Marke
3 Yezu wavutu kota mu sinagoge yimosi, mpe bakala dimosi diabâ mô dieri na koko kwa yuma.* 2 Buna Bafarize yandi beri tomo taluzulaka mu mona tala ti bakala dio kaketi wasisa mu tilumbu tia Sabala, ngatu bamufunda. 3 Yandi watâ kwe bakala dieri na koko kwa yuma:* “Telama mpe yiza ha kati.” 4 Ha manima wabatêla: “Ngano nswa wê neto mu tilumbu tia Sabala wa yirika musamu wa mbi peleko wa mbote, wa vûkisa luzingu* peleko wa honda?” Kâ ka bahana mvutu ko. 5 Buna Yezu wamana ba tala babansoni na nkesi. Tiari tiatomo mu baka mu bungu dia mitima miawu mia ngolo, mpe watâ kwe bakala dio: “Lambula koko kwaku.” Yandi walambula ko, mpe koko kwandi kwayizi wasa. 6 Buna Bafarize baduka mpe hô nkatika bendo bamusila mfundu na bantu ba Erode ngatu bamuhonda.
7 Kâ Yezu wayenda ha ndeko mubu na milongoki miandi, mpe pôka dia bantu diatûka ku Galile na ku Yude diamulanda. 8 Babingi ha kati diawu batûka mpe ku Yerusaleme, ku Idume, ku simu diakaka dia Zurde, ku bizunga bia Tire na bia Sido, bayiza kwe yandi mu bungu ti bawâ misamu mi keri yirikaka. 9 Walomba kwe milongoki miandi mu mu kubikila bato ya fioti ngatu pôka dia bantu dialembo mu fietakasa. 10 Mu bungu ti bantu babingi keri wasisaka, bô babansoni babâ na bimbevo bia ngolo kwe yandi beri tilosaka ngatu bamusimba. 11 Mpeve za mbi mpe bu zeri mu monaka, ha matu mandi zeri kondamaka mpe mu ngolo zeri kawulaka: “Nge ni Mwana wa Nzambi.” 12 Kâ mbala zazingi wabayimina mu ngolo mu lembo mu zonzela kwe bantu.
13 Wanaka ku mongo mpe watâ mbila bô ba kasôla, mpe bayiza kwe yandi. 14 Wasôla* bantu 12, ba katâ ntumwa, ni bawu baketi kwe yende na yandi, ni bawu kaketi tambika mu kwe samuna 15 mpe ni bawu kaketi hana lutumu lwa kuma bademo.
16 Bantu 12 ba kasôla* ni eba: Simo wu kahana mpe nkumbu ya Piere, 17 Zaki mwana wa Zebede na Za mpangi ya Zaki (wabahana mpe nkumbu ya Bwanergeze, yizololo tâ “Bala ba nzazi”), 18 Andre, Filipe, Baretelemi, Matie, Toma, Zaki mwana wa Alefe, Tade, Simo Musi-Kana,* 19 na Yuda Iskariote, wamuteka ha manima.
Ha manima wakota mu nzo yimosi, 20 mpe pôka dia bantu diavutu vukana mpe buna ka babâ na lenda ko dia dia. 21 Kâ bantu ba mu kanda diandi bu bawâ bo, bayiza mu mu bwila mu bungu ti ebu beri takâ: “Lawukiri.” 22 Mpe bitsoniki biatûka ku Yerusaleme ebu beri tâka: “Belzebube* mu koterele, mpe mu nzila ya mfumu ya bademo kata kumina bademo.” 23 Bu kamana ba tâ mbila he yandi, wabazonzela mu nzila ya bifwani: “Bwe Satana kalendi kumina Satana? 24 Tala ti titantu tikotele mu timfumu, timfumu tio ka tilendi’â tiasikama ko; 25 mpe tala ti titantu tikotele mu nzo, nzo yo ka yilendi’â yasikama ko. 26 Mpe tala ti Satana tinwanisi yandi beni mpe kotese titantu, ka lendi’â kasikama ko, kâ mbo kafwa. 27 Diangana, ka kwena muntu ko wulendi kota mu nzo ya muntu wê na ngolo mu bonga bimvwama biandi, tala ti ka tokolo’â mu kanga misinga ko. Ni buna kwa kalendela mu laba bima bia mu nzo’andi. 28 Wa matieleka nita lu têla, bantu mbo babalemvokela masumu mamansoni ma basaka na bifingu biabiansoni bi batâka. 29 Kâ wô finga mpeve santu kani kabwe ka bamulemvokela ko; siri disumu dia ntangu zazansoni.” 30 Watâ misamu mio mu bungu ti ebu beri tâka: “Mpeve ya mbi ye nandi.”
31 Ha manima nguri’andi na mpangi zandi bayiza, batelama ha mbazi mpe batambika muntu mu kwe mu tâ mbila. 32 Bantu babingi bazakala hâna ha keri, mpe bamutêla: “Tala! Nguri’aku na mpangi zaku ku mbazi bena, nge bata dinga.” 33 Kâ wabavuturila: “Nani wê nguri’ani, mpe mpangi zani ni banani?” 34 Bu kasungamana bô bamuzungirila, watâ: “Tala, nguri’ani na mpangi zani! 35 Wô sarilaka luzolo lwa Nzambi, ni yandi wê mpangi’ani ya bakala, tibusi tiani na nguri’ani.”