Kani dia Yefte

Bala ba Israele bavutu bîka Yehova mu sambila Nzambi za bungungu. Kanda dia Amone bu dianwanisa kanda dia Israele, nzambi zo zalembana mu ba bakisa. Bala ba Israele bamona mpasi mvula zazingi. Ha manima, bawu batâ kwe Yehova: ‘Tasumukini. Mulemvo’aku, tu vûkisa mu mbeni zeto.’ Bala ba Israele bamwangasa biteki biawu, mpe bakârila mu sambila Yehova. Yehova ka zolo’â ko ti bawu batatamana mu mona mpasi.

Yefte, tinwani timosi, bamusola mu twarisa kanda dia Israele mu muzingu na kanda dia Amone. Yandi watâ kwe Yehova: ‘Tala ti tu bakisi mu nunga mpaka zi, nikukanisini ti mbo nikuhana muntu wa ntete wudûka mu nzo’ani mu kwizi kumbwana.’ Yehova wawâ lusambulu lwa Yefte, mpe wamubakisa bakisa mu nunga muzingu.

Yefte bu kakâla ku nzo, muntu wa ntete wadûka mu mu bwana ni mwana’andi wa wumosi wa wukento. Tina keri tinaka, mpe ngoma ya fioti keri sikaka. Ngano Yefte nti kasa? Yandi wabambukila kani diandi mpe watâ: ‘Ô mwana’ani! Kumpasuri mutima. Kani nasiri kwe Yehova. Mu lungisa dio, mfweti ku tambika ku tabernakle ku Shilo.’ Kâ mwana’andi wamutêla: ‘Tata, tala ti kani wasiri kwe Yehova fweti dia lungisa. Musamu wu nita ku lomba ni mu kwenda ngonda zole ku miongo na ndiku zani za zikento. Ha manima, mbo nikwenda.’ Mwana wa Yefte wasarila Yehova na kwikama kwakwansoni ku tabernakle, luzingu lwandi lwalwansoni. Mivu miamiansoni, ndiku zandi yandi beri kwizi mu talaka ku Shilo.