Marke

13 Bu beri dukaka mu tempelo, wumosi wa milongoki miandi wamutêla: “Mulongi, tala! matari ma na nzo zi bia toma biena!” 2 Kâ Yezu wamutêla: “Nzo zi za zinene za ta mona? Kani kabwe, ka ku sâla tari ha zulu tari ko di balembo mwangasa.”

3 Bu kazakala ha Mongo wa miti mia Olive, ha matu ma tempelo, Piere, Zaki, Za na Andre bamuyula ha bawu kaka: 4 “Tu têla, ntia ntangu misamu mi milungana, mpe ntia tidimbu tisongela ti nsuka ya misamu mi miamiansoni yituriri?” 5 Buna Yezu wabatika mu ba têla: “Seno keba ngatu na kani muntu ka lu wubakasandi. 6 Babingi bakwiza mu nkumbu ya meno, bu batâ: ‘Meno ni yandi,’ mpe mbo bawubakasa bantu babingi. 7 Mpe bu luwâ lwaza lwa mizingu na nsangu za mizingu, ka lubândi na bunkuta; misamu mio mifweti tula, kâ ka yibâ nsuka ko.

8 “Mu bungu ti kanda mbo dinwanisa kanda diakaka, mpe timfumu mbo tinwanisa timfumu tiakaka; mbo kubâ midikutulu* mia mutoto mu mbuka za mpila na mpila; mbo kubâ mpe nsatu. Misamu mio miamiansoni mbo mibâ mbatukulu ya mpasi za ngolo.

9 “Kâ beno seno keba. Bantu mbo balunata ku tribinale za fioti, mbo balutwa mu sinagoge mpe mbo balunata ha matu ma baguvernere na mitinu mu bungu dia meno, ngatu tiabâ timbangi kwe bawu. 10 Mpe ntete, bafweti samuna nsangu za mbote kwe makanda mamansoni. 11 Bu balukanga mu lu nata ku tribinale, ka lutibêlandi na lwaka mu misamu mi lutâ. Kâ têno mio mi baluhana mu ntangu yîna, mu bungu ti ka beno’â ko luzonza, kâ ni mpeve santu. 12 Musamu wakaka, muntu mbo kahondesa mpangi’andi peleko yaya’andi, tata mbo kahondesa mwana’andi, bala mbo batelamana bibuti biawu mpe mbo babahondesa. 13 Mpe bantu babansoni mbo baluyina mu bungu dia nkumbu’ani, kâ wô korela tii ku nsuka mbo kavûka.

14 “Kâ, bu lumona tima tia ntonto tinataka mfukulu, titelama hô ha tifweti lembo bâ (bîka ti titangi tiasarila lenda dia swasikisa), buna bô bê ku Yude babatika mu dioka ku miongo. 15 Muntu wê ku zulu muluri wa nzo ka kôkandi mpe ka kotandi mu bonga tima ni tima tie mu nzo; 16 mpe muntu wê ku musitu, ka kâlandi manima mu bonga tinkuti tiandi tia zulu. 17 Tiari kwe bakento babâ na mazimi na bayemeka bala mu bilumbu bio! 18 Tatamaneno mu sambila, ngatu ka wutulandi mu ntangu ya tiozi tia ngolo; 19 mu bungu ti bilumbu bio mbo bibâ bilumbu bia mpasi ziyôkele zalembo toko kwa bâ, tûka mbatukulu ya nza yasala Nzambi tii bwawu bu, mpe ka zivutu’â kwa bâ ko. 20 Diangana, tala ti Yehova* zingisi bilumbu bio, ka kwena muntu ko wuvûka; kâ mu bungu dia bô ba kasôlele, ka zingisi’â bilumbu bio ko.

21 “Mpe, tala ti muntu lu têlele, ‘Taleno! Kristo eku kena,’ peleko ‘Taleno! Ehanê kena,’ ka lumukwikilandi. 22 Mu bungu ti Kristo za bungungu na mbikuri za bungungu ziduka; mbo basa bimangu na misamu mia nzitukulu mu wubakasa bô ba basôla, tala ti bulendi bâ. 23 Buna beno, seno keba. Misamu mi miamiansoni nilutêlele ntete miatula.

24 “Kâ mu bilumbu bio, ha manima ma mpasi zo, ntangu mbo yibâ mpimpa, ngonda ka yivutu’â hana mutsamina’andi ko, 25 mbwetete mbo zibwa tûka ku zulu, mpe ngolo zê ku mazulu mbo ziteketa. 26 Mpe buna, mbo bamona Mwana muntu wuta kwiza mu matuti, na ngolo zazingi mpe na mukembo. 27 Buna mbo katambika bambazi mpe mbo kakutakasa bô ba kasôla tûka ku nore, ku side, ku este na ku weste, tûka kwa sukisina mutoto tii kwa sukisina mazulu.

28 “Bwawu bu bakeno malongi mu tifwani tia mufige: Bu lumonaka ti bintala biandi bia môna bieka bia peta, mpe makaya mandi madukiri, mbo lubakulaka ti ntangu yi menaka bima yituriri. 29 Mpila mosi mpe bu lumona ti bima bio bitûriri, zabeno ti weka pene-pene ha mielo. 30 Wa matieleka nita lu têla, kani kabwe mbandu yi ka yiyôka ko tii misamu mi miamiansoni mitula. 31 Zulu na mutoto mbo biyôka, kâ kani kabwe zu diani ka diyôka ko.

32 “Mu musamu wutariri tilumbu peleko ntangu, ka muntu’â ko zebi bio, ni bu zibâ mbazi ku zulu peleko Mwana, kâ ni Tata kwa zebi. 33 Seno keba, tatamaneno mu bâ na meso ma tia, mu bungu ti ka luzebi’â bu tula ntangu yi bakubika ko. 34 Musamu wo balendi wa fwanakasa na muntu wuta sa nzietolo, wusisiri nzo‘andi mu lutumu lwa ngamba zandi, heni kwe muna muntu mu bawu tisalu, mpe lombele kwe munkengi wa mwelo mu tatamana mu sa keba. 35 Dieka bo, tatamaneno mu sa keba, mu bungu ti ka luzebi’â ko ntia ntangu mfumu ya nzo kakwiza, tala ti mu nkokela, ha kati-kati dia mpimpa, ntete bwisi bwatia* peleko mu nkatika pari, 36 ngatu bu kakwiza mu ta-pulukusu, kizandi kalubwana ku tolo. 37 Kâ misamu mi nita lu têla, kwe bantu babansoni nita mia tâ: Tatamaneno mu sa keba.”