Like

17 Ha manima Yezu watâ kwe milongoki miandi: “Misamu mitêsaka makuba ka mikondo’â ko mu tula. Kâ tiari kwe wô tulumunaka mio! 2 Mbo wubâ bubote kwe yandi, tala ti bamukengi tari di banikinaka mbutu ha laka mpe bamulosele mu mubu na bu katêsele kuba wumosi mu bala eba. 3 Seno keba. Tala ti mpangi’aku yisiri disumu, mu semba, mpe tala ti sobele mabanza, mu lemvokela. 4 Ni bu sa ti sumukini kwe nge mbala 7 mu tilumbu, mpe mbala 7 kêri kwe nge mu tâ, ‘Nsobele mabanza,’ fweti mu lemvokela.”

5 Ntumwa zatâ kwe Mfumu: “Tu yikila timinu.” 6 Buna Mfumu watâ: “Tala ti timinu tie neno tie na bunene bwa mbutu ya mutarde, mbo lutâ kwe muti wu wa mûre* za ndombi, ‘Vuzuka, mpe yenda watikuna mu mubu!’ mpe mbo wulutumamana.

7 “Nani mu beno wê na ngamba yimububilaka mutoto peleko yimukipilaka twila, mu têla, bu kakâla ku musitu, ‘Sa manzangu, yiza dia ha meza’? 8 Kani kasila bo ngano ka mu têla ko, ‘Kunkubikila tima ti nidia, lwata tinkuti tia tisalu, mpe kunkipa tii bu nimanisa mu dia na mu nwa, mpe ha manima lendi dia mpe lendi nwa’? 9 Ka tonda ngamba yo ko mu bungu ti tisalu tiandi kasariri, ka buna ko? 10 Mpila mosi mpe, bu lusa misamu miamiansoni mi balulombele, têno: ‘Beto ngamba za mpamba kwa zena. Mio mi tusiri ni mio tufweti sa.’”

11 Bu keri kwendaka ku Yerusaleme wayôkela ha kati-kati dia Samaria na Galile. 12 Mpe bu keri kotaka ku hata dimosi, babakala 10 babâ na bwazi bayizi mu bwana, kâ batelama mwa mala. 13 Batâ ebu mu zu dia ngolo: “Yezu, Mulongi, tu fwila tiari!” 14 Yezu bu kabamona, wabatêla: “Yendeno lwatisongela kwe banganga-nzambi.” Mpe bu beri kwendaka, batsema. 15 Wumosi mu bawu bu kamona ti wawasa, wakâla mpe Nzambi keri kwe kembele mu zu dia ngolo. 16 Wafukama na tidiri tia kondama ha malu ma Yezu, mpe wamutonda. Kâ Musi-Samaria weri. 17 Yezu wamuvuturila: “Beno ba 10 lutsemene, ka buna ko? Buna ba 9 bakaka kwe bena? 18 Ngano ka kwena muntu wakaka ko wukêri mu kembela Nzambi bu tukatula bakala di dia mu kanda diakaka?” 19 Ha manima wamutêla: “Telama mpe yenda; timinu tiaku tikuwasisi.”

20 Bafarize bu bamuyula ntia ntangu Timfumu tia Nzambi tikwiza, wabavuturila: “Timfumu tia Nzambi ka tikwiza mu mpila yitomono zabakana ko; 21 mpe bantu ka batâ ko, ‘Taleno eti ni tiawu!’ peleko, ‘Ekunê tiena!’ Mu bungu ti Timfumu tia Nzambi ha kati dieno tiena.”

22 Ha manima watâ kwe milongoki miandi: “Bilumbu bibâ kô bi lubâ na nsatu ya mona bilumbu bia Mwana muntu, kâ ka lumona bio ko. 23 Bantu mbo balutêla, ‘Taleno ekunê!’ peleko, ‘Taleno eha!’ Ka ludukandi peleko ka lubalandandi. 24 Mu bungu ti ntiana kwa bu kengaka mutsamina wa nzazi tûka titini timosi tia zulu tii ku titini tiakaka tia zulu, Mwana muntu mpe ni bo kabâ mu tilumbu tiandi. 25 Kâ, fweti toko mona mpasi zazingi, mpe bantu ba mbandu yi bafweti mu kala. 26 Musamu wakaka, ntiana kwa misamu bu miabâ mu ntangu ya Noa, ni bo kwa mpe mibêla mu bilumbu bia Mwana muntu: 27 bantu dia beri diaka, nwa beri nwaka, babakala kwela beri kwelaka, bakento mu makwela beri ba hanaka tii mu tilumbu Noa ti kakota mu arshe. Delize yayiza mpe yabafukisa babansoni. 28 Mpila mosi mpe, ntiana kwa misamu bu miabâ mu bilumbu bia Lote: dia beri diaka, nwa beri nwaka, sumba beri sumbaka, teka beri tekaka, kuna beri kunaka, nzo beri tungaka. 29 Kâ tilumbu Lote ti kaduka ku Sodome, mvula ya tiya na sufre yabwa tûka ku zulu mpe yabafukisa babansoni. 30 Misamu mpe ni bo mibâ mu tilumbu ti moneka Mwana muntu.

31 “Mu tilumbu tio muntu wê ku zulu muluri wa nzo, kâ wê na bimvwama mu nzo, ka kôkandi mu bonga bio; mpila mosi mpe, muntu wê ku musitu ka fweti’â kakârila bima bi kasisiri ko. 32 Bambukileno mukento wa Lote. 33 Wô dinga mu kengerela luzingu* lwandi, mbo kahombesa lo, kâ wô hombesa luzingu* lwandi, mbo kakengerela lo. 34 Wa nita lu têla, mu mpimpa yo bantu bole babâ ku mfulu yimosi; wumosi mbo bamubonga kâ wakaka mbo bamusisa. 35 Mbo kubâ bakento bole banika ble ha tipaki timosi; wumosi mbo bamubonga, kâ wakaka mbo bamusisa.” 36* —— 37 Buna bamutêla: “Ntia kûma Mfumu?” Wabatêla: “Hô habâ mvumbi, mbemba mpe ni hô zikutakana.”