Kwe Bisi-Galate
1 Meno Paulo ndie ntumwa, ka mu nzila ya muntu’â ko peleko ya bantu bakunoma, kâ ni mu nzila ya Yezu Kristo na ya Nzambi, Tata wamuvumbula kwe ba fwa, 2 na mpangi zazansoni zê tintwari na meno, mbote tuta hana kwe bimvuka bie ku Galate:
3 Bîka lwabaka bweso bwa nzitukulu na tidzunu titûkaka kwe Nzambi Tata’eto na kwe Mfumu Yezu Kristo. 4 Yandi watihana mu bungu dia masumu meto, ngatu katukûla mu nza* yi ya mbi, tintwari na luzolo lwa Nzambi, Tata’eto. 5 Bîka Nzambi kabaka mukembo ntangu zazansoni. Amen.
6 Ntomono yituku mu mona ti mu ntinu lwatekele nima kwe Wô walutêle mbila mu nzila ya bweso bwa nzitukulu bwa Kristo, mpe lwalendi nsangu za mbote zakaka. 7 Ka wuta zolo tâ ko ti nsangu za mbote zakaka zê kô; kâ bantu kwa bê kô bata kotesa vwandi ha kati dieno, mpe bata dinga mu bebesa nsangu za mbote zitariri Kristo. 8 Kâ ni bu sa ti mosi mu beto peleko mbazi yitûkiri ku zulu yilusamunini nsangu za mbote zitariri musamu wumosi wuta lembo kwelana na nsangu za mbote zi talusamunina, yandi kabâ wa loko. 9 Ntiana bu tatokolo wa tâ, mvutulu wa kârila bwawu bu: muntu ni muntu wulusamunina nsangu za mbote zitariri musamu wuta lembo kwelana na mio mi lwatambula, muntu wo kabâ wa loko.
10 Ngano bwawu bu bantu nita yêla mu wisa, peleko Nzambi? Peleko bantu nita yêla mu tâ nsayi? Namana tatamana mu tâ bantu nsayi, ka nibâ ngamba ya Kristo ko. 11 Bampangi, nzololo lwazaba ti nsangu za mbote zi nalusamunini ka zitûkiri’â kwe bantu ko; 12 mu bungu ti ka nabaka zo kwe muntu ko mpe ka bakundongesa zo ko, kâ ni mu nzila ya nzabukusu ya Yezu Kristo nabakila zo.
13 Wa matieleka, nsangu za ndiatulu’ani ya ntama za lwawîri bu ndieri mu dibundu dia Bayuda. Na ngolo zazansoni* ndieri kwamisaka mpe ndieri mwangasaka timvuka tia Nzambi. 14 Kula mpe ndieri tomo kulaka mu dibundu dia Bayuda yôka bantu ba tweri mvula zimosi mu kanda diani, mu bungu ti luhemo lwalwingi lwabâ nani mu bungu dia tikulu tia batata bani. 15 Kâ Nzambi, yandi wakundukisa mu moyo wa nguri’ani mpe wakuntâ mbila mu nzila ya bweso bwandi bwa nzitukulu, wamweni ti musamu wa mbote wena 16 mu zabikisa mwana’andi mu nzila’ani ngatu nasamuna nsangu za mbote zimutariri kwe makanda, hô nkatika bendo ka nadinga mabanza ma muntu* ko; 17 ka nadinga ko mpe mu naka ku Yerusaleme kwe bantu beri bantumwa ntete meno, kâ nayenda ku Arabi mpe ha manima na kâla ku Damase.
18 Ha manima ma mvula zitatu, nanaka ku Yerusaleme mu kwe tala Sefase,* mpe bilumbu bia 15 nayôkesa na yandi. 19 Kâ ka namona na kani ntumwa yakaka ko, Zaki kwa namona, mpangi ya Mfumu. 20 Bwawu bu taleno! Ha meso ma Nzambi nilutêlele ti misamu mi nita lu tsonekena ka miena mia bungungu ko.
21 Ha manima, nayenda ku bizunga bia Siri na bia Silisi. 22 Kâ bimvuka bia ku Yude bieri mu bumosi na Kristo ka biakunzaba ko. 23 Nsangu kwa beri wâka: “Muntu wo weri tu kwamisaka, bwawu bu nsangu za mbote kata samuna zitariri timinu ti keri dingaka mu honda.” 24 Buna, babatika mu kembela Nzambi mu bungu dia meno.