Wa ntete kwe Bisi-Korente
14 Landeno luzolo, kâ tatamaneno mu dinga makabu ma timpeve na luhemo, nsungula kabu dia bikula. 2 Mu bungu ti wô ta zonza mazu ma nzenza ka ta zonza kwe bantu ko, kâ kwe Nzambi. Ka muntu’â ko ta mu bakula, mu bungu ti mansweki ma santu kata zonzela mu nzila ya mpeve. 3 Kâ wô ta bikula bantu kata tunga, kata tindisa mpe kata bomba mu nzonzolo’andi. 4 Wô ta zonza mu zu dimosi yandi beni kwa kata tunga, kâ wô ta bikula timvuka kata tunga. 5 Nzololo ti beno bansoni lwazonza mazu ma nzenza, kâ ntomono zolo ti lwabikula. Diangana, wô ta bikula tomono yôka wô ta zonza mazu ma nzenza, diambu’eti wô ta zonza mazu ma nzenza kabangula ngatu katunga timvuka. 6 Kâ bwawu bu bampangi, ntia ndandu lubaka tala ti ndizi lu zonzela mu mazu ma nzenza? Mbo wulunatina ndandu diambu’eti naluzonzela nzabukusu yitûkiri kwe Nzambi, peleko luzabu, peleko mbikululu, peleko ndongosolo.
7 Mpila mosi kwa mpe na bima bilembolo bia moyo bidukisaka lwaza, ni bu yibâ flûte peleko harpe.* Tala ti ka baswasikisi’â note za mizike ko, bwe muntu kazabila ti flûte yita sika peleko harpe? 8 Tala ti mpungi ka yita tomo dukisa lwaza ko, nani kubama mu bungu dia muzingu? 9 Mpila mosi mpe, tala ti nzonzolo ye mpasi mu bakula luta sarila, bwe muntu kazabila misamu mi batêle? Diangana, mbo luzonza kwa mpamba. 10 Kampe mu nza, nzonzolo za swaswana zazingi zê mû, kâ ka kwena nzonzolo ko yilembolo na nsasa. 11 Tala ti ka nita bakula nsasa ya nzonzolo ko, mbo nibâ nzenza kwe muntu wuta zonza, mpe muntu wuta zonza mbo kabâ nzenza kwe meno. 12 Buna beno mpe, mu bungu ti na timina luta zolo makabu ma timpeve, dingeno mu bâ na makabu mamingi matunga timvuka.
13 Ntiangu, wô ta zonza mu zu diakaka, kasambila ngatu kabâ na lenda dia bangula. 14 Mu bungu ti tala ti mu zu diakaka nita sambila, ni kabu diani dia mpeve dita sambila, kâ mayela mani ka masaka tima ko. 15 Buna nti nisa? Mbo nisambila na kabu dia mpeve, kâ mbo nisambila mpe na mayela mani. Mbo nitanga mikunga mia mukembo na kabu dia mpeve, kâ mbo nitanga mpe mikunga mia mukembo na mayela mani. 16 Ku lweka lwakaka, tala ti mu nzila ya mpeve santu kembele Nzambi, bwe muntu wa mpamba-mpamba wê hô katêla “Amen” mu lusambulu lwaku lwa matondo, tala ti ka ta bakula misamu mi ta tâ ko? 17 Wa matieleka, mu mpila ya mbote ta vutula matondo, kâ ka yitungiri’â muntu wakaka ko. 18 Matondo nita vutula kwe Nzambi mu bungu ti mazu mamingi nizonzaka yôka beno. 19 Kâ mu timvuka nzololo natâ misamu mia 5 mu mayela mani,* ngatu nalongesa bantu bakaka, na bu ntêle misamu 10 000 mu zu diakaka.
20 Bampangi, ka lubândi bala ba fioti mu lenda dieno dia bakula, kâ beno bala ba fioti mu misamu mia mbi, mpe beno bantu ba kula mu lenda dieno dia bakula. 21 Watsonama mu Musiku: “Yehova* têle, ‘Mu mazu ma banzenza na mu munwa wa banzenza nizonza kwe kanda di, mpe ni bu sa ti ni bo wena, mbo bakala mu kungwirikila.’” 22 Dieka bo, lenda dia zonza mazu ma nzenza ka tiena tidimbu ko mu bungu dia bô bakwikilaka, kâ mu bungu dia bô balembo kwikilaka, ku lweka lwakaka lenda dia bikula ka tiena tidimbu ko mu bungu dia bô balembo kwikilaka kâ mu bungu dia bô bakwikilaka. 23 Buna, tala ti timvuka tiatiansoni tikutakane mu mbuka yimosi mpe babansoni bazonzele mazu makaka, kâ bantu ba mpamba-mpamba peleko balembo kwikilaka baturiri, ngano ka batâ ko ti lulawukiri? 24 Kâ tala ti beno bansoni bikula luta bikula mpe muntu wulembo kwikilaka peleko muntu wa mpamba-mpamba wuturiri, misamu mi kawâ mbo mitomo mu semba mpe mbo katomo titaluzula. 25 Mansweki ma mutima’andi mbo matomo zabakana, buna mbo kafukama mpe mbo kasambila Nzambi bu katâ: “Wa matieleka, Nzambi ha kati dieno kena.”
26 Buna bampangi, nti lufweti sa? Bu lukutakanaka, wumosi mukunga wê nandi, wakaka ndongosolo, wakaka nzabukusu, wakaka zu dia nzenza, mpe wakaka mbangululu. Bîka ti miamiansoni miasalama mu tunga. 27 Mpe tala ti muntu wuzonzele zu dia nzenza, bîka wasukisina kwa kwe bantu bole peleko batatu; bê sobasane mpe muntu wakaka wufweti bangula. 28 Kâ tala ti ka kwena muntu ko wubangula, fweti kuta mu timvuka mpe kazonza kwe yandi beni na kwe Nzambi. 29 Mbikuri zole peleko zitatu zazonza, mpe bîka ti bakaka babakula nsasa. 30 Kâ tala ti muntu wakaka wubakiri nzabukusu bu kê wa zakala, bîka ti muntu wa ntete wubele zonzaka kakuta. 31 Mu bungu ti beno bansoni lulendi bikula muna muntu mu ntangu’andi, ngatu babansoni balongoka mpe babansoni babaka butindi. 32 Mpe makabu ma mpeve ma bambikuri bafweti ma zabirila kwe bambikuri. 33 Mu bungu ti Nzambi kena Nzambi ya vwandi ko, kâ ya tidzunu.
Ntiana mu bimvuka biabiansoni bia basantu, 34 bîka ti bakento bakuta mu timvuka, mu bungu ti ka bena na nswa ko wa zonza. Kâ batumamana ntiana bu tâka mpe Musiku. 35 Tala ti bazololo mu longoka tima, bayula kwe babakala bawu ku nzo, mu bungu ti musamu wa nsoni wena kwe mukento mu zonza mu timvuka.
36 Ngano zu dia Nzambi kwe beno diatûka peleko kwe beno kwa diayiza?
37 Tala ti muntu benzi ti mbikuri yena peleko kabu dia mpeve die nandi, fweti tambula ti misamu mi nita lu tsonekena ntumunu ya Mfumu yena. 38 Kâ tala ti muntu ka tamburi’â wo ko, ka bamutambula* ko mpe. 39 Buna mpangi zani, tatamaneno mu dinga kabu dia bikula na luhemo, mpe ka luyiminandi muntu mu zonza mu mazu ma nzenza. 40 Kâ miamiansoni miayilamana mu mpila ya delakana na mu bunkete.*