Bisalu bia Bantumwa
10 Ku Sezarea kweri na bakala dimosi di beri tâka Korneye, mfumu yabâ ya tikunku tia binwani 100 ti beri tâka mukangu wa Itali.* 2 Bakala diabâ, dieri tînaka Nzambi tintwari na bantu babansoni ba nzo’andi, makabu mamingi keri hanaka kwe bamputu mpe ntangu zazansoni ndiawululu keri saka kwe Nzambi. 3 Kampe ku ba 15 heure, watomo mona mu timona-meso mbazi ya Nzambi yakota kwe yandi mpe yatâ: “Korneye!” 4 Mu bunkuta Korneye wamutala, mpe wamuyula: “Ntia musamu Mfumu?” Yandi wamutêla: “Tusambulu twaku na makabu maku kwe bamputu bianeki kwe Nzambi mpe bia kabambukilaka. 5 Bwawu bu tambika babakala ku Zope mpe tumisa bakala dimosi die na nkumbu Simo di batâka Piere. 6 Bakala diango kwe Simo kata bêla, wê tisari tia mikanda mia bibulu, wê na nzo pene-pene na mubu.” 7 Buna kwa mbazi yeri mu zonzelaka bu yayenda, watâ mbila bisari biandi biole na tinwani timosi tieri tînaka Nzambi mu bô beri mu sarilaka, 8 wabatêla misamu miamiansoni mpe wabatambika ku Zope.
9 Tilumbu tialanda, bu beri tatamanaka mu landa nzila’awu mpe bu beri tulaka pene-pene na mumvuka, Piere wanaka mu nzo ya zulu kampe ku ba 12 heure mu sambila. 10 Kâ wayizi tomo bâ na nsatu mpe wadinga mu dia. Bu beri lambaka bidia, wayizi mona timona-meso, 11 mpe wamona zulu diazibuka na tima* tieri ntiana titenda tia tinene tia line ti basimba mu nsongi za ziyà tieri kôkaka ha mutoto; 12 mu kati mwabâ mpila zazansoni za bibulu bie na malu mayà, bibulu bikwe yendele mu moyo ha mutoto na nuni za ku zulu. 13 Ha manima zu dimosi diamutêla: “Piere, telama, honda mpe dia!” 14 Kâ Piere watâ: “Kani kabwe Mfumu mu bungu ti ka ndieka’eti dia tima tia ntonto na tia mvindu ko.” 15 Mpe zu diavutu mu têla mu mbala ya nzole: “Bîka mu tâ ntonto bima Nzambi bi katsemese.” 16 Musamu wo wavutu salama mbala ya ntatu, mpe mbala mosi tima* tiango tianaka ku zulu.
17 Piere bu keri dingaka mu zaba timona-meso tio bwe tiazolo tâ, babakala ba tambika Korneye mbuka yabâ nzo ya Simo beri yulaka mpe batelama ha mwelo. 18 Batâ mbila mpe bayula tala ti Simo wu beri tâka Piere kûna kabâ. 19 Piere bu keri toko dimbitilaka mu timona-meso, mpeve yamutêla: “Tala! Babakala batatu bata ku dinga. 20 Buna telama, kôka mpe yenda na bawu, kusandi na kani ntembe, mu bungu ti meno nibatambikiri.” 21 Ha manima Piere wakôka kwe babakala bo mpe watâ: “Ewu ni meno, muntu wu luta dinga. Mu bungu dia nti lwe hâ?” 22 Batâ: “Korneye, mfumu ya binwani, bakala dia sungama mpe ditînaka Nzambi, di bazonzelaka bubote kwe kanda diadiansoni dia Bayuda, bakiri ntumunu zitûkiri kwe Nzambi mu nzila ya mbazi ya santu, mu ku tikisa ku nzo’andi ngatu kawâ misamu mi mu têla.” 23 Buna wabakotesa mpe wababwana ntiana nzenza zandi.
Tilumbu tialanda watelama mpe wayenda na bawu, mpe mpangi zakaka za ku Zope zayenda na yandi. 24 Tilumbu tialanda wakota ku Sezarea. Diangana Korneye bawu keri kêlaka mpe watâ mbila bantu ba kanda diandi na ndiku zandi za mutima. 25 Piere bu kakota, Korneye wamubwana, wabwa ha malu mandi mpe wakondama ha matu mandi. 26 Kâ Piere wamutelamasa, bu katâ: “Telama; meno mpe muntu kwa ndiena.” 27 Bu keri zonzaka na yandi, wakota mpe wamona bantu babingi bakutakana. 28 Wabatêla: “Lutomono zaba ti Muyuda kena na nswa ko wa sa tintwari peleko wa pusana kwe muntu wa makanda makaka, kâ Nzambi kunsongele ti ka mfweti’â natâ muntu ntonto peleko mvindu ko. 29 Ntiangu ndembolo kala na kani fioti mu kwiza bu lukuntêle mbila. Ntiangu nita lu yula, mu bungu dia nti lukuntêle mbila.”
30 Buna Korneye watâ: “Bilumbu biyà biyôkele mu heure yi kwa, mu nzo’ani nabele sambilaka kampe ku ba 15 heure. Bakala dimosi dialweti binkuti biabele hezimaka diatelamane ha matu mani 31 mpe diatêle: ‘Korneye, Nzambi lusambulu lwaku lwa kawîri mpe makabu maku kwe bamputu ma kabambukiri. 32 Dieka bo, tambika bantu ku Zope mu tumisa Simo, yandi wu batâka Piere. Bakala diango kwe Simo kata bêla wê tisari tia mikanda mia bibulu, wê na nzo pene-pene na mubu.’ 33 Ntiangu mbingiri tambika bantu mu kwizi ku dinga, mpe nge tamburi mu kwiza kû na nsayi. Bwawu bu beto bansoni ha matu ma Nzambi twena, mu wirikila misamu miamiansoni mi ku tumini Yehova* mu tu têla.”
34 Buna Piere wabatika mu zonza, mpe watâ: “Bwawu bu ndizi tomo bakula ti Nzambi kena na tihambula ko, 35 kâ mu makanda mamansoni, muntu wumutînaka mpe wusarilaka buderede katambulaka. 36 Watambika zu kwe bala ba Israele mu ba zonzela nsangu za mbote za tidzunu mu nzila ya Yezu Kristo—yandi wê Mfumu ya bantu babansoni. 37 Beno, luzebi misamu mi bazonzela ku Yude yayansoni, batikila ku Galile ha manima ma bateme ya samuna Za: 38 mu bungu dia Yezu Musi-Nazarete, bwe Nzambi kamutumbila mu mpeve santu na mu ngolo, mpe bwe keri kwe yende mu nsi yayansoni bu keri saka mbote mpe bu keri wasisaka bantu babansoni Diabulu ba keri kwamisaka, mu bungu ti Nzambi na yandi keri. 39 Mpe beto mbangi zena za misamu miamiansoni mi kayirika ku nsi ya Bayuda na ku Yerusaleme; kâ bamuhonda bu bamukoma ha poto.* 40 Nzambi wamuvumbula kwe ba fwa mu tilumbu tia bitatu mpe wamuhana nzila mu moneka, 41 ka kwe bantu babansoni’â ko, kâ kwe mbangi Nzambi zi katisôlela, kwe beto tadia mpe tanwa na yandi ha manima ma mvumbukulu’andi kwe ba fwa. 42 Musamu wakaka, yandi watutuma mu samuna kwe bantu na mu tomo tâ timbangi ti ni yandi Nzambi kasôlele mu bâ mfundisi ya bantu ba moyo na ba fwa. 43 Mbikuri zazansoni timbangi eti zita tâ mu yandi, muntu ni muntu wutûla timinu mu yandi mbo kabaka mulemvo wa masumu mu nzila ya nkumbu’andi.”
44 Piere bu keri tatamanaka mu zonzela misamu mio, mpeve santu yakôkela bantu babansoni beri wâka zu diandi. 45 Mpe bantu bakwikilaka bazengesa masutu, bô bayiza na Piere bayituku, mu bungu ti kabu dia mpamba dia mpeve santu bahombola dio mpe kwe bantu ba makanda. 46 Diangana bawu beri wâka bu beri zonzaka mu mazu ma bazenza, mpe Nzambi beri kembelaka. Buna Piere wavutula: 47 “Bantu ba bu babakiri mpeve santu ntiana beto, ngano muntu lendi ba kabakasa mu baka bateme ya mamba?” 48 Buna wahana ntumunu ya ba batisa mu nkumbu ya Yezu Kristo. Ha manima bamulomba mu bâ na bawu mwa bilumbu.