Like
14 Tilumbu timosi tia Sabala, Yezu waye dia mu nzo ya mfumu yimosi ya Bafarize, mpe ni beri tomo mu sungamanaka. 2 Mpe tala! bakala dimosi diabâ na timbevo tiamuvimbisa nitu dieri ha matu mandi. 3 Buna Yezu wayula kwe bantu batomo zaba Musiku na kwe Bafarize: “Ngano balendi buka muntu mu tilumbu tia Sabala peleko kâni?” 4 Kâ bawu bakuta. Buna wasimba bakala dio, wamuwasisa mpe wamubîka kenda. 5 Ha manima wabatêla: “Nani mu beno, tala ti mwana’andi peleko ngombe’andi yibwiri mu bulu mu tilumbu tia Sabala lembo kulu mu dukisa?” 6 Bawu ka babâ na lenda ko dia hana mvutu ya tiyuvu tio.
7 Bu kamona ti bantu ba batikisa bibuka bia nguria mfunu beri sôlaka, wabahana tifwani eti: 8 “Muntu bu kakutikisa ku malaki ma makwela, kuzakalandi ha tibuka tia nguria mfunu. Ku lendi bâ muntu wakaka wu batikisi wukuyôkele mfunu. 9 Buna muntu wulutikisi beno bole mbo kakutêla, ‘Hana tibuka tiaku kwe yandi.’ Buna mu nsoni, mbo kwe zakala ha tibuka tia mansukina. 10 Kâ bu bakutikisaka, yenda zakala ha tibuka tia mansukina, ngatu muntu wukutikisi bu kakumona, kakutêla, ‘Ndiku’ani yenda zakala ku matu.’ Buna mbo kakuzangula ha matu ma bantu babansoni ba katikisi. 11 Mu bungu ti muntu ni muntu wutizangula mbo bamubetola, mpe muntu ni muntu wutibetola mbo bamuzangula.
12 Ha manima watâ mpe kwe muntu wamutikisa: “Bu tikisaka bantu mu dia kwe nge mu midi peleko mu nkokela, kutikisakandi ndiku zaku, mpangi zaku, bantu ba kanda diaku peleko bantu ba lubandakane bê mvwama. Mu bungu ti bawu mpe balendi ku tikisa mu ku karisila kabu diaku. 13 Kâ bu tikisaka bantu mu dia, tikisaka bamputu, bikata, bantu batsuringaka na bantu bafwa meso; 14 mpe mbo bâ na nsayi, mu bungu ti ka bena na tima ti bakukarisila ko. Buna mbo bakusenda ku mvumbukulu ya ba fwa ya bantu ba sungama.”
15 Bu kawâ misamu mio, muntu wumosi mu bantu ba batikisa wamutêla: “Nsayi kwe wô ta dia* mu Timfumu tia Nzambi.”
16 Yezu wamutêla: “Bakala dimosi diasa malaki ma manene mu nkokela, mpe watikisa bantu babingi. 17 Watambika ngamba’andi mu ntangu ya malaki ma nkokela mu tâ kwe bantu ba katikisa, ‘Yizeno, mu bungu ti biabiansoni bieka bia kubama bwawu bu.’ 18 Kâ mu kala, babansoni babatika mu lomba mulemvo. Wa ntete wamutêla, ‘Musitu nasumbiri mpe wê nani naduka mu tala wo; nzololo wakundemvokela.’ 19 Wakaka watâ, ‘Ngombe 10 nasumbiri mpe ni zo nita kwe taluzula; nzololo wakundemvokela.’ 20 Wakaka mpe watâ, ‘Ka ntama ko nkwelele, mpe mu bungu dia musamu wo ka ndendi’â ndiza ko.’ 21 Buna ngamba wakâla mpe watâ misamu mio kwe mfumu’andi. Buna mfumu ya nzo yabaka nkesi, mpe watêla ngamba’andi, ‘Sa manzangu, duka mu nzila za zinene na za fioti za mumvuka, mpe nata bamputu, bikata, bantu bafwa meso na bantu batsuringaka. 22 Tisari bu tiakâla tiatâ, ‘Mfumu musamu wukuntumini wa ndirikiri, mpe bibuka biatiri kô.’ 23 Buna mfumu yatâ kwe ngamba, ‘Yenda mu nzila za zinene na za fioti mpe tuma bantu mu ngolo mu kwiza, ngatu nzo’ani yafuluka. 24 Mu bungu ti wa nita lu têla, ka kwena muntu ko mu bantu ba batikisi wubimba bidia bia malaki mani.’”
25 Yungi dia bantu dieri saka nzietolo na yandi. Yezu, wabaluka mpe wabatêla: 26 “Tala ti muntu wiziri kwe meno mpe ka yinini’â* tata’andi ko, nguri’andi, mukento’andi, bala bandi, nkazi zandi na bibusi biandi, yee diangana ni lubâ luzingu* lwandi, ka lendi’â kabâ mulongoki’ani ko. 27 Wô lembo nata poto diandi dia matimuna* mpe lembo kundanda, ka lendi’â kabâ mulongoki’ani ko. 28 Mu tifwani, nani mu beno ta zolo tunga nzo ya zangama lembo toko zakala mu dimbitila na mu dinga mu zaba tala ti mbongo za fwanana zê nandi mu manisa yo? 29 Tala ti kâni, lendi tunga bandu kâ lembane mu manisa nzo. Buna bantu babansoni bamona musamu wo mbo babatika mu mu sehesela, 30 bu batâ: ‘Bakala di wabatikiri mu tunga, kâ lembane mu manisa.’ 31 Peleko tala ti mutinu wumosi wudingiri mu nwanisa mutinu wakaka, ngano ka toko’â zakala ko mu baka malongi ngatu kazaba tala ti na bantu 10 000 lendi nwanisa wô ta kwiza na bantu 20 000. 32 Tala ti ka lenda ko, mpe mutinu wakaka mala katiri, mbo kamutambikila bimonikisi mu dinga mu sa tidzunu. 33 Mpila mosi mpe, wô lembo sisa* bima biandi biabiansoni, ka lendi’â kabâ mulongoki’ani ko.
34 “Ntembe kâni mungwa wa mbote wena, kâ tala ti mungwa ka wusiri’â na luwu lwandi ko, na nti balendi lwa mu karisila? 35 Ka wusiri’â salu ko mu bungu dia mutoto peleko mu bima bitomesaka mutoto.* Bantu wa balosaka. Bîka ti wô wê na makutu mu wâ, kawâ.”