Bisalu bia Bantumwa
12 Mu ntangu yîna kwa, mutinu Erode wabatika mu kwamisa bantu bakaka ba timvuka. 2 Wahondesa Zaki yaya* dia Za mu mbele. 3 Bu kamona ti musamu wo Bayuda weri tâka nsayi, wakanga mpe Piere. (Ntangu ya Malaki ma Mampa Malembo Levire yabâ.) 4 Wamukanga mpe wamutûla ku boloko, bu kamuhana ha moko ma bikunku biyà bieri na binwani biyà-biyà bieri sobasanaka mu mu kêla. Erode kani diabâ nandi dia mu nata ha matu ma bantu ha manima ma Pake. 5 Buna batatamana mu kêla Piere ku boloko, kâ timvuka tiatomo sambila Nzambi mu bungu dia yandi.
6 Mpimpa ntete Erode kamunata ha matu ma bantu, Piere tolo keri bwaka ha kati dia binwani biole, wa kangama mu chaîne zole, mpe minkengi miatelama ha mwelo mu kengerela boloko. 7 Kâ tala! mbazi ya Yehova* yatelama hâna, mpe mutsamina wakenga mu boloko. Wavumbula Piere bu kamusimba mu lubanzi mpe watâ: “Telama, sa manzangu!” Mpe chaîne zandi za mu moko zabwa. 8 Mbazi yamutêla: “Lwata binkuti na mapapa maku.” Ni bo kasila. Ku nsuka wamutêla: “Tûla tinkuti tiaku tia zulu mpe kundanda.” 9 Piere waduka mpe wamulanda, kâ keri’â zabaka ko ti misamu miamiansoni mieri yirikaka mbazi mia matieleka mieri. Diangana, wabanza ti timona-meso keri monaka. 10 Bu bayôka tikunku tia minkengi tia ntete mpe tia nzole, batula ha mwelo wa bisengo weri nataka ku mumvuka, mpe mwelo wazibuka wawu beni ha matu mawu. Bu bamana duka, bapusana mu nzila yimosi, mpe mbala mosi mbazi yamusisa. 11 Mpe Piere bu kabakula misamu miatula, watâ: “Bwawu bu ntomono zaba ti Yehova* tambikiri mbazi’andi mu kunkûla mu koko kwa Erode na mu mio miamiansoni mi bele kekoloko Bayuda mu kundirika.”
12 Bu kamana bakula musamu wo, wayenda ku nzo ya Maria nguri ya Za wu batâka Marke. Bantu babingi bavukana kûna mpe sambila beri sambilaka. 13 Bu kakonkota ha mwelo wa lupangu, tisari tia tikento tiabâ na nkumbu Rode tiayiza mu tala ka nani weri. 14 Bu kazaba zu dia Piere, nsayi yingi kwa yabâ nandi, kani kazibula mwelo, wadioka ku kati mpe wahana nsangu ti Piere ha mwelo katelama. 15 Bamutêla: “Lawukiri!” Kâ watatamana mu tâ ti ni buna weri. Bawu babatika mu tâ: “Mbazi’andi yena.” 16 Kâ Piere watatamana mu konkota. Bu bazibula mwelo, bamumona mpe bayituku. 17 Kâ wabatêla mu koko kwandi babîka lwaza, mpe watomo ba bangurila bwe Yehova* kamudukisila ku boloko, mpe watâ: “Haneno nsangu zi kwe Zaki na kwe bampangi.” Buna waduka mpe wayenda ku mbuka yakaka.
18 Bwisi bu bwatia, vwandi dia ngolo diakota ha kati dia binwani bu beri dingaka mu zaba Piere bwe kabwana. 19 Erode wamudinga kwakwansoni, mpe mu bungu ti keri’â mu bakaka ko, wayula minkengi, mpe wahana ntumunu ti babasemba. Ha manima, Erode wakatuka ku Yude mu kwenda ku Sezarea ku kayôkesela mwa ntangu.
20 Nkesi zabâ nandi mu bungu dia bantu ba ku Tire na ba ku Sido. Buna bawu bawisana mu kwe mu tala, mpe bu bamana wisa Balatuse, bakala dieri kipaka bisalu bia nzo ya mutinu, balomba tidzunu, mu bungu ti bima biawu bia dia ku nsi ya mutinu bieri tûkaka. 21 Tilumbu ti bawisana bu tiatula, Erode walwata binkuti bia mutinu, wazakala ku tribinale, mpe wabatika mu ba sila tinzonzi. 22 Ha manima, bantu bavukana babatika mu kawula: “Zu dia nzambi, ka dia muntu’â ko!” 23 Hô nkatika bendo, mbazi ya Yehova* yamutwa, mu bungu ti ka hana mukembo kwe Nzambi ko; misiete miamudia mpe wafwa.
24 Kâ zu dia Yehova* diatatamana mu yangana mpe lutangu lwa milongoki lwakula.
25 Barnabase na Saule, bu bamana tomo lungisa tisalu tiawu tia lubakusu ku Yerusaleme, bakâla mpe banata Za na bawu, wu batâka mpe Marke.