Davide na Goliate

Yehova watâ kwe Samwele: ‘Yenda ku nzo ya Yese. Wumosi wa bala bandi bâ mutinu wa Israele.’ Buna Samwele wayenda ku nzo ya Yese. Bu kamona mwana wa ntete, yandi wabanza: ‘Ntwenia yi ni yandi.’ Kâ Yehova watâ kwe Samwele ti ka yandi’â ko. Yehova watâ: ‘Meno mutima wa muntu nitalaka, ka nitalaka kwa misamu mimonekaka mu meso ko.’

Yese wanata bala bandi ba 6 bakaka ba babakala kwe Samwele. Kâ Samwele watâ: ‘Yehova ka solele’â muntu ko mu bawu. Ngano bala bakaka ba babakala bê naku?’ Yese watâ: ‘Mwana wakaka wusiri nani, mwana wa mansukina, Davide. Bimeme kata kêla.’ Davide bu kayiza, Yehova watâ kwe Samwele: ‘Ni yandi!’ Samwele watsamuna mafuta ha zulu mutu wa Davide, mpe wamutumba mu bâ mutinu wa Israele.

Ntangu fioti ha manima, bala ba Israele muzingu beri nwanaka na Bisi-Filisti babâ na tinwani tia zangama ti beri tâka nkumbu Goliate. Tilumbu timosi, Goliate wasehesela bala ba Israele. Yandi watâ mu ngolo: ‘Kuntambikileno muntu wunwana na meno. Tala ti nungini, mbo tubâ ngamba zeno. Kâ, tala ti nimunungini, mbo lubâ ngamba za beto.’

Davide wayiza ku mbuka ya bâ binwani bia bala ba Israele na bidia mu bungu za mpangi zandi zabâ binwani. Yandi wawâ Goliate, mpe watâ: ‘Mbo nimunwanisa!’ Mutinu Sawule wamutêla: ‘Nge mwana fioti kwa wena.’ Davide wavutula: Yehova mbo kakumbakisa.’

Sawule wayêla mu hana binwanunu biandi kwe Davide, kâ Davide watâ: ‘Ka ndendi’â nanwana na binwanunu bi ko.’ Davide wabonga lulaku (fronde) mpe wayenda ku nto yimosi. Yandi wasola matari ma 5 ma pesakana mpe watûla mo mu nkutu. Ha manima, Davide wapusana kwe Goliate mu ntinu. Muntu wo wa zangama watâ mu ngolo: ‘Yiza kû, nge mwana wu. Mbo nikuhana kwe nuni za ku zulu ngatu zakudia, na kwe bibulu bia ku sangi.’ Davide ka bâ na bunkuta ko. Buna yandi watâ mu ngolo: ‘Kwe meno ta kwiza na mbele ya muzingu, mboko na dionga; kâ meno kwe nge nita kwiza na nkumbu ya Yehova. Kuta nwana na beto ko, kâ na Nzambi ta nwana. Bantu babansoni mbo bamona ti Yehova yôkele mbele ya muzingu na dionga mu ngolo. Yandi mbo kaluhana beno bansoni ha moko meto.’

Davide watûla tari mu lulaku lwandi, wazungasa lo mu ngolo, mpe walosa tari na ngolo zazansoni. Na lubakusu lwa Yehova, tari diayenda mpe diabaka Goliate ha mbunzu. Muntu wo wa zangama wabwa ha mutoto mpe wafwa. Buna Bisi-Filisti badioka mu vûkisa luzingu lwawu. Ngano lukwikulu tûlaka mu Yehova ntiana Davide?