Za

8 12 Ha manima Yezu wavutu ba zonzela bu katâ: “Meno ni mutsamina wa nza. Wô kundanda, kani kabwe ka diatila mu mpimpa ya ngolo* ko, kâ mbo kabâ na mutsamina wa luzingu.” 13 Buna Bafarize bamutêla: “Timbangi ta tâ mu nge beni; timbangi tiaku ka tiena tia matieleka ko.” 14 Yezu wabavuturila: “Ni bu sa ti timbangi nita tâ mu me beni, timbangi tiani tia matieleka tiena, mu bungu ti nzebi kwe natûka mpe kwe nita kwenda. Kâ beno ka luzebi’â ko kwe natûka mpe kwe nita kwenda. 15 Mu musunia* luta fundisila; meno ka nita fundisa muntu ko. 16 Kâ ni bu sa ti fundisa nita fundisa, mpila’ani ya fundisila ya matieleka yena, mu bungu ti ka ndiena me kaka ko, kâ Tata wakuntambika na meno kena. 17 Mpe, watsonama mu Musiku’eno ti: ‘Timbangi tia bantu bole tia matieleka tiena.’ 18 Meno, timbangi nita tâ mu me beni, mpe Tata wakuntambika timbangi kata tâ mu meno.” 19 Buna bamutêla: “Tata’aku kwe kena?” Yezu wabavuturila: “Ka lukunzebi’â ko mpe ka luzebi’â Tata’ani ko. Tala ti meno luzebi, mbo luketi zaba mpe Tata’ani.” 20 Watâ misamu mio ku mbuka yi balundilaka makabu, bu keri longesaka mu tempelo. Kâ ka muntu’â ko wamubwila, mu bungu ti ntangu’andi ka yatiturila ko.

21 Buna Yezu wavutu ba têla: “Meno ni mwendo’ani, mpe mbo lukundinga, kâ mbo lufwa mu bungu dia masumu meno. Kuma ku nita kwenda, ka lulendi’â kwa kwiza ko.” 22 Buna Bayuda babatika mu tâ: “Ngano honda katihonda? Mu bungu ti ebu kata tâ, ‘Kuma ku nita kwenda, ka lulendi’â kwa kwiza ko.’” 23 Wavutu ba têla: “Beno bantu ba mutoto lwena, meno muntu wa ku zulu ndiena. Beno bantu ba nza yi lwena; meno ka ndiena muntu wa nza yi ko. 24 Ntiangu nilutêlele: Mbo lufwa mu bungu dia masumu meno. Mu bungu ti tala ti ka lukwikiri’â ko ti meno ni yandi, mbo lufwa mu bungu dia masumu meno.” 25 Buna babatika mu mu têla: “Nge nani wena?” Yezu wabavuturila: “Bu tomo tala, mu bungu dia nti nita zonza na beno? 26 Misamu miamingi mie nani mi nitâ mu beno na mia fundisila. Diangana, Wô wakuntambika matieleka katâka, mpe misamu mi nawâ kwe Yandi, meno mu nza nitâka mio.” 27 Ka babakula ko ti Tata keri ba zonzelaka. 28 Buna Yezu watâ: “Bu lumana zangula Mwana muntu, buna mbo luzaba ti meno ni yandi mpe ka niyirikaka misamu mu lutumu lwa me beni ko; kâ ntiana kwa Tata bu kakundongesa, meno mpe misamu mi nita tâ. 29 Mpe Wô wakuntambika na meno kena; ka kundiambirika ko, mu bungu ti ntangu zazansoni misamu mimutâka nsayi niyirikaka.” 30 Bu keri tâka misamu mio, bantu babingi batûla timinu mu yandi.

31 Buna Yezu wavutu tâ kwe Bayuda bamukwikila: “Tala ti lutatamane mu landa zu diani, wa matieleka milongoki miani lwena, 32 mpe mbo luzaba matieleka, mpe matieleka mbo maluhana timpwanza.” 33 Bamuvuturila: “Beto bala ba Abrahame twena, mpe kani kabwe ka tabâ ngamba za muntu ko. Mu bungu dia nti ta têla, ‘Mbo lubâ na timpwanza’?” 34 Yezu wabavuturila: “Nkatika matieleka nita lu têla, muntu ni muntu wusarilaka disumu ngamba yena ya disumu. 35 Musamu wakaka, ngamba ka bâka mu kanda ko mankululu; mwana kwa bâka mô mankululu. 36 Buna tala ti Mwana lu heni timpwanza, mbo lutomo bâ na timpwanza. 37 Nzebi ti beno bala ba Abrahame lwena. Kâ meno luta dinga mu honda, mu bungu ti zu diani ka dita sala ko mu beno. 38 Misamu mi namona kwe Tata’ani nita tâ, kâ beno misamu mi lwawâ kwe tata’eno luta yirika.” 39 Bawu bamuvuturila: “Tata’eto ni Abrahame.” Yezu wabatêla: “Tala ti beno bala ba Abrahame lwena, mbo luketi sala bisalu bia Abrahame. 40 Kâ bwawu bu wê neno lwakungonda, meno muntu wuta lu têla matieleka ma nawîri kwe Nzambi. Abrahame ka sila bo ko. 41 Bisalu bia tata’eno luta sala.” Bawu bamutêla: “Ka twena bala ba bunsuza* ko; Tata dimosi kwa die neto, ni Nzambi.”

42 Yezu wabatêla: “Tala ti Nzambi Tata’eno diena, mbo luketi kunzolo, mu bungu ti kwe Nzambi natûka ntiangu ndie kû. Ka nayiza mu lutumu lwa me beni ko, kâ ni Yandi wakuntambika. 43 Mu bungu dia nti luta lembo bakurila misamu mi nita tâ? Mu bungu ti ka lulendi’â lwawâ zu diani ko. 44 Beno kwe tata’eno Diabulu lwatûka, mpe wê neno lwalungisa nsatu za tata’eno. Yandi wo, tûka ku mbatukulu bantu kahondaka, mpe ka simbirila matieleka ko mu bungu ti matieleka ka mena mu yandi ko. Bu katâka bungungu, nsinsa kazonzaka na timuntu tiandi, mu bungu ti ngungu yena mpe tata dia bungungu diena. 45 Kâ meno, mu bungu ti matieleka nilutêlele, ka luta kunkwikila ko. 46 Nani mu beno lendi kuntêla masumu ma ndirikiri? Tala ti matieleka nita tâ, mu bungu dia nti luta lembo kunkwikila? 47 Muntu wutûkiri kwe Nzambi, misamu mia Nzambi kawâka. Ntiangu luta lembo wâ, mu bungu ti ka lwatûka kwe Nzambi ko.”

48 Bayuda bamuvuturila: “Ngano ka twena na mpemba ko bu tuta tâ, ‘Nge Musi-Samaria wena mpe demo ye naku’?” 49 Yezu wavutula: “Ka ndiena na demo ko, kâ Tata’ani nita zitisa,* mpe beno meno luta vweza. 50 Kâ ka nita dinga mukembo wa me beni ko; Muntu wê kô ta wa dinga mu bungu dia meno, mpe mfundisi yena. 51 Nkatika matieleka nita lu têla, tala ti muntu saririri zu diani, kani kabwe ka mona lufwa ko.” 52 Bayuda bamutêla: “Bwawu bu tuzebi ti demo ye naku. Abrahame wafwa, bambikuri mpe, kâ nge ebu ta tâ, ‘Tala ti muntu saririri zu diani, kani kabwe ka bimba lufwa ko.’ 53 Kuyôkele’â tata’eto Abrahame ko, ka buna ko? Bambikuri mpe bafwa. Bwe ta banza, nge nani wena?” 54 Yezu wavutula: “Tala ti nitiheni mukembo, buna mukembo’ani wa mpamba wena. Ni Tata’ani kunganaka mukembo, Yandi wu luta tâ ti Nzambi’eno yena. 55 Ka lumuzebi’â ko, kâ meno yandi nzebi. Mpe tala ti ntêle ti ka nimuzebi’â ko, mbo nibâ ngungu ntiana beno. Kâ Yandi nzebi, mpe zu diandi nisarilaka. 56 Abrahame tata’eno watomo yangalala mu tivuvu tia mona tilumbu tiani, wamona tio mpe wayangalala.” 57 Buna Bayuda bamutêla: “Ka weka’eti lungisa mvula 50 ko, buna Abrahame yandi wamona?” 58 Yezu wabatêla: “Nkatika matieleka nita lu têla, ntete Abrahame kabutuka, meno kô natibêla.” 59 Buna batota matari mu mu winda mo, kâ Yezu waswama mpe waduka mu tempelo.