukaka ndamburi moko mani kwe kanda die na bukolo na tungu.”