Mubungu diantsi tulwataka bubote mu kwenda ku tukutakanu tweto e?

Watamona mu bintsintsia bia mwa buku diawudi ti Mbangi za Yehova bubote balwataka mbo babaka ku tukutakanu twawu e? Mubwenabwe tutomo tomesaka ndwatulu’eto na nsuki zeto mpila yawu yo e?

Mu songela buzitu bweto kwe Nzàmbi. Ninga, Nzàmbi katalaka kwa mbazi’eto ko. (1 Samwele 16:7) Kâ bo mbo tuvukanaka mu sambila Nzàmbi, tuzoloko twasongesa bujitu kwe Nzàmbi na kwe bampwaneto bakristo. Tala ti mfumu tutakwe monekena, mbo tutomba talwata bubote mu jitisa kimfumu kiandi. Bo nkatsika bo, ndwatulu yitubaka na yo ku tukutakano twetu mbo yisongelaka bujitu bu tuhanaka kwe Yehova Nzàmbi, “Ntinu wa makanda,” mpe mu mbuka yo yi tumusambirilaka.​—Yeremi 10:7.

Mu songesa ntsia mishiku tulandaka mu luzíngu lweto. Bibila tsilombele kwe bakristo ‘bajitisa ndilu mpe baba na mabanza ma mabote’ mu ndwatulu’awu. (1 Timote 2:9, 10) “Zitisa ndilu” ni mu kala mu lwata binkuti bitomobenda meso mabantu kwe beto, bio bitsotsaka, peleko bitasongela nitu. Mpe, “mabanza ma mabote” mbo matubakisaka mu sola binkuti bia toma bilembolo ba bia kirikiri mpe bilemboloyoka ndilu. Mishiku miango ka mita kanga moshi na moshi nzila ko mu sola binkuti bika yangalale. Ni tulembo zonza kwa, ndwatulu’eto ya toma mpe yifwanakane yilenda “tomesa ndongosolo ya Mvulusi’eto” Nzàmbi mpe yilenda ‘mukembesa.’ (Tite 2:10; 1 Piere 2:12) Mu bungu dia ndwatulu’eto mu kwenda ku tukutakanu tweto, bantu balenda yangalala nsambululu yi tuhanaka kwe Yehova.

Ni bulomboba na binkuti bia toma, lenda kwiza kwa ku tukutakanu tweto ku Nzo ya Kimfumu. Binkuti bieto mu ba bio bia tsema peleko mu moneka bio bia bibote ha meso ma bantu, ka kwena ko ti biaba ngula ntalu peleko bia mona.

• Mubwenabwe tufweni lwataka bubote mbo tukwesambilaka Nzàmbi e?

• Ntsia mishiku mitudiatisaka mu sola binkuti bieto mpe mpila ya yirikila nsuki e?