Za

5 Ha manima ma misamu mio, malaki ma Bayuda matula, mpe Yezu wanaka ku Yerusaleme. 2 Ku Yerusaleme, pene-pene na Mwelo wa bimeme, pisine yabâ hô yi beri tâka nkumbu mu Ebre Betesada, ha veranda yeri na makunzi matanu. 3 Bantu babingi beri na bimbevo baseka ha veranda yo: bantu bafwa meso, bantu beri tsuringaka na bantu bafwa binama. 4* —— 5 Kâ bakala dieri hô, dieri na timbevo tûka mvula 38. 6 Bu kamona bakala dio diaseka hô, mpe mu bungu ti wazaba ti timbevo tieri nandi tûka ntama, Yezu wamutêla: “Ngano zololo wawasa?” 7 Mbevo yamuvuturila: “Mfumu, ka ndiena na muntu ko wukuntûla mu pisine bu ninganaka mamba, kâ bu nidingaka mu kwenda mu mamba, muntu wakaka tikôkelaka ntete meno.” 8 Yezu wamutêla: “Telama! Bonga mfulu’aku mpe yenda yende.” 9 Hô nkatika bendo, bakala dio diawasa, diabonga mfulu’andi mpe diabatika mu kwe yende.

Tilumbu tia Sabala tiabâ. 10 Buna Bayuda babatika mu têla bakala dio diawasa: “Tilumbu tia Sabala tiena, mpe ka wena na nswa ko wa nata mfulu yo.” 11 Kâ wabavuturila: “Muntu wukungwasisi kuntêlele, ‘Bonga mfulu’aku mpe yenda yende.’” 12 Bawu bamuyula: “Muntu wukutêlele, ‘Bonga mfulu’aku mpe yenda yende,’ ni nani?” 13 Kâ bakala di bawasisa ka zaba ko nani weri; diangana Yezu wazimbakana ha kati dia pôka dia bantu dieri hâna.

14 Ha manima Yezu wamona bakala dio ku tempelo mpe wamutêla: “Tala, bwawu bu wasiri. Kuvutuandi yirika masumu ngatu musamu wa nkatika wa mbi ka wukuturilandi.” 15 Bakala dio diayenda, mpe diatâ kwe Bayuda ti ni Yezu wamuwasisa. 16 Ni mu bungu dia musamu wo Bayuda beri kwamisaka Yezu, mu bungu ti misamu mio keri yirikaka mu Sabala. 17 Kâ wabavuturila: “Tata’ani tatamane mu sala tii bwawu bu, meno mpe ntatamane mu sala.” 18 Ntiangu Bayuda babatika mu tomo dinga mpila yi bamuhondela, mu bungu ti keri’â zitisaka Sabala ko, kâ mpe Nzambi keri tâka Tata’andi, mpe ni bo keri tisaka nsinsa na Nzambi.

19 Buna Yezu wabavuturila: “Nkatika matieleka nita lu têla, Mwana ka lendi’â kayirika tima ko mu yandi beni, kâ mio kwa mi kamonaka kwe Tata kayirikaka. Mu bungu ti misamu miamiansoni mi yirikaka Tata, Mwana mpe ni bo kasilaka. 20 Diangana Tata zololo Mwana, mpe bima biabiansoni bi kasaka Yandi beni kamusongelaka, mbo kamusongela mpe bisalu biyôkele biawu bi ngatu lwayituku. 21 Mu bungu ti ntiana kwa Tata bu kavumbulaka bantu ba fwa mpe bu kabahanaka luzingu, Mwana mpe luzingu kahanaka kwe wô wu kazololo. 22 Diangana Tata ka fundisaka muntu ko, kâ wahana tisalu tiatiansoni tia mfundusu kwe Mwana, 23 ngatu bantu babansoni bazitisa Mwana ntiana bu bazitisaka Tata. Wô lembo zitisaka Mwana, ka zitisaka mpe Tata ko wamutambika. 24 Nkatika matieleka nita lu têla, wô wâka zu diani mpe kwikilaka Wô wakuntambika luzingu lwa mankululu lwe nandi, mpe ka bamufundisa ko, kâ katukiri ku lufwa mpe weka na luzingu.

25 “Nkatika matieleka nita lu têla, ntangu ni yawu yo, mpe yituriri, bantu ba fwa yi bawâ zu dia Mwana wa Nzambi, mpe bô batomo mu wirikila mbo babaka luzingu. 26 Mu bungu ti ntiana kwa Tata kê na luzingu mu Yandi beni,* heni mpe nzila kwe Mwana mu bâ na luzingu mu yandi beni. 27 Mpe wamuhana lutumu lwa fundisa, mu bungu ti yandi ni Mwana muntu. 28 Ka luyitukuandi mu musamu ewu, mu bungu ti ntangu ni yawu yo bantu babansoni bê mu mpiema yi bawâ zu diandi, 29 mpe yi baduka, bô bayirika misamu mia mbote mu bungu dia mvumbukulu ya luzingu, mpe bô bayirika misamu mia mbi mu bungu dia mvumbukulu ya mfundusu. 30 Ka ndendi’â nasa tima mu me beni ko. Mio mi niwâka ni mio nilandaka mu fundisa, mpe mfundusu’ani ya sungama yena, mu bungu ti ka nidingaka mu sarila luzolo lwa me beni ko, kâ lwa wô wakuntambika.

31 “Tala ti meno kaka nita tâ timbangi mu me beni, timbangi tiani ka tiena tia matieleka ko. 32 Muntu wakaka wutâka timbangi mu meno, mpe nzebi ti timbangi ti katâka mu meno tia matieleka tiena. 33 Bantu lwatambika kwe Za, mpe yandi watâ timbangi mu matieleka. 34 Diangana ka nitambulaka timbangi tia bantu ko, kâ misamu mi nita tâ ngatu lwavûka. 35 Bakala dio mwinda wabâ wuyokaka na wukengaka, mpe ntangu fioti ba kubama lwabâ mu tomo yangalala mu mutsamina’andi. 36 Kâ timbangi tie nani tiyôkele tia Za, mu bungu ti bisalu bia kungeni Tata’ani mu sala, bisalu bio bi nisalaka, timbangi bitâka ti Tata wakuntambika. 37 Mpe Tata wakuntambika Yandi beni watâ timbangi mu meno. Kani kabwe ka lwawâ zu diandi ko, mpe ka lweka’eti mona mpila yi kena ko, 38 mpe zu diandi ka diena mu beno ko, mu bungu ti ka lukwikilaka wô wu katambika ko.

39 “Matsonoko lulongokaka mu bungu ti ebu lubanzaka ti ni mô lubakila luzingu lwa mankululu, mpe diangana ni Matsonoko mo matâka timbangi mu meno. 40 Kâ ka luzololo’â ko lwiza kwe meno ngatu lwabaka luzingu. 41 Ka nitambulaka mukembo wutûkaka kwe bantu ko, 42 kâ wa ntomono zaba ti ka lwena na luzolo lwa Nzambi mu beno ko. 43 Mu nkumbu ya Tata’ani nayiziri, kâ ka lwakumbweni’â ko. Tala ti muntu wakaka wiziri mu nkumbu ya yandi beni, mbo lumubwana. 44 Bwe lulendi kwikila tala ti mukembo wutûkaka kwe bampwana’eno lutambulaka, mpe ka ludingaka mukembo wutûkaka kwe Nzambi ya yimosi ko? 45 Ka lubanzandi ti mbo nilufunda kwe Tata; muntu wumosi wuta lu funda, ni Mose, yandi wu lwasila tivuvu. 46 Diangana, tala ti Mose lukwikilaka, ngâ meno mpe lukwikilaka, mu bungu ti ni mu bungu dia meno katsoneka. 47 Kâ tala ti ka lukwikilaka matsonoko mandi ko, bwe lukwikila misamu mi nita tâ?”