Tinwani na mwana wa mukento

Ku nsi ya Siri, mwana Israele wumosi wa wukento wabâ kô wu bahambasa na bibuti biandi. Binwani bia Bisi-Siri biamukatula mu kanda diandi, mpe wayizi bâ tisari tia mukento wa mfumu ya binwani yi beri tâka nkumbu Namane. Mwana wo Yehova weri sarilaka, kâ bantu beri mu zungirilaka ka beri’â sarilaka Yehova ko.

Namane timbevo tia ngolo tiabâ nandi mu mukanda wa nitu, mpe mpasi tieri mu mwisaka ntangu zazansoni. Mwana wo watomo dinga mu mu bakisa. Yandi watâ kwe mukento wa Namane: ‘Muntu nzebi wulendi bakisa bakala diaku. Ku Israele, mbikuri ya Yehova yê kô yi batâka nkumbu Elize. Yandi lendi wasisa bakala diaku.’

Mukento wa Namane watâ misamu mia mu têla mwana wo kwe bakala diandi. Namane wa kubama wabâ mu yêla misamu miamiansoni; buna wayenda kwe Elize ku Israele. Namane wazolo ti Elize kamubwana ntiana muntu wa nsangu. Kâ kani kamuzonzela, Elize watambika tisari tiandi mu bwana Namane na mu mu hana nsangu: ‘Yenda yebela mbala 7 mu nzari ya Zurde. Buna mbo wasa.’

Namane watomo nionga. Yandi watâ: ‘Mbenziki ti mbikuri yo mbo kaketi kungwasisa bu kaketi bingulaka Nzambi’andi, mpe bu kaketi kuntensekaka moko. Kani wabêla buna, yandi kuntêlele die na yebela mu nto yimosi ya ku Israele. Nto za beto za ku Siri ziyôkele bubote. Mu bungu dia nti nilembo kwe yeberela kwani mu nto zo?’ Namane wabaka nkesi mpe wadûka ku nzo ya Elize.

Bisari bia Namane biamubakisa mu tomo banza. Bawu bamutêla: ‘Ngano kulendi’â wasa tima ko mu wasa? Musamu wu ku lombele mbikuri ka wena mpasi. Mu bungu dia nti lendi lembo wa sila kwa?’ Namane wabawîla. Yandi wayenda ku nzari ya Zurde, mpe wavwama mu mamba mbala 7. Ha manima ma mbala ya 7, Namane wadûka mu mamba wa wasa. Yandi watomo tonda, mpe wakâla mu vutula matondo kwe Elize. Namane watâ: ‘Bwawu bu, nzebi ti Yehova ni Nzambi ya matieleka.’ Mu mabanza ma nge, ngano mwana Israele wo wa mukento wa fioti bwe kamona ku mutima bu kamona Namane wakâla wa wasa?