Yehova nwanini Yehozafate

Yehozafate, mutinu wa Yuda, wamwangasa maziku ma Bale na biteki ku nsi’andi. Yandi wazolo ti bantu babansoni bazaba misiku mia Yehova. Buna, Yehozafate watambika bamfumu na Balevite mu nsi yayansoni ya Yuda mu longesa misiku mia Yehova kwe bantu.

Makanda mabazungirila bunkuta bwa bâ nawu bwa nwanisa kanda dia Yuda mu bungu ti bazaba ti Yehova na kanda diandi kabâ. Makanda mango manata mpe makabu kwe mutinu Yehozafate. Kâ Bisi-Moabe, kanda dia Amone, na bantu ba tizunga tia Seyire bayizi nwanisa Yuda. Yehozafate wazaba ti nsatu lubakusu lwa Yehova yabâ nandi. Buna yandi wakutakasa bantu babansoni, bakento, babakala na bala ku Yerusaleme. Ha meso mawu, yandi wasambila: ‘Yehova, tala ti nge kâni, ka tulendi’â tanunga ko. Mulemvo’aku, tu têla musamu wu tufweti yirika.’

Yehova wahana mvutu mu lusambulu lo: ‘Ka lubândi na bunkuta. Mbo nilubakisa. Kubameno, ka luninganandi, taleno bwe niluvûkisila.’ Bwe Yehova kabavûkisila?

Tilumbu tialanda, Yehozafate wasola bantu beri tangaka mikunga, mpe wabatêla mu diata ku matu ma binwani. Bawu badiata tûka Yerusaleme tii ha mbuka ya muzingu yabâ ku mbuka yi beri tâka nkumbu Tekoa.

Bitangi bia mikunga bu bieri kembelaka mu nsayi na mu zu dia ngolo, Yehova wanwana mu bungu dia kanda diandi. Yandi wakotesa vwandi ha kati dia kanda dia Amone na kanda dia Moabe, mpe babatika mu nwana bawu na bawu. Babansoni bafwa. Yehova wakengerela kanda diandi, binwani na nganga-nzambi za ku Yuda. Makanda mamansoni meri ba zungirilaka mawâ nsangu za misamu mia yirika Yehova, mpe babakula ti Yandi kanda diandi keri kengerelaka ntangu zazansoni. Bwe Yehova kavûkisilaka bisari biandi? Mpila zazingi kasarilaka. Kena na nsatu lubakusu lwa bantu ko mu ba vûkisa.