Yoziase wazolo Musiku wa Nzambi

Yoziase mvula 8 zabâ nandi bu kayizi bâ mutinu wa Yuda. Mu ntangu yîna, bantu bunganga beri sarilaka, mpe biteki beri sambilaka. Bu kabâ na mvula 16, Yoziase wadinga mu zaba mpila ya mbote yi bafweti sambirila Yehova. Bu kayizi bâ na mvula 20, yandi wabatika mu mwangasa biteki na maziku mu nsi yayansoni. Mboko, bu kayizi bâ na mvula 26, Yoziase watomesa Tempelo ya Yehova.

Mu Tempelo, Hilkia, mfumu-nganga-nzambi, wadzukula rulo ya Musiku wa Yehova—kampe mukanda ni wo kwa wa tsoneka Mose. Sekretere ya mutinu, Shafane, wanata rulo kwe Yoziase, mpe wabatika mu tanga Musiku mu zu dia ngolo. Bu keri wâka ntangulu, Yoziase wabakula ti bantu Yehova beri kolamanaka tûka mvula zazingi. Mutinu Yoziase watâ kwe Hilkia: ‘Yehova nkesi zazingi ze nandi mu beto. Yendeno lwazonza na Yandi. Yehova mbo katutêla nti tufweti sa.’ Yehova wahana mvutu mu nzila ya mbikuri Ulda: ‘Kanda dia Yuda diakundiambirikiri. Bawu mbo nibasemba, kâ ka mu ntangu’â ko Yoziase yi ke mutinu, mu bungu ti wakulukiri ha meso mani.’

Mutinu Yoziase bu kawâ nsangu za Yehova, wayenda ku Tempelo mpe watumisa kanda dia Yuda. Ha manima, bawu batanga Musiku wa Yehova mu zu dia ngolo ha meso ma bantu babansoni. Yoziase na bantu babansoni basa kani dia tumama kwe Yehova mu mutima wawansoni.

Kanda dia Yuda ka diakembela Pake ko tûka mvula zazingi. Kâ Yoziase bu katanga mu Musiku ti bafweti kembelaka Pake mivu miamiansoni, watâ kwe kanda dia Yuda: ‘Pake tukembela mu bungu dia Yehova.’ Buna Yoziase wakubama mu hana mikayulu miamingi, mpe wakubika bitangi bia mikunga ku Tempelo. Ha manima, bantu babansoni bakembela Pake na malaki ma mampa ma lembo levire, bilumbu 7. Ka kwa bâ Pake ya mpila yo ko tûka ntangu ya Samwele. Yoziase Musiku wa Nzambi keri tomo zoloko. Ngano nge mpe Yehova zoloko mu zaba?