Marke
12 Buna wabatika mu ba zonzela mu nzila ya bifwani: “Bakala dimosi diakuna musitu wa vinu, wazunga wo mu tikaku, kûna watima bulu di bakamuninaka vinu, mpe watungisa nzo ya zangama. Ha manima wahana wo kwe bantu basalaka misitu ngatu bafutila wo, mpe wayenda ku nsi ya bunzenza. 2 Ntangu bu yafwana, watambika ngamba’andi kwe bisari bia misitu mu kutakasa mbutu za vinu mu bungu dia yandi. 3 Kâ bamubwila, bamuhana nkuba mpe bamukarisa moko mpamba. 4 Wavutu ba tambikila ngamba yakaka, kâ bamutwa ku mutu mpe bamufwisa nsoni. 5 Watambika ngamba yakaka, kâ bamuhonda. Watambika babingi bakaka, kâ bakaka babahana nkuba mpe bakaka babahonda. 6 Muntu wumosi wasâla nandi, mwana wu katomo zolo. Ku nsuka, wamutambika mu bungu ti wabanza ti: ‘Mbo bazitisa mwana’ani.’ 7 Kâ bisari bio bia misitu biatâ bawu na bawu, ‘Muntu wubiarila fwa ewu ni yandi. Yizeno tamuhonda mpe fwa mbo dibâ dia beto.’ 8 Buna bamubwila, bamuhonda mpe bamulosa ku mbazi ya musitu wa vinu. 9 Ngano mfumu ya musitu wa vinu nti kasa? Mbo kakwiza, mbo kahonda bisari bia misitu mpe mbo kahana musitu wa vinu kwe bantu bakaka. 10 Ngano ka lwatanga Matsonoko ema ko: ‘Tari dia losa bitungi bia nzo diayikiri tari di sikamanaka nzo. 11 Musamu wo kwe Yehova* wutûkiri, mpe wa nzitukulu wena ha meso meto’?”
12 Badinga mu mu bwila,* kâ pôka dia bantu beri tînaka, mu bungu ti babakula ti tifwani tio mu bungu dia bawu katêla tio. Buna bamubîka mpe bayenda.
13 Ha manima bamutambikila mwa tikunku tia Bafarize na bantu bakaka ba Erode ngatu bamutambakasa mu nzonzolo’andi. 14 Bu batula, bamutêla: “Mulongi, tuzebi ti matieleka tâka, mpe kudingaka ko ti bantu bakutambula, mu bungu ti kutalaka kwa mpila yi monekenaka bantu ko, kâ nzila ya Nzambi longesaka na matieleka. Ngano wa delakana wena mu futa mpaku kwe Sezare peleko kâni? 15 Ngano tufweti futa peleko kâni?” Bu kabakula bungungu bwawu, Yezu wabavuturila: “Mu bungu dia nti luta kuntontela? Kunatineno denie* yimosi.” 16 Banata yimosi, mpe yandi wabatêla: “Tidiri ti na bitsono bi bia nani biena?” Bawu bamuvuturila: “Bia Sezare.” 17 Buna Yezu watâ: “Kariseno bima bia Sezare kwe Sezare, kâ bima bia Nzambi kwe Nzambi.” Mpe bayituku mu mvutu’andi.
18 Ha manima, Basaduseye batâka ti ka kwena mvumbukulu ya ba fwa ko, bayiza mpe bamuyula: 19 “Mulongi, Mose watutsonekena ti, tala ti bakala dia kwela difwiri mpe ka sisiri’â mwana ko, mpangi’andi fweti bonga mukento wo ngatu kabutila yaya’andi bala. 20 Kweri na mpangi 7 za bakala. Ya ntete wakwela mukento, kâ bu kafwa ka sa sisa bala ko. 21 Mpe mpangi ya nzole yakwela mukento wo, kâ wafwa mpe ka sisa bala ko, mpe musamu ni bo kwa mpe wayôkela mu bungu dia mpangi ya ntatu. 22 Mpe ba 7 ka basisa bala ko. Ku nsuka mukento mpe wayizi fwa. 23 Ku mvumbukulu ya ba fwa, mukento wa nani wubâ? Mu bungu ti ba 7 bamukwela.” 24 Yezu wabatêla: “Ntiangu luta wubakana, mu bungu ti ka luzebi’â Matsonoko na ngolo za Nzambi ko. 25 Mu bungu ti bu bavumbuka kwe ba fwa babakala ka bakwela ko mpe bakento ka babahana mu makwela ko, kâ mbo babâ ntiana bambazi ku mazulu. 26 Mu musamu wutariri mvumbukulu ya ba fwa, ka lwatanga mu buku dia Mose ko, mu tinsamu titariri muti wa nsende, Nzambi bu kamutêla: ‘Meno ni Nzambi ya Abrahame, Nzambi ya Izake, na Nzambi ya Yakobe’? 27 Kena Nzambi ya bantu ba fwa ko, kâ ya bantu ba moyo. Nkatika wubakana luta wubakana.”
28 Titsoniki timosi tiapusana mpe wawâ timoko tiawu. Bu kazaba ti mu mpila ya mbote kabahanina mvutu, wamuyula: “Ntia ntumunu ye ya ntete* mu zazansoni?” 29 Yezu wavutula: “Ya ntete ni eyi, ‘Wâ, ô Israele, Yehova* Nzambi’eto wumosi kwa wena Yehova,* 30 mpe fweti zolo Yehova* Nzambi’aku mu mutima’aku wawansoni, mu tilundi* tiaku tiatiansoni, mu mabanza maku mamansoni na mu ngolo zaku zazansoni.’ 31 Ya nzole ni eyi: ‘Fweti zolo mpwana’aku ntiana nge beni.’ Ka kwena ntumunu ziyôkele ntumunu zo ko.” 32 Titsoniki tiamutêla: “Mulongi, bubote zonzele; tintwari na matieleka, ‘Wumosi kwa wena, mpe katula Yandi, wakaka kena kô ko’; 33 mpe zolo Nzambi mu mutima’eto wawansoni, mu mayela meto mamansoni, mu ngolo zeto zazansoni, mpe zolo mpwana’eto ntiana beto beni, wuyôkele mikayulu miamiansoni mia yoko na miakaka.” 34 Buna Yezu bu kamona ti wahana mvutu na mayela mamansoni, wamutêla: “Kwena mala na Timfumu tia Nzambi ko.” Ha manima ka kwavutu’â bâ muntu ko wabâ na butindi bwa mu yula tiyuvu.
35 Kâ, Yezu bu katatamana mu longesa mu tempelo, watâ: “Mu bungu dia nti bitsoniki bitêlaka ti Kristo ni mwana Davide? 36 Mu lutumu lwa mpeve santu, Davide yandi beni watâ: ‘Yehova* têle kwe Mfumu’ani: “Zakala ku lubakala lwani tii bu nitûla mbeni zaku ku nsi’a malu maku.”’ 37 Davide yandi beni Mfumu kata mu tâ, buna bwe kalendi vutu bêla mwana’andi?”
Mpe yungi dia bantu yandi dieri wirikilaka na nsayi yayansoni. 38 Bu keri longesaka wavutu tâ: “Seno keba mu bitsoniki bazoloko mu kwe yakambe na robe zawu za zila, bazololo babahanaka mbote ha mazandu 39 mpe chaise za ntete bazoloko mu sinagoge na mbuka za nguria mfunu* bu badiaka mu nkokela. 40 Nzo* za mifwiri mia mikento bawukaka, mpe mu songela ti bawu ni bawu tusambulu twa tula basaka. Mbo babaka mfundusu ya ngolo.”*
41 Ha manima yandi wayizi zakala ha matu ma kese ya makabu, mpe wabatika mu tala bwe pôka dia bantu dieri tûrilaka mbongo mu kese za makabu, mpe mvwama zazingi zeri tûlaka mipata miamingi. 42 Mufwiri wumosi wa wukento, weri mputu wayiza, mpe watûla mipata miole mia fioti mialembo bâ na ntalu* yayingi. 43 Buna watâ mbila milongoki miandi mpe wabatêla: “Wa matieleka nita lu têla, mufwiri wu mbongo zazingi katûriri yôka bô babansoni batûriri mbongo mu kese ya makabu. 44 Mu bungu ti babansoni bakaka ntenso’awu batûriri, kâ yandi wê mputu tûriri bio biabiansoni bie nandi, bio biabiansoni bibêle nandi mu zinga.”