Bisalu bia Bantumwa
13 Mu timvuka tieri ku Antioshe kweri na mbikuri na milongi. Kweri na Barnabase, Simeone wu beri tâka Nigere, Lusiuse wa ku Sirene, Manaye walongoka na Erode mfumu ya tizunga, na Saule. 2 Bu beri sarilaka Yehova* mpe bu beri saka diêna, mpeve santu yatâ: “Tûleno Barnabase na Saule ha ndeko mu bungu dia meno, mu bungu dia tisalu ti nibatêlele mbila.” 3 Bu bamanisa mu sa diêna na mu sambila, babatenseka moko mpe babatambika.
4 Buna babakala bo, ba batambika kwe mpeve santu, bakôka ku Selesi, mpe tu<u311>ka kûna bayenda ku Sipre mu bato. 5 Bu batula ku Salamine, babatika mu samuna zu dia Nzambi mu sinagoge za Bayuda. Za na bawu keri mu ba bakisa.
6 Bu basabuka ile* yayansoni tii ku Pafose, babwabana na Muyuda wumosi wu beri tâka Bare-Yezu, weri saka mpandu mpe wabâ mbikuri ya bungungu. 7 Tintwari kabâ na Sergiuse Pauluse guvernere ya tizunga, bakala dia mayela diabâ. Sergiuse Pauluse watâ mbila Barnabase na Saule, mu bungu ti nsatu ya ngolo yabâ nandi ya wâ zu dia Nzambi. 8 Kâ Elimase muntu wusaka mpandu (nkumbu’andi yizololo tâ munkwa-mpandu) wabatika mu ba telamana, wadinga mu wubakasa guvernere ngatu kalembo bâ na timinu. 9 Ha manima Saule, wu batâka mpe Paulo, wafuluka mu mpeve santu, watomo mu tala 10 mpe watâ: “Ô bakala dia fuluka mu bungungu bwa mpila zazansoni na mu nsalulu zazansoni za mbi, mwana wa Diabulu, nge mbeni ya misamu miamiansoni mia sungama, ngano kubîka ko mu tengamasa nzila za sungama za Yehova?* 11 Tala! Koko kwa Yehova* kwe nge kuta kwiza, mbo fwa meso, mpe mbo yôkesa mwa ntangu kuvutu’â mona mutsamina wa mwini ko.” Hô nkatika bendo keri’â vutu monaka ko mpe meso mandi mayizi bâ mpimpa, zungana keri kwe zungane mu dinga muntu wumutwarisa mu koko. 12 Buna guvernere, bu kamona misamu miatula, wabatika mu kwikila, mu bungu ti wayituku mu ndongosolo ya Yehova.*
13 Paulo na ndiku zandi za tisalu, tûka ku Pafose basabuka mubu mpe batula ku Perige ku tizunga tia Pamfili. Kâ Za wabasisa mpe wakâla ku Yerusaleme. 14 Bawu bakatuka ku Perige mpe batula ku Antioshe ya Pisidi. Mpe mu tilumbu tia Sabala bakota mu sinagoge mpe bazakala. 15 Ha manima ma ntangulu ya Musiku na Bambikuri ha meso ma bantu, ntwarisi za sinagoge zabatêla: “Babakala, bampangi, tala ti musamu wê neno mu tindisa bantu, têno wo.” 16 Buna Paulo watelama, wabatêla mu koko kwandi babîka lwaza, mpe watâ:
“Babakala, Bisi-Israele na beno bakaka lutînaka Nzambi, wirikileno. 17 Nzambi ya kanda di dia Israele yasôla nkaka zeto, wazangula kanda di bu dieri nzenza ku nsi ya Ezipte mpe wabadukisa mu ngolo za koko kwandi. 18 Mpe mvula kampe 40, wabakorela ku sese.* 19 Bu kamana fukisa makanda ma 7 ma ku nsi ya Kanaa, wabahana nsi’awu ngatu babiarila yo. 20 Misamu mio miamiansoni miazingila mvula kampe 450.
“Ha manima wabahana mfundisi tii mu ntangu ya mbikuri Samwele. 21 Kâ ha manima balomba mutinu, mpe Nzambi wabahana Sawule mwana wa Kishe, bakala dimosi dia kanda dia Benyamine, wabayâla mvula 40. 22 Bu kamukatula, wabasôlela Davide mu bâ mutinu, wu kahanina timbangi bu katâ: ‘Namweni Davide mwana wa Yese, muntu wuyangirikaka mutima’ani; mbo kayirika misamu miamiansoni mi nzololo.’ 23 Tintwari na kani diandi, ni mu bala* ba bakala dio, Nzambi kadukisila muvukisi mu bungu dia Israele, Yezu. 24 Ntete muntu wo watula, Za wasamuna bateme yeri monekesaka nsobolo ya mabanza ha meso ma kanda diadiansoni dia Israele. 25 Kâ Za bu keri manisaka tisalu tiandi, watâ: ‘Kwe beno, meno nani ndiena? Meno ka yandi’â ko. Kâ tala! Ka ndiena wa lunga ko mu katula mapapa ma muntu wuta kwiza ha manima mani.’
26 “Babakala, bampangi, beno bala ba Abrahame na beno bakaka lutînaka Nzambi, ni kwe beto batambika zu di divûkisaka. 27 Mu bungu ti bantu ba ku Yerusaleme na mfumu zawu ka bazaba muntu wo ko, kâ bu bamufundisa balungisa misamu mi batâ mu nzila ya Bambikuri, mio mi batangaka sabala zazansoni mu zu dia ngolo. 28 Ni bu sa ti ka babaka musamu wu baketi mu hondela ko, balomba kwe Pilate mu mu honda. 29 Mpe bu balungisa misamu miamiansoni miatsonama mu bungu dia yandi, bamukôkesa ha poto* mpe bamutûla mu mpiema. 30 Kâ Nzambi wamuvumbula kwe ba fwa, 31 mpe tûka bilumbu biabingi wamoneka kwe bô bamuturisa tûka ku Galile tii ku Yerusaleme. Bwawu bu mbangi zena ha kati dia bantu.
32 “Ntiangu tuta samuna nsangu za mbote zitariri kani di basa kwe nkaka zeto. 33 Nzambi watomo dia lungisa mu bungu dia beto, bala bawu, bu kavumbula Yezu kwe ba fwa; ntiana bu watsonama mu mukunga wa nzole: ‘Nge ni mwana’ani; lumbu ti ndieka tata’aku.’ 34 Nzambi wamuvumbula kwe ba fwa, ka lendi’â kavutu fwa ko mpe ka lendi’â kavutu bola ko. Yandi wasingasa wo bu katâ: ‘Mbo nilusongela luzolo lwa kwikama lu nakanisina kwe Davide, kani diena di lulendi kwikila.’ 35 Ntiangu kavutu tâ mu mukunga wakaka: ‘Kubîka muntu’aku ko wa kwikama wabola.’ 36 Davide wasarila luzolo lwa Nzambi mu mbandu’andi, wafwa, bamuzika na nkaka zandi, mpe wabola. 37 Kâ, muntu Nzambi wu kavumbula kwe ba fwa ka wabola ko.
38 “Buna bampangi, zabeno ti ni mu nzila ya muntu wo bata lu samunina mulemvo wa masumu, 39 Mpe mu misamu miamiansoni mi balendi lembo lu tâ bantu ba sungama mu Musiku wa Mose, wô kwikila mbo bamutâ muntu wa sungama mu nzila ya yandi. 40 Dieka bo, seno keba ngatu misamu mi batâ mu Bambikuri ka miluturilandi: 41 ‘Taleno, beno luseheselaka, yitukueno, mpe fukeno, mu bungu ti tisalu nita sala mu ntangu’eno, tisalu tiango kani kabwe ka lulendi’â lwakwikila tio ko ni bu sa ti batomono tia lu bangurila.’”
42 Bu beri dukaka, bantu babalemberela mu zonzela misamu mio mu Sabala yaketi landa. 43 Lukutakanu ku sinagoge bu lwawa, Bayuda babingi na nzenza zatambula dibundu dia Bayuda, bawu beri sambilaka Nzambi, balanda Paulo na Barnabase. Paulo na Barnabase bu beri zonzaka na bawu babatindisa mu tatamana mu bâ mu bweso bwa nzitukulu bwa Nzambi.
44 Sabala yalanda, kampe bantu babansoni ba mumvuka bavukana mu wâ zu dia Yehova.* 45 Bayuda bu bamona pôka dia bantu, bafuluka mu timbanda mpe babatika mu telamana na mu tsâla misamu mieri tâka Paulo. 46 Buna Paulo na Barnabase babatêla na butindi: “Wafwanane ti batoko zonzela zu dia Nzambi kwe beno. Mu bungu ti ka luta dia tambula ko, mpe lumweni ti ka lwena ba lunga ko mu baka luzingu lwa mankululu, taleno! twele kwe bantu ba makanda. 47 Mu bungu ti Yehova* watuhana ntumunu eyi: ‘Nikunomene mu bâ ntiana mutsamina wa makanda, ngatu wanata mvukulu tii kwa sukisina mutoto.’”
48 Bantu ba makanda bu bawâ misamu mio, babatika mu yangalala na mu kembela zu dia Yehova,* mpe bô babansoni babâ na mabanza ma delakana mu bungu dia luzingu lwa mankululu, bayizi kwikila. 49 Musamu wakaka, zu dia Yehova* diatatamana mu yangana mu nsi yayansoni. 50 Kâ Bayuda balonga bakento ba nsangu beri tînaka Nzambi na babakala ba mfunu ba mumvuka, bawu bakwamisa Paulo na Barnabase mpe babadukisa ku tizunga tiawu. 51 Buna, babakuburila mfumfuta za malu mawu mpe bayenda ku Ikoniume. 52 Mpe milongoki miatatamana mu fuluka mu nsayi na mu mpeve santu.