Bisalu bia Bantumwa
8 Saule, yandi, wasingasa ti bahonda Etiene.
Mu tilumbu tîna, babatika mu tomo kwamisa timvuka tia Yerusaleme; katula bantumwa, milongoki miamiansoni miamwangana ku tizunga tia Yude na tia Samaria. 2 Kâ babakala batînaka Nzambi, banata Etiene mu mu zika, mpe batomo mu dila. 3 Kâ Saule wabatika mu tomo kwamisa timvuka, mu nzo yimosi na mosi keri kwe kote, babakala na bakento keri dukisaka ku mbazi, mpe mu boloko keri ba tûlaka.
4 Kâ bô bamwangana, nsangu za mbote za zu dia Nzambi beri kwe samuni mwamwansoni mu beri kwe yôkele. 5 Buna Filipe wakôka ku mumvuka wa Samaria, mpe wabatika mu samuna Kristo kûna. 6 Mu bumosi, pôka dia bantu misamu mieri tâka Filipe beri tomo landaka, bu beri mu wirikilaka mpe bu beri talaka bimangu bi keri saka. 7 Bantu babingi babâ na mpeve za mbi, mpe mpeve zango mu ngolo zeri kawulaka mpe duka zeri dukaka. Musamu wakaka, bawasisa bantu babingi babâ na binama bia fwa na malu ma fwa. 8 Buna kwayizi bâ nsayi yayingi mu mumvuka wo.
9 Mu mumvuka wo, bakala dimosi diabâ kô dieri na nkumbu Simo, dieri sarilaka mpandu mpe dieri yitukusuku kanda dia Samaria, bu keri tâka ti yandi muntu wa munene wena. 10 Bantu babansoni, batikila kwe muntu walembo bâ mfunu tii kwe muntu wabâ mfunu, yandi beri tomo landaka mpe batâ: “Muntu wu ni Ngolo za Nzambi zi batâka Za zinene.” 11 Buna, yandi beri landaka mu bungu ti tûka ntama bawu keri yitukusuku mu mpandu zandi. 12 Kâ bu bayizi kwikila Filipe weri samunaka nsangu za mbote za Timfumu tia Nzambi na nkumbu ya Yezu Kristo, bakento na babakala bayizi batusu. 13 Simo yandi beni mpe wayizi kwikila, mpe bu kamana batusu, watatamana mu bâ na Filipe; mpe wayituku bu kamona bimangu na bisalu bia ngolo bia nzitukulu bieri salamaka.
14 Bantumwa ku Yerusaleme bu bawâ ti Bisi-Samaria batambula zu dia Nzambi, babatambikila Piere na Za; 15 bu batula, babasambirila ngatu babaka mpeve santu, 16 mu bungu ti ka yatikôkela ko kwe muna muntu mu bawu, kâ mu nkumbu ya Mfumu Yezu kwa babatusu. 17 Buna babatenseka moko, mpe babaka mpeve santu.
18 Simo bu kamona ti mpeve santu mu moko ma bantumwa beri ya bakilaka, wayêla mu ba hana mbongo, 19 bu katâ: “Kunganeno mpe lutumu lo, ngatu muntu ni muntu wu nitenseka moko kabaka mpeve santu.” 20 Kâ Piere wamutêla: “Bîka ti mbongo* zaku zafwa naku, mu bungu ti benzi ti lendi baka kabu dia mpamba dia Nzambi mu mbongo. 21 Ka wena na kabu ko mpe ka wena na tima ko ti sa mu musamu wu, mu bungu ti mutima’aku ka wena wa sungama ko ha meso ma Nzambi. 22 Buna soba mabanza mu mbi’aku, mpe lemberela Yehova,* ngatu kakulemvokela mabanza mo ma mbi ma mutima’aku tala ti bulendi bâ. 23 Mu bungu ti mweni ti nge pwazo yena ya nduri na ngamba ya kondo kwa buderede.” 24 Simo wabavuturila: “Lembereleno Yehova* mu bungu dia meno, ngatu na kani musamu mu mio mi lutêle ka wukunturilandi.”
25 Bu bamana tomo tâ timbangi, mpe bu bazonzela zu dia Yehova,* bakâla ku Yerusaleme bu beri kwe samuni nsangu za mbote ku mahata mamingi ma Samaria.
26 Kâ mbazi ya Yehova yazonza kwe Filipe, mpe yatâ: “Telama mpe yenda ku side, mu nzila ya Yerusaleme yinataka ku Gaza.” (Nzila yena ya mutoto wa yuma.) 27 Buna watelama mpe wayenda, mpe tala! mfumu* yimosi ya ku Etiopi yeri salaka mu lutumu lwa mutinu wa wukento wa Bisi-Etiopi, Kandase. Mfumu yango dema diabâ nandi dia kipa bimvwama biandi biabiansoni. Ku Yerusaleme kayenda mu kwe sambila, 28 kâla keri kâlaka, mpe wa zakala wabâ mu tipusu tiandi, mbikuri Izayi keri tangaka mu zu dia ngolo. 29 Buna mpeve yatâ kwe Filipe: “Yenda mpe pusana ha tipusu tio.” 30 Filipe wadioka ha lweka lwa tipusu, wawâ Musi-Etiopi weri tangaka mbikuri Izayi mu zu dia ngolo, mpe watâ: “Ngano misamu mi ta tanga mia ta bakula?” 31 Yandi watâ: “Bwe ndendi bakurila tala ti muntu ka wukuntwarisi’â ko?” Buna walomba kwe Filipe mu naka na mu zakala ha lweka lwandi. 32 Titini tia Matsonoko ti keri tangaka ni eti: “Ntiana timeme ti bata nata mu honda tio, mpe ntiana mwana-timeme tibâka tia dzuna ha matu ma muntu wuta mu kurula mika, yandi mpe ka ziburi’â munwa ko. 33 Bu bamufwisa nsoni, ka bamufundisa mu buderede ko. Nani zonzela mbandu’andi? Mu bungu ti luzingu lwandi bakaturi lo ha mutoto.”
34 Buna Musi-Etiopi watâ kwe Filipe: “Mulemvo’aku, mu bungu dia nani mbikuri katêlele bo? Ngano mu bungu dia yandi beni peleko mu bungu dia muntu wakaka.” 35 Filipe wabatika mu zonza, mpe tûka titini tio tia Matsonoko, wamusamunina nsangu za mbote zitariri Yezu. 36 Bu beri kwe yende, batula ha mbuka yimosi yabâ na mamba, mpe Musi-Etiopi watâ: “Tala! Mamba ema ni mawu; nti bita kunkabakasa mu batusu.” 37* —— 38 Mpe walomba bakanga tipusu, Filipe na Musi-Etiopi bakôka mu mamba, mpe Filipe wamubatisa. 39 Bu banaka mu mamba, mpeve ya Yehova* yanata Filipe mu ntinu, mpe Musi-Etiopi ka vutu’â mu mona ko, kâ watatamana mu landa nzila’andi na nsayi yayansoni. 40 Kâ Filipe waye dukila ku Ashdode, mpe wasabuka tizunga tio bu keri kwe samuni nsangu za mbote mu mimvuka miamiansoni tii bu katula ku Sezarea.