Yonatane—Muntu wabâ na butindi mpe wa kwikama

Yonatane, mwana wa ntete wa Sawule, tinwani tiabâ mpe butindi bwabâ nandi. Davide watâ ti yandi wayôka mbemba mu ntinu, mpe wayôka ngo-mbulu mu ngolo. Tilumbu timosi, Yonatane wamona binwani bia Bisi-Filisti ha zulu mongo. Yandi watâ kwe muntu weri kwe mu natini binwanunu: ‘Tulendi ba nwanisa kwa tala ti Yehova tu heni tidimbu. Tala ti Bisi-Filisti batutêlele tanaka, buna mbo tuzaba ti nswa we neto wa ba nwanisa.’ Buna Bisi-Filisti batâ mu ngolo: ‘Nakeno ngatu tanwana!’ Dieka bo, ba bole banaka mongo, mpe banunga binwani bia 20.

Mu bungu ti Yonatane ni mwana wa ntete wa Sawule, ni yandi waketi bâ mutinu wa Israele. Kâ yandi wazaba ti Yehova Davide kasola. Yonatane ka bâ na timbanda ko mu Davide. Yonatane na Davide bayizi bâ ndiku za mbote. Bawu bayizi tikanisina mu tikengerela na mu tinwanina. Mu songela ti ndiku ya Davide yabâ, Yonatane wahana tiyunga tiandi kwe Davide, mbele’andi ya muzingu, arke na musinga’andi wa luketo.

Buna Davide wadioka mu vûkisa luzingu lwandi mu bungu dia Sawule. Yonatane wayizi mu têla: ‘Bâ na ngolo, mpe bâ na butindi. Yehova nge kasolele mu bâ mutinu; tata’ani wa kazebi.’ Ngano zolo wabâ na ndiku ntiana Yonatane?

Mbala zazingi, Yonatane watûla luzingu lwandi mu mpasi mu bakisa ndiku’andi, mu bungu ti wazaba ti tata’andi Davide keri dingaka mu honda. Yandi wamutêla: ‘Davide ka yirikiri’â musamu wa mbi ko; tala ti mu hondele, mbo sumuka.’ Buna Sawule wabakila Yonatane nkesi. Mu mvula zalanda ha manima, Sawule na Yonatane bayizi fwa ha timosi ku muzingu.

Ha manima, Davide wadinga mwana wa Yonatane, Mefibosete. Bu kamona mwana wango, yandi watâ: ‘Tata’aku ndiku’ani yabâ. Buna mbo nikukipa tii ku nsuka ya luzingu lwaku. Mu nzo ya timfumu ya meno bêla, mpe ha meza mani dîla.’ Davide ka zimbakana ndiku’andi Yonatane ko.