Bisalu bia Bantumwa
21 Bu tamana hambana na bawu mu mpasi, tabonga nzila ya mubu mpe tayenda mbala mosi ku Kose, tilumbu tialanda tayenda ku Rode, mpe tûka kûna tayenda ku Patara. 2 Bu tamona bato yeri kwendaka ku Fenisi, takota mu kati mpe tayenda. 3 Bu tatula pene-pene na ile* ya Sipre, tasisa yo ku lweka lwa lukento mu kwenda ku Siri, mpe takangama ku Tire bato ku yaketi kôkesela bima bi yanata. 4 Tadinga milongoki mpe bu tamana ba mona, tabâ kûna bilumbu 7. Kâ mu nzila ya mpeve santu batatamana mu tâ kwe Paulo mu lembo tûla kulu ku Yerusaleme. 5 Buna, ntangu yi taketi yôkesa kûna bu yafwana, takatuka kûna mpe talanda nzila’eto, kâ babansoni, tintwari na bakento mpe na bala bawu batuturisa tii bu taduka ku mumvuka. Mpe bu tafukama ha ndeko mamba, tasambila 6 mpe tahanasana mbote za mansukina. Ha manima takota mu bato mpe bakâla ku nzo zawu.
7 Bu takatuka ku Tire, tatula ku Pitolemayise, tahana mbote kwe bampangi mpe tayôkesa tilumbu timosi na bawu. 8 Tilumbu tialanda takatuka kûna mpe tatula ku Sezarea, takota mu nzo ya Filipe tisamuni, wabâ wumosi mu babakala ba 7, mpe tabâ kûna na yandi. 9 Bakala dio bala babakento bayà babâ nandi balembo bâ ba kwela* beri bikulaka. 10 Kâ bu tamana bâ kûna bilumbu biabingi, mbikuri yimosi yabâ na nkumbu Agabuse wakôka ku Yude. 11 Wayiza kwe beto mpe wabonga musinga-luketo wa Paulo, watikanga malu na moko mpe watâ: “Mpeve santu ebu yitêle, ‘Bakala dio divwiri musinga-luketo wu ni bo mpe bamukangila kwe Bayuda ku Yerusaleme, mpe mbo bamuhana ha moko ma bantu ba makanda.’” 12 Bu tawâ bo, beto na bô babâ kô tabatika mu mu lemberela mu lembo naka ku Yerusaleme. 13 Buna Paulo wavutula: “Mu bungu dia nti luta dirila mpe luta yêla mu kumpetesa mu nzengolo’ani?* Bêno na lukwikulu ti wa kubama ndiena bakunkanga misinga kâ mpe mu fwa ku Yerusalelme mu bungu dia nkumbu ya Mfumu Yezu.” 14 Bu talembana mu mu wisa, tabîka mu mu telamana* ni tatâ ti: “Bîka luzolo lwa Yehova* lwasalama.”
15 Ha manima ma bilumbu bio, takubama mu bungu dia nzietolo mpe tabatika mu kwenda ku Yerusaleme. 16 Milongoki miakaka mia ku Sezarea miayenda mpe na beto, mpe miatunata kwe Minasone Musi-Sipre, ku taketi bêla, wabâ mosi wa milongoki mia ntete. 17 Bu tatula ku Yerusaleme, bampangi batubwana na nsayi. 18 Kâ tilumbu tialanda, Paulo wayenda na beto kwe Zaki mpe bakuluntu babansoni kô babâ. 19 Wabahana mbote mpe wabatika mu tomo ba têla misamu mia yirika Nzambi ha kati dia makanda mu nzila ya tisalu tiandi.
20 Bu bamana wâ bo, babatika mu kembela Nzambi, kâ bamutêla: “Mpangi’eto, mweni ti mafunda mamingi ma bantu bata kwikila ha kati dia Bayuda, mpe babansoni luhemo lwe nawu mu bungu dia Musiku. 21 Kâ bawîri ti, Bayuda babansoni bê ha kati dia makanda ta tuma mu ndongosolo’aku, mu lembo zitisa Musiku wa Mose bu ta ba têla mu lembo zengoso masutu ma bala bawu na mu lembo landa bikulu bi sarilaka bantu. 22 Buna nti tufweti sa? Ntembe kâni mbo bazaba ti wiziri. 23 Buna yirika mio mi tukutêla: Babakala bayà bê neto hâ badiri mpana.* 24 Ba nata, mpe titsemesa ha timosi na bawu ntiana bu lombaka tikulu mpe bafutila biabiansoni ngatu babasa makungulu. Buna babansoni mbo bazaba ti misamu mi bawîri mu nge mia bungungu miena, kâ mu mpila ya sungama kwe diatiri mpe Musiku tumamanaka nge mpe. 25 Mu wo wutariri bantu bayizi kwikila bê ha kati dia makanda, tabatambikiri nzengolo’eto mu mukanda ti bafweti kala bima bi bahana mu mukayulu kwe biteki, menga, mu kala mu dia bibulu bi balembolo tsonesa menga na bunsuza.”*
26 Dieka bo tilumbu tialanda, Paulo wabonga babakala bo mpe watitsemesa ha timosi na bawu ntiana bu lombaka tikulu, ha manima wakota mu tempelo mu ba têla ntia ntangu bilumbu bi baketi titsemesa biaketi suka mpe ntia ntangu baketi hana makabu mu bungu dia mosi na mosi mu bawu.
27 Bilumbu 7 bu bieri kwendaka ku nsuka, Bayuda ba ku Azi bu bamumona ku tempelo, batuma pôka dia bantu mu sa vwandi mpe bamubwila, 28 bu beri kawulaka: “Babakala ba ku Israele, tu bakiseno! Ni bakala di dita longesa bantu babansoni mpe kwakwansoni mu telamana bantu beto, Musiku’eto na mbuka yi. Mpe musamu wuyôkele, Bagreke kakotese mu tempelo mpe vwezele mbuka yi ya santu.” 29 Mu bungu ti batoko mu mona na Trofime Musi-Efeze mu mumvuka, mpe babanza ti Paulo mu tempelo kamukotesa. 30 Kwayizi bâ vwandi mu mumvuka wawansoni, bantu babulumuka mu tempelo, babwila Paulo, mpe bamukoka tii bu bamudukisa mu tempelo, mpe hô nkatika bendo bakanga mielo. 31 Bu beri dingaka mu mu honda, nsangu zatula kwe komanda ti Yerusaleme yayansoni mu vwandi yeri; 32 mpe hô nkatika bendo wabonga binwani na mfumu za binwani mpe wakôka mu ntinu kwe bawu. Bu bamona komanda na binwani babîka mu twa Paulo.
33 Buna komanda ya binwani wapusana, watûla Paulo ku boloko mpe walomba bamukanga mu chaîne zole; ha manima wayula nani weri mpe nti kasa. 34 Kâ pôka dia bantu misamu mia swaswana beri kawulaka mu ngolo. Mu bungu ti lwaza lwalwingi lwabâ kô ka lenda ko mu baka nsangu za musamu wayôka, buna watuma banata Paulo ku lupangu lwa binwani. 35 Kâ bu katula ha zulu eskalie, binwani biamunanguna mu bungu dia miangu mia pôka dia bantu; 36 mu bungu ti pôka dia bantu ha manima dieri ba landaka bu beri kawulaka: “Mu hondeno!”
37 Bu beri dingaka mu mu kotesa ku lupangu lwa binwani, Paulo watâ kwe komanda ya binwani: “Ngano ndendi ku têla musamu?” Watâ: “Ngano zu dia Greke zonzaka?” 38 Buna ka wena Musi-Ezipte ko watulumuni vwandi ka ntama ko mpe waneti babakala 4 000 ku sese* babêle na mbele?” 39 Buna Paulo watâ: “Diangana meno Muyuda ndiena wa ku Tarse ya ku Silisi. Muntu wa hata diazabakana. Buna mulemvo’aku, kungana nzila ya zonza kwe bantu.” 40 Bu kamana mu hana nzila, Paulo watelama ha zulu eskalie mpe walomba kwe bantu mu koko kwandi mu kuta. Bu bayizi tomo kuta, wabazonzela mu zu dia Ebre, watâ: